বাংলাদেশত শ্বেখ হাছিনা আৰু ইউনুছ সমৰ্থকৰ মাজত ৰক্তাক্ত সংঘৰ্ষ

বাংলাদেশৰ পৰিস্থিতি পুনৰ অৱনতি ঘটিবলৈ আৰম্ভ কৰিছে । বুধবাৰে গোপালগঞ্জ অঞ্চলত শ্বেখ হাছিনাৰ দল আৱামি লীগৰ ছাত্ৰ শাখা আৰু অন্তৱৰ্তীকালীন চৰকাৰৰ মুৰব্বী মহম্মদ ইউনুছৰ সমৰ্থকৰ মাজত ৰক্তাক্ত সংঘৰ্ষৰ সূত্ৰপাত হয় । এই ঘটনাত চাৰিজন লোকৰ মৃত্যু হোৱাৰ লগতে ডজনৰো অধিক লোক আহত হয় । পৰিস্থিতি নিয়ন্ত্ৰণৰ বাহিৰলৈ যোৱা দেখি সেনাই টেংকেৰে ৰাজপথত টহল দি অঞ্চলটোৰ দায়িত্ব লয় । উল্লেখ্য যে, বাংলাদেশৰ প্ৰতিষ্ঠাপক শ্বেখ মুজিবৰ ৰহমানৰ জন্মস্থান গোপালগঞ্জ ।

তথ্য অনুসৰি নেশ্যনেল চিটিজেন পাৰ্টিয়ে গোপালগঞ্জত এক সমাৱেশৰ আয়োজন কৰিছিল, য’ত পৰিস্থিতিয়ে হিংসাত্মক ৰূপ ধাৰণ কৰে । হিংসাত্মক পৰিস্থিতিৰ পিছতে অঞ্চলটোত জাৰি কৰা হৈছে কাৰ্ফিউ । আৰক্ষীৰ উপৰিও অৰ্ধসামৰিক বাহিনীও মোতায়েন কৰা হয় । ভাৰতত আশ্ৰয় লৈ থকা শ্বেখ হাছিনাৰ দল আৱামী লীগে ইউনুছ চৰকাৰে দুষ্কৃতিকাৰীৰ জৰিয়তে ৰক্তপাত কৰাৰ অভিযোগ উত্থাপন কৰিছে ।

গোপালগঞ্জৰ হিন্দু অধ্যুষিত অঞ্চলত সংঘটিত হিংসাত্মক ঘটনা সন্দৰ্ভত মহম্মদ ইউনুছ চৰকাৰে কঠোৰ স্থিতি গ্ৰহণ কৰিছে । হিংসাত্মক অঞ্চলটোত সান্ধ্য আইনৰ মাজতে অৰ্ধসামৰিক বাহিনী মোতায়েন কৰা হৈছে । ইউনুছ চৰকাৰে এই ৰক্তপাতৰ বাবে আৱামী লীগক দোষাৰোপ কৰিছে । আনহাতে শ্বেখ হাছিনাৰ সমৰ্থকসকলে কয় যে ইউনুছ চৰকাৰে দলীয় কৰ্মীক আক্ৰমণ কৰিছে ।

অভিযোগ অনুসৰি শ্বেখ হাছিনা দলৰ সমৰ্থকে এন চি পিৰ সমাৱেশত আক্ৰমণ চলাইছিল । আৱামী লীগৰ ছাত্ৰ শাখা বাংলাদেশ ছাত্ৰ লীগৰ বিৰুদ্ধে হিংসাত্মক পৰিস্থিতিৰ উচটনি দিয়াৰ অভিযোগ উত্থাপন হৈছে । ইয়াৰ পিছতে সংঘৰ্ষৰ সৃষ্টি হয় । মহম্মদ ইউনুছ চৰকাৰৰ বিৰুদ্ধে শ্বেখ হাছিনাৰ সমৰ্থকে বিক্ষোভ আৰম্ভ কৰে । আৰক্ষীৰ গুলীত নিহত হৈছে ৪ জন ।

লগতে পঢ়ক : সত্যজিৎ ৰায়ৰ বাংলাদেশস্থিত পূৰ্বপুৰুষৰ ঘৰ সংৰক্ষণৰ আহ্বান ভাৰত চৰকাৰৰ…

