‘ৰাইজৰ সিদ্ধান্ত স্বীকাৰ কৰিছো, বিজেপিক অভিনন্দন…’ পৰাজয়ৰ পিছত অৰবিন্দ কেজৰিৱালৰ প্ৰথম প্ৰতিক্ৰিয়া
দিল্লী বিধানসভা নিৰ্বাচনত আম আদমি পাৰ্টিৰ পৰাজয়ৰ পিছত প্ৰথম প্ৰতিক্ৰিয়া প্ৰকাশ কৰিছে আপৰ ৰাষ্ট্ৰীয় আহ্বায়ক অৰবিন্দ কেজৰিৱালে । তেওঁ কয় যে আমি ৰাইজৰ সিদ্ধান্ত স্বীকাৰ কৰিছো । এই বিজয়ৰ বাবে বিজেপিক অভিনন্দন । আমি ৰাইজৰ সুখ-দুখত সহায় কৰি যাম ।
কেজৰিৱালে এক ভিডিঅ’ বাৰ্তাযোগে কয় যে দিল্লীৰ নিৰ্বাচনৰ ফলাফল আজি আহিছে । ৰাইজৰ সিদ্ধান্ত যিয়েই নহওক, আমি সকলো বিনম্ৰতাৰে স্বীকাৰ কৰিছো । বিজেপিক বিজয়ৰ বাবে অভিনন্দন জনাইছো । আশাকৰোঁ মানুহে যি আশাৰে তেওঁলোকক সংখ্যাগৰিষ্ঠতা দিছে, সেই আশাবোৰ পূৰণ কৰিব ।
তেওঁ কয় যে বিগত দহ বছৰত জনসাধাৰণে আমাক দিয়া সুযোগত আমি বহু কাম কৰিছো । শিক্ষা, স্বাস্থ্য, বিদ্যুৎ আৰু পানীৰ ক্ষেত্ৰত বহু কাম কৰা হৈছে । আমি বিভিন্ন ধৰণেৰে মানুহক সকাহ দিবলৈ চেষ্টা কৰিছো । দিল্লীৰ আন্তঃগাঁথনি উন্নত কৰাৰ চেষ্টা কৰিছিলো ।
কেজৰিৱালে কয় যে আমি ক্ষমতাৰ বাবে ৰাজনীতিত প্ৰৱেশ কৰা নাই, সেয়েহে জনসাধাৰণৰ সুখ-দুখত আমি সদায় তেওঁলোকৰ কাষত থাকিম । আমি ৰাজনীতিক এক মাধ্যম হিচাপে গণ্য কৰোঁ যাৰ জৰিয়তে আমি জনসাধাৰণৰ সেৱা কৰিব পাৰো । আমি কেৱল শক্তিশালী বিৰোধীৰ ভূমিকা পালন কৰাই নহয় সমাজসেৱাও কৰি যাম । আমি ৰাইজৰ সুখ-দুখত এনেদৰে সহায় কৰিব লাগিব ।
তেওঁ কয় যে মই আম আদমি পাৰ্টিৰ সকলো কৰ্মকৰ্তাক অভিনন্দন জনাইছো । তেওঁলোকে নিৰ্বাচনত শক্তিশালীভাৱে যুঁজিছিল । আমাৰ কৰ্মীসকলে বহু কষ্ট কৰিছিল । এই সময়ছোৱাত তেওঁলোকে বহুখিনি সহ্য কৰিছিল যদিও এই নিৰ্বাচনৰ সমগ্ৰ সময়ছোৱাত যুঁজিছিল । ইয়াৰ বাবে তেওঁলোকক অভিনন্দন জনাইছো ।
দিল্লীৰ মুখ্যমন্ত্রী আতিশীয়ে প্রথম প্রতিক্রিয়া প্রদান কৰি কয় যে প্রথমে মোৰ প্রতি বিশ্বাস প্রদর্শন কৰা কলকাজী বিধানসভাৰ ৰাইজক ধন্যবাদ জনাইছোঁ ৷ বাহুবল, গুণ্ডাগিৰি আৰু হিংসাৰ সন্মুখীন হোৱাৰ পিছতো তৃণমূল পৰ্যায়ত কঠোৰ পৰিশ্ৰম কৰি জনসাধাৰণৰ ওচৰলৈ যোৱা মোৰ দলটোক মই ধন্যবাদ জনাইছো । বাকীখিনি দিল্লীবাসীৰ আদেশ । আমি মানি লৈছো ।