১১ জানুৱাৰীত অনুষ্ঠিত হ’ব ভাৰত-নিউজীলেণ্ডৰ মাজৰ এদিনীয়া শৃংখলাৰ প্ৰথমখন মেচ । এই শৃংখলাৰ বাবে শনিবাৰে ঘোষণা হ’ব পাৰে ভাৰতীয় দল ।

ভাৰতীয় ক্ৰিকেট দলৰ নতুন বছৰৰ প্ৰথম পৰীক্ষা হ’ব নিউজীলেণ্ডৰ বিৰুদ্ধে । ভাৰতীয় দলটোৱে ১১ জানুৱাৰীৰ পৰা কিৱি দলৰ বিৰুদ্ধে তিনিখন এদিনীয়া আৰু ৫খন টি-২০ মেচ খেলিব । ইতিমধ্যে টি-২০ শৃংখলাৰ বাবে ভাৰতীয় দল ঘোষণা কৰা হৈছে । ৩ জানুৱাৰী, শনিবাৰে ঘোষণা কৰা হ’ব পাৰে এদিনীয়া শৃংখলাৰ বাবে ভাৰতীয় দল ।

এদিনীয়া শৃংখলাত দলটোৰ অধিনায়ক হ’ব শুভমন গীল । শুভমনে আঘাতৰ বাবে দক্ষিণ আফ্ৰিকাৰ বিৰুদ্ধে এদিনীয়া শৃংখলাত অংশ ল’ব পৰা নাছিল, সেয়েহে কে এল ৰাহুলে অধিনায়কৰ দায়িত্ব লয় । সেই শৃংখলাত ভাৰতে ২-১ ব্যৱধানত জয়লাভ কৰে ।

ইফালে নিউজীলেণ্ডৰ বিৰুদ্ধে এদিনীয়া শৃংখলাৰ পূৰ্বে আটাইতকৈ ডাঙৰ প্ৰশ্নটো হ’ল উইকেটকীপাৰ-বেটছমেন ঋষভ পণ্ট এই শৃংখলাৰ অংশ হ’বনে নহয় ?  ঋষভ পণ্টে ৮ বছৰীয়া আন্তঃৰাষ্ট্ৰীয় কেৰিয়াৰত মাত্ৰ ৩১খন এদিনীয়া খেল খেলিছে । এই সময়ছোৱাত ৩৫তকৈ কম গড়ে তেওঁৰ প্ৰতিভাক সম্পূৰ্ণৰূপে প্ৰতিফলিত নকৰে যদিও ই নিশ্চিতভাৱে ইংগিত দিয়ে যে তেওঁক নিৰ্বাচকসকলে ধাৰাবাহিকভাৱে অৱজ্ঞা কৰি আহিছে । সম্ভৱ ঋষভক দলত অন্তৰ্ভুক্ত কৰা হ’ব বা তেওঁৰ ঠাইত ঈশান কিষানক অন্তৰ্ভুক্ত কৰা হ’ব পাৰে ।

দৌৰত ধ্ৰুৱ জুৰেলো-

ধ্ৰুৱ জুৰেলো উইকেটকীপাৰৰ স্থানৰ বাবে প্ৰৱল দাবীদাৰ । ঘৰুৱা ক্ৰিকেটত ঈশান কিষান আৰু ধ্ৰুৱ জুৰেলে আকৰ্ষণীয় প্ৰদৰ্শন আগবঢ়াইছে । কিষানে মিডল অৰ্ডাৰত উপযোগী ইনিংছ খেলিছে, আনহাতে জুৰেলৰ ডাঙৰ শতকেও তেওঁৰ দাবীক শক্তিশালী কৰি তুলিছে । কিন্তু প্ৰশ্নটো হ’ল যে শেহতীয়া ফৰ্মেই দলত স্থান লাভ কৰাৰ একমাত্ৰ মাপকাঠী হ’ব লাগে নেকি, নে হেঁচাত খেলিব পৰা ক্ষমতা, মেচৰ গতিপথ সলনি কৰাৰ ক্ষমতা, অভিজ্ঞতাকো সমানে বিবেচনা কৰা উচিত । এই পেৰামিটাৰবোৰৰ ওপৰত ঋষভ এতিয়াও আন বিকল্পতকৈ আগবাঢ়ি থকা যেন লাগে । ইফালে, শ্ৰেয়াছ আয়াৰে এতিয়াও ফিটনেছ টেষ্টত উত্তীৰ্ণ নোহোৱাৰ বাবে সুযোগ পোৱাৰ সম্ভাৱনা নাই । ভাৰতীয় নিৰ্বাচকসকলে মেচ ফিট খেলুৱৈক অন্তৰ্ভূক্ত কৰিবলৈ পছন্দ কৰিব ।

