জম্মু-কাশ্মীৰ আৰক্ষীয়ে পহলগাম আক্ৰমণৰ সৈতে জড়িত তিনিটা সন্দেহজনক সন্ত্ৰাসবাদীৰ স্কেচ্চ প্ৰকাশ কৰিছে । সন্দেহজনক এই সন্ত্ৰাসবাদী কেইটা আছিফ ফুজি, চুলেইমান শ্বাহ আৰু আবু তল্হা বুলি চিনাক্ত কৰা হৈছে ।

এই স্কেচবোৰ অঞ্চলটোত ব্যাপকৰূপত প্ৰচাৰ কৰা হৈছে যাতে মানুহে সন্দেহযুক্ত সন্ত্ৰাসবাদী কেইটাক চিনাক্ত কৰাত সহায় হয় । এই সন্দেহযুক্ত লোকসকলৰ আত্মগোপন আৰু যোগাযোগৰ তদন্তত এতিয়া ব্যস্ত হৈ পৰিছে তদন্তকাৰী সংস্থা । চোৰাংচোৱা সংস্থাৰ প্ৰাৰম্ভিক তদন্তত প্ৰকাশ পাইছে যে পহলগাম সন্ত্ৰাসবাদী আক্ৰমণৰ লগত জড়িত সন্ত্ৰাসবাদীয়ে পীৰ পাঞ্জল পাহাৰৰ পৰা ভাৰতত প্ৰৱেশ কৰাৰ পিছত ৰাজৌৰীৰ পৰা চত্ৰু, তাৰ পিছত ৱাধৱনৰ পৰা পহলগামলৈ যাত্ৰা কৰিছিল ।

এই অঞ্চলটো ৰিয়াছি আৰু উধমপুৰ জিলাৰ ওচৰত অৱস্থিত, য’ত গুজ্জৰ আৰু বাকৰৱাল জনগোষ্ঠীৰ বৃহৎ জনসংখ্যা আছে । সন্ত্ৰাসবাদীয়ে হয়তো এই পথটো বাছি লৈছিল যাতে সাধাৰণ মানুহৰ আৱৰণত গোপনে যাত্ৰা কৰিব পাৰে আৰু কোনেও সন্দেহ নকৰে ।

পৰ্যটনস্থলীত নিৰাপত্তা বৃদ্ধি-

বিশেষকৈ গুৰুত্বপূৰ্ণ পৰ্যটন স্থানসমূহত সমগ্ৰ উপত্যকাটোত নিৰাপত্তা অধিক শক্তিশালী কৰা হৈছে । শ্ৰীনগৰত অধিকাংশ দোকান, ইন্ধন কেন্দ্ৰ আৰু অন্যান্য বাণিজ্যিক প্ৰতিষ্ঠান বন্ধ হৈ আছে বুলি বিষয়াসকলে জানিবলৈ দিয়ে । সমগ্ৰ চহৰখনত কেৱল অত্যাৱশ্যকীয় সামগ্ৰী বিক্ৰী কৰা দোকানসমূহহে খোলা থাকে । ৰাজহুৱা পৰিবহণ বন্ধ যদিও ব্যক্তিগত বাহনসমূহ স্বাভাৱিকভাৱে চলি আছে । বিষয়াসকলে জনোৱা মতে, উপত্যকাটোত ব্যক্তিগত বিদ্যালয়সমূহ বন্ধ আছে যদিও চৰকাৰী বিদ্যালয়সমূহ খোলা আছে । এই বন্ধৰ প্ৰভাৱ উপত্যকাৰ অন্যান্য জিলা সদৰতো দেখা গৈছে ।

জম্মু-কাশ্মীৰৰ পহলগামত সন্ত্ৰাসবাদী আক্ৰমণৰ ২৪ ঘন্টাও পাৰ নহওতেই বাৰামুল্লাত অনুপ্ৰৱেশৰ চেষ্টা কৰে সন্ত্ৰাসবাদীয়ে । কিন্তু ভাৰতীয় সেনাই শীঘ্ৰেই ব্যৱস্থা গ্ৰহণ কৰি দুটাকৈ সন্ত্ৰাসবাদীক হত্যা কৰি অনুপ্ৰৱেশৰ চেষ্টা বিফল কৰে । ছ’চিয়েল মিডিয়া প্লেটফৰ্ম এক্সত এটা পোষ্টত ভাৰতীয় সেনাৰ চাইনাৰ কৰ্পছে কয় যে বাৰামুল্লাৰ অ’ পি টিক্কাত নিৰাপত্তা বাহিনী আৰু সন্ত্ৰাসবাদীৰ মাজত তীব্ৰ সংঘৰ্ষ হয় য’ত দুটা সন্ত্ৰাসবাদী নিহত হয় । চলি থকা অভিযানত নিৰাপত্তা বাহিনীয়ে অনুপ্ৰৱেশৰ চেষ্টা বিফল কৰিছে । সন্ত্ৰাসবাদীৰ পৰা বিপুল পৰিমাণৰ অস্ত্ৰ-শস্ত্ৰ, গুলী আৰু অন্যান্য সামগ্ৰী উদ্ধাৰ কৰা হৈছে । এতিয়াও অব্যাহত আছে সেনাৰ অভিযান ।

