বিজয় হাজাৰে ট্ৰফী : ব্যৰ্থ ৰোহিত শৰ্মা, পুনৰ গৰজিল বিৰাট কোহলীৰ বেটে
চলিত বিজয় হাজাৰে ট্ৰফীত আজি প্ৰত্যেটো দলে নিজৰ দ্বিতীয়খন মেচ খেলে । পূৰ্বৰ মেচত শতৰান সংগ্ৰহ কৰা ৰোহিত শৰ্মা আজি চূড়ান্ত ব্যৰ্থ হয় ।
শুকুৰবাৰে ২০২৫-২৬ বৰ্ষৰ বিজয় হাজাৰে ট্ৰফীৰ সকলো দলৰ দ্বিতীয়খন খেল আছিল । পূর্বৰ খেলখনত শতক অর্জন কৰা বিৰাট কোহলীয়ে আন এক উজ্জ্বল ইনিংছ খেলে যদিও হিটমেন ৰোহিত শর্মা ব্যৰ্থ হয় । পূর্বৰ খেলখনত শতক অর্জন কৰা ৰোহিতে আজি প্রথম বলতে আউট হয় ৷ ইফালে প্ৰথম আৰু দ্বিতীয় দুয়োখন খেলতে শতক অৰ্জন কৰে দেৱদত্ত পাদিক্কাল আৰু ধ্ৰুৱ শ্বোৰেই ।
বিৰাট কোহলী-
দিল্লীৰ খেলুৱৈ বিৰাট কোহলীয়ে পূর্বৰ খেলখনত অন্ধ্রৰ বিৰুদ্ধে ১৩১ ৰান সংগ্ৰহ কৰিছিল । আজি তেওঁ বি চি চি আই চেণ্টাৰ অৱ এক্সেলেন্সত গুজৰাটৰ বিৰুদ্ধে ৭৭ ৰানৰ ইনিংছ খেলে । ৬১টা বলৰ এই ইনিংছত কোহলীয়ে এটা ছয় আৰু ১৩টা চাৰি কোবাই । উল্লেখ্য যে, এই টুৰ্ণামেণ্ট আৰম্ভ হোৱাৰ পূৰ্বে কোহলীয়ে মাত্ৰ দুখন মেচ খেলিব বুলি খবৰ ওলাইছিল ।
ৰোহিত শৰ্মা-
কোহলীৰ দৰেই ৰোহিত শৰ্মাইয়ো মুম্বাইৰ হৈ বিজয় হাজাৰে ট্ৰফীৰ প্ৰথম দুখন মেচ খেলিব বুলি খবৰ প্ৰকাশ পাইছিল । আজি দ্বিতীয়খন মেচ আছিল, য’ত ৰোহিতে তেওঁৰ প্ৰথমটো বলতে উইকেট বিসৰ্জন দিয়ে । পূর্বৰ খেলখনত ছিকিমৰ বিৰুদ্ধে ৯৪টা বলত ১৫৫ ৰান সংগ্ৰহ কৰা ৰোহিতে তেওঁ এই ইনিংছত ৯টা ছয় আৰু ১৮টা চাৰি কোবাই । খেলখনৰ শ্ৰেষ্ঠ খেলুৱৈ হিচাপে নিৰ্বাচিত হৈছিল ৰোহিত ।
ঋষভ পন্ট-
দিল্লীৰ অধিনায়ক ঋষভ পন্টে আজি গুজৰাটৰ বিৰুদ্ধে অৰ্ধশতক অৰ্জন কৰি ৭৯টা বলত দুটা ছয় আৰু ৮টা চাৰিৰ সহায়ত ৭০ ৰান সংগ্ৰহ কৰে । ছিকিমৰ বিৰুদ্ধে পূর্বৰ খেলখনত পণ্টে মাত্ৰ ৫ ৰানহে কৰিছিল ৷
ৰিংকু সিং-
উত্তৰ প্ৰদেশৰ অধিনায়ক ৰিংকু সিঙে আজি চণ্ডীগড়ৰ বিৰুদ্ধে ১০৬ ৰানৰ অপৰাজিত ইনিংছ খেলে । এই বিস্ফোৰক ইনিংছত ৰিংকুৱে ১৭৬.৬৭ ষ্ট্ৰাইক ৰেটত খেলি চাৰিটা ছয় আৰু ১১টা চাৰি কোবাই । পূৰ্বৰ খেলখনত হায়দৰাবাদৰ বিৰুদ্ধে ৬৭ ৰান সংগ্ৰহ কৰিছিল ৰিংকুৱে ।
