নেপালৰ পিছত এইবাৰ লণ্ডনত প্ৰতিবাদৰ জুই

নেপালৰ পিছত এতিয়া এইবাৰ লণ্ডনত প্ৰতিবাদৰ জুই । ব্ৰিটেইনৰ ইতিহাসৰ আটাইতকৈ ডাঙৰ প্ৰতিবাদ ১৩ ছেপ্টেম্বৰ দেওবাৰে চেণ্ট্ৰেল লণ্ডনত সংঘটিত হয় । অনুমান কৰা হৈছে যে “ইউনাইট দ্য কিংডম” ৰেলীৰ বাবে লণ্ডনৰ ৰাজপথত এক লাখৰো অধিক লোক সমবেত হৈছিল । অৱশ্যে এই প্ৰতিবাদত প্ৰায় ১০ লাখ লোকে অংশগ্ৰহণ কৰা বুলি একাংশ উদ্যোক্তাই দাবী কৰে । প্ৰায় ১০ লাখ লোকৰ সমাগম হ’ব বুলি কৰ্তৃপক্ষই আশা কৰিছিল আৰু সেই অনুসৰি প্ৰস্তুতি চলোৱা হৈছিল । প্ৰতিবাদৰ কিছু সময়ৰ ভিতৰতে ৰাজপথবোৰত জনতাৰ ভিৰ পৰিলক্ষিত হয় । এই প্ৰতিবাদী সমদলৰ নেতৃত্বত আছিল সুপৰিচিত কৰ্মী টমী ৰবিনছন ।

ইয়াক ব্ৰিটেইনৰ ইতিহাসৰ অন্যতম বৃহৎ ৰাজনৈতিক প্ৰতিবাদ বুলি অভিহিত কৰা হৈছে । এই সমাৱেশৰ আয়োজন কৰা হৈছিল মত প্ৰকাশৰ স্বাধীনতা আৰু চৰকাৰৰ প্ৰতি হতাশা, বিশেষকৈ অনুপ্ৰৱেশ আৰু চেঞ্চৰশ্বিপৰ বিষয়টোক লৈ । এই প্ৰতিবাদৰ নেতৃত্বত আছিল সুপৰিচিত কৰ্মী টমী ৰবিনছন । চৰকাৰৰ দ্বাৰা অৱহেলিত অনুভৱ কৰা লোকসকলেও এই সমাৱেশত অংশ লৈছিল ।

আৰক্ষীৰ মতে, এই সমাৱেশৰ সময়ত কেইবাজনো আৰক্ষী বিষয়াকো আক্ৰমণ কৰে প্ৰতিবাদকাৰীয়ে । এই সমাৱেশৰ আৰম্ভণি হৈছিল ‘Stand Up to Racism’ৰ প্ৰতিবাদেৰে, য’ত প্ৰায় ৫ হাজাৰ লোকে অংশগ্ৰহণ কৰিছিল । এই সময়ছোৱাত আৰক্ষীয়ে দিনটো কঠোৰ পৰিশ্ৰম কৰি হিংসাত্মক সংঘৰ্ষ ৰোধ কৰিব লগা হৈছিল । আৰক্ষীৰ ঘেৰাও ভাঙি প্ৰতিবাদ নিষিদ্ধ জ’নত সোমাবলৈ চেষ্টা কৰা প্ৰতিবাদকাৰীক বাধা দি থাকিল ।

টমী ৰবিনছনে এক্সত তেওঁৰ পোষ্টত লিখিছে যে আমি আমাৰ স্বাধীনতাৰ বাবে চেণ্ট্ৰেল লণ্ডনৰ ৰাজপথত একত্ৰিত হৈছো । ইয়াত লাখ লাখ লোকে যোগদান কৰিছে ।

টমী ৰবিনছনৰ নেতৃত্বত এই প্ৰতিবাদী সমদল আৰম্ভ হৈছিল ব্ৰিটেইনৰ অনুপ্ৰৱেশকাৰীৰ হোটেলৰ বাহিৰত । এই সময়ত প্ৰতিবাদকাৰীসকলে ইউনিয়ন জেক আৰু ৰঙা বগা ৰঙৰ ছেইণ্ট এণ্ড জৰ্জ ক্ৰছৰ পতাকা উৰুৱাই । এই সমাৱেশত বহু লোকে আমেৰিকা আৰু ইজৰাইলৰ পতাকাও উৰুৱাই থকা দেখা গৈছিল । এই সময়ত ৰেলীত জড়িত লোকসকলে ব্ৰিটিছ প্ৰধানমন্ত্ৰী কেইৰ ষ্টাৰমাৰৰ বিৰুদ্ধে শ্লোগান উত্থাপন কৰাৰ লগতে তেওঁৰ বিৰুদ্ধে ‘ঘৰলৈ পঠিয়াওক’ বুলি লিখা প্লেকাৰ্ডো দেখুৱাইছিল ।