ফাষ্ট বলিং বিভাগ সন্দৰ্ভতো পৰিস্থিতি স্পষ্ট নহয় । টি-২০ বিশ্বকাপৰ কথা মনত ৰাখি হাৰ্দিক পাণ্ডিয়া আৰু যশপ্ৰীত বুমৰাহক এই এদিনীয়া শৃংখলাত জিৰণি দিয়া হ’ব যদিও তাৰ পিছত নিৰ্বাচকসকলৰ পৰিকল্পনা স্পষ্ট নহয় । হৰ্ষিত ৰাণা আৰু অৰ্শদীপ সিঙকো জিৰণি দিয়া হ’ব নেকি, নে এদিনীয়া দলত তেওঁলোকক সুযোগ দিয়া হ’ব সেয়া হ’ব লক্ষ্যণীয় । আনহাতে অভিজ্ঞ বেগী বলাৰ মহম্মদ চিৰাজ আৰু মহম্মদ ছামী এদিনীয়া শৃংখলাৰ বাবে দলত অন্তৰ্ভুক্ত হ’ব পাৰে । আই চি চি চেম্পিয়নছ ট্ৰফীৰ পিছত ছামী দলত অনুপস্থিত থকাৰ বিপৰীতে থকাৰ ছিৰাজে হোৱাইট বল ফৰ্মেটত বিশেষ সুযোগ লাভ কৰা নাই ।

নিউজীলেণ্ডৰ বিৰুদ্ধে এদিনীয়া শৃংখলাৰ বাবে সম্ভাৱ্য ভাৰতীয় দল-

শুভমন গীল (অধিনায়ক), ৰোহিত শৰ্মা, বিৰাট কোহলী, ৰুতুৰাজ গাইকোৱাদ, কে এল ৰাহুল (উইকেটকীপাৰ), ঈশান কিষাণ/ঋষভ পন্ট, অক্ষৰ পেটেল, ৱাশ্বিংটন সুন্দৰ, কুলদীপ যাদৱ, মহম্মদ ছামী, হৰ্ষিত ৰানা, প্ৰসিদ্ধ কৃষ্ণ, অৰ্শদ্বীপ সিং, যশস্বী জয়ছোৱাল আৰু নীতিশ কুমাৰ ৰেড্ডী ।

উল্লেখ্য যে, ভাৰত-নিউজীলেণ্ডৰ এদিনীয়া শৃংখলাৰ প্ৰথমখন মেচ বদোদৰাত ১১ জানুৱাৰীত অনুষ্ঠিত হ’ব ।

লগতে পঢ়ক : ক্ৰিকেট যুদ্ধত ২০২৬ত কেইবাৰ মুখামুখি হ’ব ভাৰত-পাকিস্তান ? জানক সকলো মেচৰ তাৰিখ

২০২৬ বৰ্ষত ক্ৰিকেট গ্ৰাওণ্ডত কেইবাবাৰো মুখামুখি হ’ব চিৰ প্ৰতিদ্বন্দ্বি ভাৰত-পাকিস্তান । জানক কেতিয়া কেতিয়া অনুষ্ঠিত হ’ব এই মেচসমূহ…

২০২৫ত ভাৰত আৰু পাকিস্তানৰ মাজত কেইবাখনো ক্ৰিকেট মেচ অনুষ্ঠিত হৈছিল । চেম্পিয়নছ ট্ৰফীৰ পৰা এছিয়া কাপ আৰু মহিলা এদিনীয়া বিশ্বকাপ ২০২৫লৈকে দুয়োটা দল মুখামুখি হৈছিল । এই মুখামুখিত প্ৰতিবাৰেই ভাৰতীয় দলে পাকিস্তানক পৰাস্ত কৰিছিল । ভাৰতীয় দলটোৱে পাকিস্তানক পৰাস্ত কৰি এছিয়া কাপ ২০২৫ খিতাপো লাভ কৰে । ২০২৬তো ভাৰত-পাকিস্তানৰ মাজত ক্ৰিকেট মেচ অনুষ্ঠিত হ’বনে ?  যদি দুয়োটা দলৰ মাজত এই বৰ্ষত মেচ অনুষ্ঠিত হয়  তেন্তে কিমানবাৰ মুখামুখি হ’ব ?  