সত্যজিৎ ৰায়ৰ বাংলাদেশস্থিত পূৰ্বপুৰুষৰ ঘৰ সংৰক্ষণৰ আহ্বান ভাৰত চৰকাৰৰ

প্ৰখ্যাত চলচ্চিত্ৰ নিৰ্মাতা সত্যজিৎ ৰায়ৰ বাংলাদেশস্থিত পূৰ্বপুৰুষৰ ঘৰ ভাঙি পেলোৱাৰ প্ৰস্তুতিৰ মাজতে ভাৰত চৰকাৰে ইয়াক ৰক্ষা কৰাৰ উদ্যোগ লৈছে । পশ্চিম বংগৰ মুখ্যমন্ত্ৰী মমতা বেনাৰ্জীয়ে কৈছিল যে বাংলাদেশ প্ৰশাসনে ঢাকাত নিৰ্মিত এই ঘৰটো ভাঙি পেলাবলৈ সাজু হৈছে । এতিয়া কেন্দ্ৰীয় চৰকাৰে উদ্যোগ লৈ বাংলাদেশ চৰকাৰৰ সৈতে যোগাযোগ কৰি ঘৰটো মেৰামতি আৰু পুনৰ নিৰ্মাণৰ প্ৰস্তাৱ আগবঢ়াইছে ।

সত্যজিৎ ৰায়ৰ এই ঘৰটো ঢাকাৰ হৰিকিশোৰ ৰায় চৌধুৰী পথত অৱস্থিত । শতিকা পুৰণি এই ঘৰটো সত্যজিৎ ৰায়ৰ ককাদেউতাক প্ৰসিদ্ধ সাহিত্যিক উপেন্দ্ৰ কিশোৰ ৰায় চৌধুৰীৰ । এই পূৰ্বপুৰুষৰ ঘৰটো প্ৰায় এশ বছৰ পূৰ্বে নিৰ্মাণ কৰা হৈছিল । ১৯৪৭ চনৰ বিভাজনৰ পিছত এই সম্পত্তি চৰকাৰে দখল কৰে ।

ভাৰত চৰকাৰে বাংলাদেশ চৰকাৰক কৈছে যে এই ঘৰটোৰ ঐতিহাসিক গুৰুত্ব বিবেচনা কৰি এই ঘৰটো ভাঙি পেলোৱাৰ সিদ্ধান্ত পুনৰ বিবেচনা কৰাটো ভাল হ’ব । এই পুৰণি সম্পত্তিটো মেৰামতি কৰি সংগ্ৰহালয়লৈ ৰূপান্তৰিত কৰিব পাৰি । এনে কৰিলে ই ভাৰত আৰু বাংলাদেশৰ মাজত সাহিত্যৰ এক ভাগ-বতৰা প্ৰতীক হিচাপে প্ৰতিষ্ঠা হ’ব । এই কামত ভাৰত চৰকাৰে সহযোগ কৰিবলৈ ইচ্ছুক বুলি বিবৃতিটোত উল্লেখ কৰা হৈছে ।

ইয়াৰ পূৰ্বে পশ্চিমবংগৰ মুখ্যমন্ত্ৰী মমতা বেনাৰ্জীয়ে মহম্মদ ইউনুছৰ বাংলাদেশ চৰকাৰক সত্যজিৎ ৰায়ৰ পূৰ্বপুৰুষৰ সম্পত্তি সংৰক্ষণৰ বাবে পদক্ষেপ ল’বলৈ আহ্বান জনাইছিল । মমতাই ভাৰত চৰকাৰকো এই বিষয়ত হস্তক্ষেপ কৰিবলৈ অনুৰোধ জনাইছিল ।

সত্যজিত ৰায়ৰ ককাদেউতাক উপেন্দ্ৰ কিশোৰ ৰায় চৌধুৰীৰ এই পূৰ্বপুৰুষৰ ঘৰটো ভাঙি নতুন পকী গঠন নিৰ্মাণৰ পৰিকল্পনা কৰা হৈছে । পূৰ্বতে ইয়াক মিমনসিং শিশু একাডেমী হিচাপে ব্যৱহাৰ কৰা হৈছিল যদিও পিছত বছৰ বছৰ ধৰি কৰ্তৃপক্ষৰ অৱহেলাৰ পিছত উক্ত ঘৰটো জৰাজীৰ্ণ অৱস্থালৈ পৰিণত হৈছে ।

লগতে পঢ়ক : ‘মই কন্যা সন্তান বিচাৰিছো..’; তৃতীয়বাৰৰ বাবে মাতৃ হ’বলৈ ওলাইছে ৰিহানা