লগতে পঢ়ক : নেপালত উদয় নতুন সূৰ্য্য!পৰিস্থিতি স্বাভাৱিক হোৱাৰ পিছত কাঠমাণ্ডুত প্ৰত্যাহাৰ কাৰ্ফিউ

তীব্ৰ প্ৰতিবাদৰ মাজতে নেপালৰ গৃহমন্ত্ৰী ৰমেশ লেখকৰ পদত্যাগ

ছ’চিয়েল মিডিয়া নিষেধাজ্ঞা আৰু দুৰ্নীতিৰ বিৰুদ্ধে হোৱা হিংসাত্মক প্ৰতিবাদত মৃত্যুৰ নৈতিক দায়িত্ব মূৰ পাতি নেপালৰ গৃহমন্ত্ৰী ৰমেশ লেখকে পদৰ পৰা পদত্যাগ কৰিছে । কেবিনেট বৈঠকৰ সময়ত তেওঁ পদত্যাগ পত্ৰ প্ৰধানমন্ত্ৰী কে পি শৰ্মা অলিক প্ৰদান কৰে । ৰমেশ লেখকে প্ৰতিবাদ দমন কৰিবলৈ নিৰাপত্তাৰক্ষীৰ বল প্ৰয়োগৰ ফলত হোৱা ২০ জনৰ মৃত্যুক ‘অকল্পনীয় ক্ষতি’ বুলি অভিহিত কৰি চৰকাৰে পৰিস্থিতি চম্ভালি লোৱা পদ্ধতিক ব্যাপক সমালোচনা কৰি পদৰ পৰা পদত্যাগ কৰাৰ সিদ্ধান্ত লয় ।

উল্লেখ্য যে নেপালৰ ৰাজধানী কাঠমাণ্ডুকে ধৰি বহু ডাঙৰ চহৰত চৰকাৰ বিৰোধী প্ৰতিবাদৰ সময়ত এতিয়ালৈকে ২০ জনতকৈ অধিক লোকৰ মৃত্যু হৈছে আৰু ২৫০ জনতকৈ অধিক লোক আহত হৈছে । নেপালত দুৰ্নীতি, নিবনুৱা সমস্যা আৰু ছ’চিয়েল মিডিয়া নিষেধাজ্ঞাৰ বিৰুদ্ধে ৰাজপথলৈ ওলাই আহিছে বৃহৎ সংখ্যক যুৱক-যুৱতী । তেওঁলোকৰ প্ৰতিবাদৰ নাম GEN-Z ৰিভল্যুচন ৰখা হৈছে । প্ৰতিবাদকাৰীক ছত্ৰভংগ দিবলৈ নিৰাপত্তা বাহিনীয়ে কন্দুৱা গেছ, পানীৰ কামান আৰু লাইভ-ফায়াৰিঙৰ আশ্ৰয় লয় ।

নেপালৰ গৃহমন্ত্ৰী ৰমেশ লেখকৰ পদত্যাগক অলি চৰকাৰৰ ওপৰত ক্ৰমবৰ্ধমান হেঁচা হ্ৰাস কৰাৰ প্ৰয়াস বুলি বিবেচিত হৈছে । নেপালী সংসদৰ অধ্যক্ষ শ্বেৰ বাহাদুৰ দেউবাই কেবিনেট বৈঠকত লেখকৰ প্ৰতি সহানুভূতি প্ৰকাশ কৰে যদিও নৈতিক ভিত্তিত নেপালৰ গৃহমন্ত্ৰী লেখকৰ পদত্যাগ মানি লয় । ইয়াৰ পূর্বে ৰাষ্ট্রীয় নিৰাপত্তা পৰিষদৰ বৈঠকত প্রধানমন্ত্রী কে পি শর্মা অলিয়ে হিংসাত্মক প্রতিবাদৰ বাবে দেশৰ আইন-শৃংখলা পৰিস্থিতিৰ বিষয়ে আলোচনা কৰে ৷ এই বৈঠকত বিত্তমন্ত্ৰী বিষ্ণু পৌডেল, বৈদেশিক মন্ত্ৰী অৰ্জুন ৰানা দেউবা আৰু সেনা প্ৰধান অশোক ৰাজ চিংডেলে অংশগ্ৰহণ কৰে । উল্লেখ্য যে ৰাজধানী কাঠমাণ্ডুত কাৰ্ফিউ বলবৎ হৈ আছে, আনহাতে বিদ্যালয়-মহাবিদ্যালয় দুদিন ধৰি বন্ধ হৈ আছে আৰু সকলো পৰীক্ষা পিছুৱাই দিয়া হৈছে ।