উল্লেখ্য যে ভাৰত আৰু পাকিস্তানে এতিয়া কেৱল ডাঙৰ ডাঙৰ ইভেণ্টতহে মুখামুখি হয় । উত্তেজনাপূৰ্ণ ৰাজনৈতিক সম্পৰ্কৰ বাবে ভাৰত আৰু পাকিস্তানৰ মাজত দীৰ্ঘদিন ধৰি কোনো দ্বিপাক্ষিক শৃংখলা অনুষ্ঠিত হোৱা নাই ।

২০২৬ত কেইবাৰ মুখামুখি হ’ব ভাৰত-পাকিস্তান ?

১৯ বছৰ অনুৰ্ধ পুৰুষ ক্ৰিকেট বিশ্বকাপঃ ২০২৬ চনত কেইবাটাও ডাঙৰ ক্ৰিকেট ইভেণ্ট অনুষ্ঠিত হ’ব । ১৫ জানুৱাৰীৰ পৰা ৬ ফেব্ৰুৱাৰীলৈ অনুষ্ঠিত হ’ব ১৯ বছৰ অনুৰ্ধ পুৰুষ বিশ্বকাপ । ভাৰত আৰু পাকিস্তানক বেলেগ বেলেগ গ্ৰুপত স্থান দিয়া হৈছে, গতিকে ১৯ বছৰ অনুৰ্ধ বিশ্বকাপৰ নকআউট মেচত মুখামুখি হ’ব পাৰে দুয়োটা দল ।

পুৰুষৰ টি-২০ বিশ্বকাপঃ ৭ ফেব্ৰুৱাৰীৰ পৰা ৮ মাৰ্চলৈ পুৰুষৰ টি-২০ বিশ্বকাপ অনুষ্ঠিত হ’ব । নামিবিয়া, নেদাৰলেণ্ড আৰু আমেৰিকাৰ লগতে ভাৰত আৰু পাকিস্তানক গ্ৰুপ এত স্থান দিয়া হৈছে । এই বিশ্বকাপত ভাৰত-পাকিস্তানৰ খেলখন ১৫ ফেব্ৰুৱাৰীত অনুষ্ঠিত হ’ব । ইয়াৰ উপৰিও টি-২০ বিশ্বকাপৰ ছুপাৰ ৮ পৰ্যায় আৰু পৰৱৰ্তী নকআউট পৰ্যায়তো ভাৰত-পাকিস্তানৰ মেচৰ সম্ভাৱনা আছে ।

মহিলা টি-২০ বিশ্বকাপঃ অহা ১২ জুনৰ পৰা ৫ জুলাইলৈ অনুষ্ঠিত হ’ব মহিলা টি-২০ বিশ্বকাপ । ভাৰত আৰু পাকিস্তানকে ধৰি ছটা দলক গ্ৰুপ এত স্থান দিয়া হৈছে । ১৪ জুনত ভাৰত বনাম পাকিস্তান মহিলা ক্ৰিকেট দলৰ মাজত অনুষ্ঠিত হ’ব বিশ্বকাপৰ খেলখন ।

লগতে পঢ়ক : টি-২০ বিশ্বকাপৰ পৰা ইংলেণ্ড-নিউজীলেণ্ড ভ্ৰমণলৈ… ২০২৬ হ’ব ভাৰতীয় দলৰ বাবে অগ্নি পৰীক্ষা

২০২৬ বৰ্ষটো হ’ব ভাৰতীয় দলৰ বাবে এক উল্লেখযোগ্য বছৰ । এই বৰ্ষতে ডিফেণ্ডিং চেম্পিয়ন ভাৰতে টি-২০ বিশ্বকাপৰ খিতাপ ৰক্ষাৰ বাবে খেলপথাৰত নামিব ।

পুৰণিক বিদায় দি সমগ্ৰ বিশ্বই আদৰিলে এটা নতুন বছৰ । ২০২৬ বৰ্ষটো ভাৰতীয় ক্ৰিকেটৰ বাবে উল্লেখযোগ্য হ’বলৈ । এই বছৰটোৱে ভাৰতীয় ক্ৰিকেটৰ গতিপথ নিৰ্ধাৰণ কৰিব পাৰে । ২০২৬ বৰ্ষটো ভাৰতীয় পুৰুষ ক্ৰিকেট দলৰ বাবে এক অগ্নি পৰীক্ষা । কিয়নো এই বছৰৰ ৭ ফেব্ৰুৱাৰীৰ পৰা ৮ মাৰ্চলৈকে অনুষ্ঠিত হ’ব ভাৰত টি-২০ বিশ্বকাপ ২০২৬ । ভাৰত আৰু শ্ৰীলংকাই যৌথভাৱে অনুষ্ঠিত কৰিব এই প্ৰতিযোগিতা । ভাৰতীয় দলটোৱে এই প্ৰতিযোগিতাত ডিফেণ্ডিং চেম্পিয়ন হিচাপে প্ৰৱেশ কৰিব ।