দেৱদত্ত পাদিক্কাল আৰু ধ্ৰুৱ শ্বোৰেৰ দ্বিতীয়টো শতক-
কৰ্ণাটকৰ হৈ খেলা দেৱদত্ত পাদিক্কালে ঝাৰখণ্ডৰ বিৰুদ্ধে প্ৰথমখন খেলত ১৪৭ ৰান সংগ্ৰহ কৰিছিল । আজি কেৰালাৰ বিৰুদ্ধেও তেওঁ শতক অৰ্জন কৰে । ৩টা ছয় আৰু ১২টা চাৰিৰ সহায়ত ১৩৭টা বলত ১২৪ ৰান সংগ্ৰহ কৰে পাদিক্কালে । দুখনকৈ মেচ খেলাৰ পিছত তেওঁ চলিত বিজয় হাজাৰে ট্ৰফীৰ সৰ্বাধিক ৰান সংগ্ৰহকাৰী হিচাপে পৰিগণিত হৈছে । তেওঁ দুখন মেচত ২৭১ ৰান সংগ্ৰহ কৰিছে ।
ইফালে বিদৰ্ভৰ বেটছমেন ধ্ৰুৱ শ্বোৰেই আজি হায়দৰাবাদৰ বিৰুদ্ধে অপৰাজিত ১০৯ ৰান সংগ্ৰহ কৰে । পূৰ্বৰ খেলখনত তেওঁ বংগৰ বিৰুদ্ধে ১৩৬ ৰান সংগ্ৰহ কৰিছিল । চলিত বিজয় হাজাৰে ট্ৰফীত তেওঁ দ্বিতীয় সৰ্বাধিক ৰান সংগ্ৰহকাৰী ।
কৰুণ নায়াৰ-
কৰ্ণাটকৰ বেটছমেন কৰুণ নায়াৰে আজি কেৰালাৰ বিৰুদ্ধে ১৩০ ৰানৰ অপৰাজিত ইনিংছ খেলে, যাৰ বাবে তেওঁ প্লেয়াৰ অৱ দ্য মেচৰ সন্মান লাভ কৰে । ইয়াৰ পূৰ্বে ঝাৰখণ্ডৰ বিৰুদ্ধে খেলখনত তেওঁ মাত্ৰ ২৯ ৰানহে কৰিছিল ।
দীপৰাজ গৌনকাৰ-
আজি হিমাচলৰ বিৰুদ্ধে গোৱাৰ অলৰাউণ্ডাৰ দীপৰাজ গৌনকাৰে ৭১ ৰান আৰু ৫টা উইকেট দখল কৰে । গোৱাই ৮ উইকেটত জয়লাভ কৰে আৰু দীপৰাজে প্লেয়াৰ অৱ দ্য মেচৰ বঁটা লাভ কৰে । ইয়াৰোপৰি ছত্তীশগড়ৰ বিৰুদ্ধে পূর্বৰ খেলখনত ৪টা উইকেট দখল কৰিছিল তেওঁ ৷ বৰ্তমান তেওঁ চলিত সংস্কৰণৰ বিজয় হাজাৰে ট্ৰফীৰ আগশাৰীৰ উইকেট দখলকাৰী ।
মহম্মদ ছামী-
আজি বিজয় হাজাৰে ট্ৰফীত বংগই বৰোদাৰ বিৰুদ্ধে খেলিছিল । প্ৰথমে বেটিং কৰি বংগই মাত্ৰ ২০৫ ৰানহে কৰিবলৈ সক্ষম হয় । লক্ষ্য সৰু আছিল যদিও মহম্মদ ছামীয়ে তৃতীয় অভাৰত এটা উইকেট দখল কৰি দলটোক ভাল আৰম্ভণি দিয়ে । তেওঁ মিতেশ পেটেলক ১১ ৰানত আউট কৰে যদিও তাৰ পাছত ছামীয়ে কোনো উইকেট ল’ব নোৱাৰিলে । তেওঁ ৯ অভাৰত ১/৪২ত নিজৰ স্পেলৰ অন্ত পেলায় ।
লগতে পঢ়ক : ২০২৫ বৰ্ষত আন্তঃৰাষ্ট্ৰীয় ক্ৰিকেটত এইসকল বেটছমেনে বিস্তাৰ কৰিলে আধিপত্য…