ইফালে প্ৰধানমন্ত্ৰীৰ পদত্যাগৰ দাবী তীব্ৰতৰ কৰি তুলিছে বিৰোধীয়ে । ৰাষ্ট্ৰীয় স্বতন্ত্ৰ পাৰ্টিয়ে প্ৰধানমন্ত্ৰী কে পি শৰ্মা অলিৰ পদত্যাগৰ দাবীত ৰাজনৈতিক হেঁচা বৃদ্ধি কৰিছে । এক আনুষ্ঠানিক বিবৃতিত আৰ এছ পিৰ সাধাৰণ সম্পাদক কবীন্দ্ৰ বুৰ্লাকোটিয়ে জেন-জেড প্ৰতিবাদকাৰীৰ ওপৰত চৰকাৰে গ্ৰহণ কৰা ‘নিষ্ঠুৰ কাৰ্যকলাপ’ক গৰিহণা দি দেশত নতুনকৈ ৰাষ্ট্ৰীয় নিৰ্বাচন অনুষ্ঠিত কৰাৰ দাবী জনায় । বৰ্তমান চৰকাৰৰ নৈতিক আৰু ৰাজনৈতিক বৈধতা হেৰুৱাইছে বুলিও তেওঁ কয় ।

লগতে পঢ়ক : নেপালত ZEN-Zৰ হিংসাত্মক প্ৰতিবাদ… ফেচবুক, ইনষ্টাগ্ৰাম, ইউটিউব খুলি দিয়াৰ দাবী

নেপালত ZEN-Zৰ হিংসাত্মক প্ৰতিবাদ

চৰকাৰী দুৰ্নীতি আৰু শেহতীয়াকৈ ছ’চিয়েল মিডিয়াৰ ওপৰত নিষেধাজ্ঞা আৰোপ কৰাৰ বিৰুদ্ধে নেপালত হিংসাত্মক প্ৰতিবাদ সংঘটিত হৈছে । ৰাজপথলৈ ওলাই আহি চৰকাৰ বিৰোধী হিংসাত্মক প্ৰতিবাদ সাব্যস্ত কৰে জেনেৰেচন জেড (ZEN-Z)এ । চৰকাৰৰ বিৰোধী শ্ল’গানেৰে উত্তপ্ত হৈ পৰিছ নেপাল । আনকি সংসদ ভৱনতো বহু প্ৰতিবাদকাৰী প্ৰৱেশ কৰে । নিৰাপত্তা বাহিনীয়ে প্ৰতিবাদকাৰীক বাধা দিবলৈ চেষ্টা কৰাত প্ৰতিবাদে হিংসাত্মক ৰূপ ধাৰণ কৰে ।

ইয়াৰ মাজতে নিৰাপত্তাৰক্ষীৰ ওপৰত শিলগুটি নিক্ষেপ কৰে প্ৰতিবাদকাৰীয়ে । পৰিস্থিতি নিয়ন্ত্ৰণৰ বাবে আৰক্ষীয়ে লাঠী চালনা কৰিবলগীয়া হয় । প্ৰতিবাদকাৰীলৈ কন্দুৱা গেছ নিক্ষেপ কৰে আৰক্ষীয়ে । পানীৰ গোলা ব্যৱহাৰ কৰাৰ লগতে কিছুমান ঠাইত গুলীচালনাও কৰা হয় । স্থানীয় সংবাদ মাধ্যমৰ বাতৰি অনুসৰি প্ৰতিবাদৰ সময়ত সংঘটিত হিংসাত্মক ঘটনাত ১৪ জন লোকৰ মৃত্যু হোৱাৰ বিপৰীতে ১০০ জনৰো অধিক লোক আহত হয় । কাঠমাণ্ডুৰ নতুন বানেশ্বৰ আৰু ঝাপা জিলাৰ দমকত পৰিস্থিতি আটাইতকৈ ভয়াৱহ হৈ পৰিছে ।

প্ৰকাশিত এক বাতৰি অনুসৰি নিউ বানেশ্বৰত হিংসাত্মক প্ৰতিবাদৰ সময়ত গুলীত আঘাতপ্ৰাপ্ত এজন প্ৰতিবাদকাৰীৰ অসামৰিক চিকিৎসালয়ত চিকিৎসা চলি থকা অৱস্থাতে মৃত্যু হয় । বহু আহত ব্যক্তিৰ পৰিচয় এতিয়াও জানিব পৰা হোৱা নাই । ডামাকত প্ৰতিবাদকাৰীয়ে দমক চ’কৰ পৰা পৌৰসভাৰ কাৰ্যালয়লৈ শোভাযাত্ৰা কৰি নেপালৰ প্ৰধানমন্ত্ৰী কে পি শৰ্মা অলীৰ প্ৰতিকৃতি দাহ কৰি কাৰ্যালয়ৰ গেট ভাঙিবলৈ চেষ্টা কৰে । পৰিস্থিতিৰ যাতে অধিক অৱনতি নঘটে তাৰ বাবে সেনাবাহিনী মোতায়েন কৰা হৈছে ।