বৰ্তমানলৈকে কোনো দলেই একেৰাহে দুবাৰকৈ টি-২০ বিশ্বকাপ জয় কৰা নাই । এইবাৰৰ টি-২০ বিশ্বকাপত এই ৰেকৰ্ড ভাঙিবলৈ খেলপথাৰত নামিব ভাৰতীয় দল । গ্ৰুপ পৰ্যায়ত ভাৰতে আমেৰিকা যুক্তৰাষ্ট্ৰ, নামিবিয়া, পাকিস্তান আৰু নেদাৰলেণ্ডৰ বিৰুদ্ধে খেলিব । এই অভিযানৰ নেতৃত্বত থাকিব ভাৰতীয় যুৱ দলৰ বাঘজৰী লাভ কৰা সূৰ্যকুমাৰ যাদৱ । ৰোহিত শৰ্মা বা বিৰাট কোহলীৰ অবিহনে এয়া হ’ব ভাৰতীয় দলৰ প্ৰথম টি-২০ বিশ্বকাপ । যদিহে সূৰ্যকুমাৰৰ নেতৃত্বত ভাৰতে খিতাপ জয় কৰিবলৈ সক্ষম হয়, তেন্তে সেয়া হ’ব ক্ৰিকেট ইতিহাসৰ অন্যতম বৃহৎ সফলতা ।

অনুমান কৰা হৈছে যে ২০২৬ৰ টি-২০ বিশ্বকাপ ভাৰতীয় অধিনায়ক হিচাপে সূৰ্যকুমাৰ যাদৱৰ অন্তিমখন প্ৰতিযোগিতা হ’ব পাৰে । বিশ্বকাপৰ পিছত নিৰ্বাচকসকলে পৰৱৰ্তী দীৰ্ঘম্যাদী অধিনায়ক নিৰ্বাচনৰ দিশত আগবাঢ়িব পাৰে । ৰোহিত শৰ্মা আৰু বিৰাট কোহলী টি-২০ ক্ৰিকেটৰ পৰা আঁতৰি গৈছে যদিও এদিনীয়া ফৰ্মেটত তেওঁলোকৰ দপদপনি অক্ষত আছে । ২০২৭ চনৰ এদিনীয়া বিশ্বকাপৰ প্ৰস্তুতিত এই দুগৰাকী জ্যেষ্ঠ খেলুৱৈৰ ভূমিকা গুৰুত্বপূৰ্ণ হ’ব । ভাৰত যদি সকলো ফৰ্মেটতে শীৰ্ষ প্ৰতিদ্বন্দ্বী হৈ থাকিব বিচাৰে তেন্তে এই প্ৰবীণ খেলুৱৈসকলৰ অৱদান অতি গুৰুত্বপূৰ্ণ হ’ব ।

ইফালে টি-২০ বিশ্বকাপ ২০২৬ স্কোৱাডৰ পৰা গীল বাদ পৰাটোৱে সকলোকে আচৰিত কৰি তোলে । এতিয়া সকলোৰে দৃষ্টি থাকিব ইণ্ডিয়ান প্ৰিমিয়াৰ লীগ (আই পি এল) ২০২৬ত তেওঁৰ প্ৰদৰ্শনৰ ওপৰত । যদি শুভমনে নিজৰ আঘাত আৰু দুৰ্বল ফৰ্মক অতিক্ৰমী শক্তিশালী প্ৰত্যাৱৰ্তন কৰে তেন্তে তেওঁ নিজকে ভাৰতৰ ভৱিষ্যতৰ অল ফৰ্মেটৰ খ্ৰিকেটাৰ হিচাপে পুনৰ প্ৰতিষ্ঠা কৰিব পাৰিব । ইফালে ভাৰতীয় দলটোৱে এইবাৰ শ্ৰীলংকা আৰু নিউজীলেণ্ড ভ্ৰমণো কৰিব, যি শৃংখলা অতি গুৰুত্বপূৰ্ণ হ’ব ।

২০২৬ চনৰ ভাৰতীয় পুৰুষ ক্ৰিকেট দলৰ সূচী-

নিউজীলেণ্ডৰ ভাৰত ভ্ৰমণ (জানুৱাৰী)

