কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে শেহতীয়াকৈ ভাৰতৰ শীৰ্ষ ৪ খন ৰাজ্যৰ নাম প্ৰকাশ কৰিছে য’ত সৰ্বাধিক পথ দুৰ্ঘটনা সংঘটিত হয় ।
শুকুৰবাৰে সংসদৰ শীতকালীন অধিৱেশনৰ সময়ত ভাষণ দি গাডকাৰীয়ে কয় যে প্ৰতি বছৰে পথ দুৰ্ঘটনাত ১,৭৮,০০০ লোকৰ মৃত্যু হয় আৰু ইয়াৰে ৬০ শতাংশ লোক ১৮-৩৪ বছৰ বয়সৰ ।
মন্ত্ৰীগৰাকীয়ে আলোকপাত কৰে যে তেওঁৰ কাৰ্যকালৰ আৰম্ভণিতে তেওঁ কৈছিল যে ২০২৪ চনৰ শেষৰ ফালে দুৰ্ঘটনা আৰু মৃত্যুৰ হাৰ ৫০ শতাংশ হ্ৰাস পাব । গাডকাৰীয়ে কয়, “দুৰ্ঘটনাৰ সংখ্যা হ্ৰাস কৰাৰ কথা পাহৰি যাওক, বৃদ্ধি হৈছে বুলি স্বীকাৰ কৰিবলৈ মোৰ কোনো দ্বিধা নাই । এইটো এটা ক্ষেত্ৰ য’ত আমাৰ বিভাগে সফলতা লাভ কৰা নাই ।”
গাডকাৰীয়ে প্ৰকাশ কৰিলে সৰ্বাধিক পথ দুৰ্ঘটনা সংঘটিত হোৱা ভাৰতৰ শীৰ্ষ ৰাজ্যসমূহঃ
উত্তৰ প্ৰদেশঃ ২৩,৬৫২
তামিলনাডুঃ ১৮,৩৪৭
মহাৰাষ্ট্ৰঃ ১৫,৩৬৬
মধ্যপ্ৰদেশঃ ১৩,৭৯৮
সংবাদ মাধ্যমৰ বাতৰি অনুসৰি তেওঁ কয় যে দিল্লী হৈছে আটাইতকৈ বেছি ক্ষতিগ্ৰস্ত চহৰ, য’ত ১৪৫৭ জনতকৈ অধিক লোকৰ মৃত্যু হৈছে । ইয়াৰ পিছত বেংগালুৰুত ৯১৫ জন আৰু জয়পুৰত ৮৫০ জন লোকৰ মৃত্যু হৈছে ।
গডকাৰীয়ে অসন্তুষ্টি প্ৰকাশ কৰি কয় যে পথ দুৰ্ঘটনাত ইমানবোৰ লোকৰ মৃত্যু হোৱাৰ পিছতো আইনৰ প্ৰতি কোনো ভয় নাই । প্ৰশ্ন ঘণ্টাৰ সময়ত তেওঁ এই অদ্ভুত পৰিস্থিতিৰ বৰ্ণনা কৰি কয় যে, “কিছু লোকে হেলমেট পৰিধান নকৰে, কিছুলোকে ৰেড ছিগনেল উলংঘা কৰে ।”
কেন্দ্ৰীয় মন্ত্ৰীগৰাকীয়ে কয় যে পথত ট্ৰাক পাৰ্কিং কৰাটো দুৰ্ঘটনাৰ এটা প্ৰধান কাৰণ আৰু বহু ট্ৰাকে লেন অনুশাসন মানি নচলে ।
ভাৰতত বাছৰ বডী নিৰ্মাণৰ ক্ষেত্ৰত আন্তঃৰাষ্ট্ৰীয় মানদণ্ড মানি চলিবলৈও তেওঁ বিষয়াসকলক নিৰ্দেশ দিছে । বাছৰ খিৰিকীৰ ওচৰত হাতুৰী থাকিব লাগে বুলি তেওঁ কয় । যাতে দুৰ্ঘটনা সংঘটিত হ’লে সহজে ভাঙিব পৰা যায় ।
তেওঁ আৰু কয় যে যেতিয়াই তেওঁ আন্তঃৰাষ্ট্ৰীয় সন্মিলনত অংশগ্ৰহণ কৰিবলৈ যায় তেতিয়াই তেওঁ ভাৰতৰ পথ সুৰক্ষা ব্যৱস্থাৰ কথা ক’বলৈ সংকোচ অনুভৱ কৰে । “মই মোৰ মুখখন লুকুৱাবলৈ চেষ্টা কৰো” গাডকাৰীয়ে কয় ।
মন্ত্ৰীগৰাকীয়ে কয় যে কেইবছৰমান পূৰ্বে তেওঁৰ আৰু তেওঁৰ পৰিয়ালৰ সৈতে এক বৃহৎ দুৰ্ঘটনা হৈছিল । মন্ত্ৰীজনে কয় যে তেওঁ বহুদিন চিকিৎসালয়ত ভৰ্তি হৈ থাকিব লগা হৈছিল । তেওঁ কয়, “ভগৱানৰ কৃপাত মই আৰু মোৰ পৰিয়ালে পৰিত্ৰাণ পালোঁ । গতিকে মোৰ ব্যক্তিগত অভিজ্ঞতা আছে দুৰ্ঘটনাৰ ।”