আৰক্ষীৰ গুলীত আহত একাংশ-

নিউ বানেশ্বৰত হিংসাত্মক প্ৰতিবাদৰ সময়ত আৰক্ষীৰ গুলীচালনাতো একাংশ প্ৰতিবাদকাৰী আহত হৈছে । আহতসকলক চিকিৎসাৰ বাবে এভাৰেষ্ট হাস্পতাল, অসামৰিক চিকিৎসালয়ৰ লগতে কাষৰীয়া অন্যান্য চিকিৎসালয়লৈ লৈ যোৱা হৈছে ।

জানিব পৰা মতে সোমবাৰে পুৱা ৯ বজাৰ পৰা কাঠমাণ্ডুৰ মৈতিঘৰত প্ৰতিবাদকাৰীৰ সমাগম আৰম্ভ হয় । ‘নেপো কিড’ আৰু ‘নেপো বেবীজ’ৰ দৰে হেচটেগসমূহ যোৱা কিছুদিন ধৰি অনলাইনত ট্ৰেণ্ডিং হৈ আছে । চৰকাৰে পঞ্জীয়নবিহীন প্লেটফৰ্ম ব্লক কৰাৰ সিদ্ধান্তৰ পিছত এই ট্ৰেণ্ডে আৰু অধিক গতি লাভ কৰিছে । কাঠমাণ্ডু জিলা প্ৰশাসন কাৰ্যালয়ৰ তথ্য অনুসৰি ‘হামি নেপাল’এ এই সমাৱেশৰ আয়োজন কৰিছিল । ইয়াৰ বাবে পূৰ্বে অনুমতি লোৱা হৈছিল ।

চৰকাৰী ব্যৱস্থা আৰু দুৰ্নীতিৰ বিৰুদ্ধে প্ৰতিবাদ-

সংগঠনটোৰ অধ্যক্ষই কয় যে, চৰকাৰী ব্যৱস্থা আৰু দুৰ্নীতিৰ বিৰুদ্ধে এই প্ৰতিবাদ সাব্যস্ত কৰা হৈছে । সমগ্ৰ দেশতে একেধৰণৰ প্ৰতিবাদ হৈছে । লগতে ছাত্ৰ-ছাত্ৰীসকলক ইউনিফৰ্ম পৰিধান কৰি আৰু কিতাপ লৈ প্ৰতিবাদত যোগদান কৰিবলৈ আহ্বান জনায় তেওঁ ।

কিয় নিষিদ্ধ কৰা হ’ল ছ’চিয়েল মিডিয়া ?

চৰকাৰৰ তথ্য অনুসৰি নেপালৰ ছ’চিয়েল মিডিয়া কোম্পানীসমূহক পঞ্জীয়ন কৰিবলৈ ২৮ আগষ্টৰ পৰা ৭ দিনৰ সময় দিয়া হৈছিল । যোৱা বুধবাৰে যেতিয়া এই সময়সীমা শেষ হৈছিল, তেতিয়া কোনো এটা ডাঙৰ ছ’চিয়েল মিডিয়া প্লেটফৰ্মে- মেটা (ফেচবুক, ইনষ্টাগ্ৰাম, হোৱাটছএপ), আলফাবেট (ইউটিউব), এক্স (পূৰ্বতে টুইটাৰ), ৰেডিট আৰু লিংকডইনে পঞ্জীয়ন কৰা নাছিল । ইয়াৰ পিছত চৰকাৰে বৃহস্পতিবাৰৰ পৰা এই কোম্পানীসমূহ দেশত নিষিদ্ধ কৰে ।

ছচিয়েল মিডিয়া প্লেটফৰ্মত ঘৃণা বিয়পোৱাৰ অভিযোগ-

চৰকাৰে কয় যে ভুৱা আই ডি থকা ব্যৱহাৰকাৰীসকলে এই প্লেটফৰ্মসমূহ ব্যৱহাৰ কৰি ঘৃণা বিয়পাইছে, উৰাবাতৰি বিয়পাইছিল আৰু চাইবাৰ অপৰাধ সংঘটিত কৰিছিল । ইয়াৰ ফলত সমাজত অশান্তি আৰু অসামাজিক কাৰ্যকলাপ বাঢ়ি আহিছিল ।

লগতে পঢ়ক : নেপালৰ সংসদত প্ৰৱেশ Gen-Z প্ৰতিবাদকাৰী; ফেচবুক-এক্স-ইউটিউবৰ নিষেধাজ্ঞাক লৈ হুলস্থুল