১১ জানুৱাৰী – প্ৰথম এদিনীয়া, বদোদৰা

১৪ জানুৱাৰী – দ্বিতীয় এদিনীয়া, ৰাজকোট

১৮ জানুৱাৰী – তৃতীয় এদিনীয়া, ইন্দোৰ

২১ জানুৱাৰী – প্ৰথম টি-২০, নাগপুৰ

২৩ জানুৱাৰী – দ্বিতীয় টি-২০, ৰায়পুৰ

২৫ জানুৱাৰী – তৃতীয় টি-২০, গুৱাহাটী

২৮ জানুৱাৰী – চতুৰ্থ টি-২০, বিশাখাপট্টনম

৩১ জানুৱাৰী – পঞ্চম টি-২০, তিৰুৱনন্তপুৰম

আই চি চি পুৰুষৰ টি-২০ বিশ্বকাপ

 ৭ ফেব্ৰুৱাৰীৰ পৰা ৮ মাৰ্চলৈ

আয়োজক – ভাৰত আৰু শ্ৰীলংকা

আফগানিস্তানৰ ভাৰত ভ্ৰমণ (জুন)

-১ খন টেষ্ট

-৩ খন এদিনীয়া

ইংলেণ্ড ভ্ৰমণ (জুলাই)

১ জুলাই – প্ৰথম টি২০, চেষ্টাৰ-লে-ষ্ট্ৰীট

-৪ জুলাই – দ্বিতীয় টি২০, মানচেষ্টাৰ

-৭ জুলাই – তৃতীয় টি২০, নটিংহাম

-৯ জুলাই – চতুৰ্থ টি২০, ব্রিষ্টল

-১১ জুলাই – পঞ্চম টি২০, চাউথমপটন

-১৪ জুলাই – প্ৰথম এদিনীয়া, বাৰ্মিংহাম

-১৬ জুলাই – দ্বিতীয় এদিনীয়া, কাৰ্ডিফ

-১৯ জুলাই – তৃতীয় এদিনীয়া, লৰ্ডছ

ভাৰতৰ শ্ৰীলংকা ভ্ৰমণ (আগষ্ট)

-২ খন টেষ্ট মেচ

ভাৰতৰ বাংলাদেশ ভ্ৰমণ (ছেপ্টেম্বৰ মাহত হোৱাৰ সম্ভাৱনা)

-৩ খন এদিনীয়া

-৩ খন টি২০

আফগানিস্তানৰ ভাৰত ভ্ৰমণ (নিৰপেক্ষ স্থান) |  

-ছেপ্টেম্বৰ-অক্টোবৰ

-৩ খন টি২০

ৱেষ্ট ইণ্ডিজৰ ভাৰত ভ্ৰমণ (ছেপ্টেম্বৰ-অক্টোবৰ)

-৩ খন এদিনীয়া

-৫ খন টি২০

এছিয়ান গেমছ ২০২৬

আয়োজক : জাপান

নিউজীলেণ্ডৰ ভাৰত ভ্ৰমণ (অক্টোবৰ-নৱেম্বৰ)

-২ খন টেষ্ট

-৩ খন এদিনীয়া

-৫ খন টি২০

শ্ৰীলংকাৰ ভাৰত ভ্ৰমণ (ডিচেম্বৰ)

-৩ খন এদিনীয়া

-৩ খন টি২০

ছিনিয়ৰ ক্ৰিকেটৰ উপৰিও বছৰৰ আৰম্ভণিতে আই চি চি পুৰুষৰ ১৯ বছৰ অনুৰ্ধ বিশ্বকাপ ২০২৬ অনুষ্ঠিত হোৱাৰ কথা । জিম্বাবুৱে আৰু নামিবিয়াই যৌথভাৱে আয়োজন কৰা এই প্ৰতিযোগিতাত ভাৰতীয় দলটোৱে ভাল প্ৰদৰ্শন কৰি খিতাপ দখল কৰাৰ লক্ষ্যৰে নামিব । বৈভৱ সূৰ্যবংশীৰ দৰে যুৱ বেটছমেনৰ ওপৰত তীক্ষ্ণ দৃষ্টি থাকিব । এই যুৱ খেলুৱৈসকলৰ প্ৰদৰ্শনে অনাগত বছৰবোৰত ভাৰতীয় ছিনিয়ৰ দলৰ আভাস দিব পাৰে ।

লগতে পঢ়ক : জয়েৰে বছৰৰ অন্ত পেলালে ভাৰতীয় দলে… শ্ৰীলংকাক ৫-০ত হোৱাইট ৱাশ্ব