ইয়াৰ পূৰ্বে চিনাৰ কৰ্পছৰ এক্স হেণ্ডেলৰ পৰা খবৰ পোৱা গৈছিল যে বাৰামুল্লাৰ উৰি নল্লাৰ সাধাৰণ এলেকা চাৰ্জিৱানৰ মাজেৰে প্ৰায় ২-৩টা অচিনাক্ত সন্ত্ৰাসবাদীয়ে অনুপ্ৰৱেশৰ চেষ্টা কৰিছিল । কিন্তু নিয়ন্ত্ৰণ ৰেখাত থকা সতৰ্ক টি পি এছে প্ৰত্যাহ্বান জনাই এই প্ৰচেষ্টা ব্যৰ্থ কৰে । ইয়াৰ পিছত দুয়ো পক্ষৰ মাজত গুলীচালনা হয় । এতিয়া এটা নতুন টুইটত সেনাই এই হেণ্ডেলৰ জৰিয়তে জনাইছে যে এই গুলীচালনাত দুটা সন্ত্ৰাসবাদী নিহত হৈছে ।

উল্লেখযোগ্য যে পহলগাম আক্ৰমণৰ পিছৰে পৰা জম্মু অঞ্চলক হাই এলাৰ্টত ৰখা হৈছে । আক্ৰমণৰ লগে লগে ভাৰতীয় সেনাই সন্ত্রাসবাদীক বিচাৰি উলিয়াবলৈ আৰু নিঃশেষ কৰিবলৈ সক্ৰিয় হৈ পৰে । পৰ্যটকৰ ওপৰত কৰা নৃশংস আক্ৰমণৰ লগত জড়িত সন্ত্ৰাসবাদীৰ সন্ধান উলিয়াবলৈ অনন্তনাগৰ পহলগামৰ বৈশ্ৰণত যৌথ অনুসন্ধান অভিযান আৰম্ভ কৰা হৈছে ।

দক্ষিণ কাশ্মীৰৰ প্ৰধান পৰ্যটনস্থলী পহলগামত মঙলবাৰে সংঘটিত সন্ত্ৰাসবাদী আক্ৰমণত কেইবাজনো লোক নিহত হোৱাৰ লগতে কমেও ২০ জন আহত হয় । এই আক্ৰমণক গৰিহণা দি শোক প্ৰকাশ কৰিছে প্ৰধানমন্ত্ৰী মোদীয়ে । ছচিয়েল মিডিয়াত এটা পোষ্টত প্ৰধানমন্ত্ৰী মোদীয়ে লিখিছে- জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণক তীব্ৰ গৰিহণা দিছো । যিসকলে আপোনজনক হেৰুৱাইছে তেওঁলোকৰ প্ৰতি মোৰ সমবেদনা জ্ঞাপন কৰিলোঁ । আহত লোকসকল অতি সোনকালে আৰোগ্য লাভ কৰিবলৈ প্ৰাৰ্থনা জনাইছো । ক্ষতিগ্ৰস্ত লোকসকলক সকলো ধৰণৰ সহায় আগবঢ়োৱা হৈছে ।

কুৎসিত এজেণ্ডা কেতিয়াও সফল নহ’বঃ প্ৰধানমন্ত্ৰী মোদী

প্ৰধানমন্ত্ৰী মোদীয়ে আৰু লিখিছে– এই জঘন্য কাণ্ডৰ আঁৰত থকাসকলক ন্যায়ৰ কাঠগঢ়ালৈ অনা হ’ব… তেওঁলোকক ৰেহাই দিয়া নহ’ব ! তেওঁলোকৰ কুৎসিত এজেণ্ডা কেতিয়াও সফল নহ’ব । সন্ত্ৰাসবাদৰ বিৰুদ্ধে যুঁজিবলৈ আমাৰ সংকল্প অদম্য আৰু ই আৰু অধিক শক্তিশালী হৈ উঠিব ।

গৃহমন্ত্ৰীৰ পৰা ল’লে তথ্য, কাশ্মীৰ যাবলৈ দিলে নিৰ্দেশ-

ইয়াৰ পূৰ্বে প্ৰধানমন্ত্ৰী মোদীয়ে কেন্দ্ৰীয় গৃহমন্ত্ৰী অমিত শ্বাহৰ পৰা পহলগাম সন্ত্ৰাসবাদী আক্ৰমণ সন্দৰ্ভত তথ্য বিচাৰে । ইয়াৰ লগতে প্ৰধানমন্ত্ৰী মোদীয়ে গৃহমন্ত্ৰীক অতি শীঘ্ৰে জম্মু-কাশ্মীৰ ভ্ৰমণ কৰিবলৈ নিৰ্দেশ দিয়ে । প্ৰধানমন্ত্ৰী মোদীৰ সৈতে কথা পতাৰ অন্তত গৃহমন্ত্ৰী অমিত শ্বাহে এখন উচ্চ পৰ্যায়ৰ বৈঠক আহ্বান কৰে য’ত জম্মু-কাশ্মীৰৰ বহু উচ্চপদস্থ বিষয়াক ভিডিঅ’ কনফাৰেন্সিঙৰ জৰিয়তে সংযোগ কৰা হয় । তথ্য অনুসৰি এই বৈঠকৰ অন্তত গৃহমন্ত্ৰী অমিত শ্বাহ শ্ৰীনগৰলৈ ৰাওনা হৈছে ।