কোচিং চেণ্টাৰটোত সংঘটিত হোৱা ভয়াৱহ অগ্নিকাণ্ডৰ ফলত থিতাতে ১৩ গৰাকীৰ মৃত্যু হয় । ইফালে প্ৰাণ ৰক্ষা কৰিবলৈ কেইবাগৰাকীও ছাত্ৰ-ছাত্ৰীয়ে প্ৰথম মহলাৰ খিৰিকীৰে তললৈ জঁপিয়াই দিয়ে ।

উত্তৰ প্ৰদেশৰ ৰাজধানী লক্ষ্ণৌত এক অতি দুঃখজনক আৰু ভয়াৱহ ঘটনা সংঘটিত হৈছে । সোমবাৰে লক্ষ্ণৌৰ আলীগঞ্জ অঞ্চলত অৱস্থিত এটা তিনিমহলীয়া ব্যৱসায়িক অট্টালিকাত হঠাতে অগ্নিকাণ্ডৰ ঘটনা সংঘটিত হয় । এই ভয়াৱহ অগ্নিকাণ্ডৰ ফলত অন্ততঃ ১৩ জন লোকৰ থিতাতে মৃত্যু হয় । মৃতসকলৰ বেছিভাগেই কোচিং চেণ্টাৰটোত এনিমেচনৰ প্ৰশিক্ষণ ল’বলৈ অহা ১৬-১৭ বছৰীয়া ছাত্ৰ-ছাত্ৰী বুলি জানিব পৰা গৈছে ।

প্ৰাণ ৰক্ষাৰ বাবে খিৰিকীৰে জপিয়ালে শিক্ষাৰ্থীয়ে

প্ৰত্যক্ষদৰ্শসকলে জনোৱা মতে, অট্টালিকাটোৰ ওপৰৰ মহলাত জুই লাগিছিল আৰু ই অতি কম সময়ৰ ভিতৰতে সমগ্ৰ এলেকাত বিয়পি পৰে । জুইৰ প্ৰকোপ ইমান বেছি আছিল যে অট্টালিকাটোৰ ভিতৰত কেইবাজনো লোক আবদ্ধ হৈ পৰে । ধোঁৱা আৰু জুইৰ পৰা পৰিত্ৰাণ পাবলৈ ৫ ৰ পৰা ৭ জন ছাত্ৰ-ছাত্ৰীয়ে প্ৰথম মহলাৰ খিৰিকী ভাঙি তললৈ জপিয়াই দিয়ে ।

ছচিয়েল মিডিয়াত ভাইৰেল হোৱা এটা ভিডিঅ’ত এজন ব্যক্তিয়ে অট্টালিকাৰ ভগা খিৰিকীৰে ওলাই দেৱালত ওলমি পলায়ন কৰিবলৈ চেষ্টা কৰা দেখা গৈছে, কিন্তু নিয়ন্ত্ৰণ হেৰুৱাই তেওঁ তলত পৰে । বৰ্তমান গুৰুতৰভাৱে আঘাতপ্ৰাপ্ত ছাত্ৰজন চিকিৎসাধীন হৈ আছে ।

ঘটনাস্থলীত উদ্ধাৰকাৰী দল আৰু উপ-মুখ্যমন্ত্ৰী

ঘটনাৰ খবৰ পোৱাৰ লগে লগে আৰক্ষী, অগ্নিনিৰ্বাপক বাহিনী আৰু এনডিআৰএফ (NDRF) ৰ দল ঘটনাস্থলীত উপস্থিত হৈ যুদ্ধকালীন তৎপৰতাৰে উদ্ধাৰ অভিযান চলায় । প্ৰায় এঘণ্টাতকৈও অধিক সময় চেষ্টা চলোৱাৰ পিছত জুই নিয়ন্ত্ৰণলৈ আহে ।

উদ্ধাৰ অভিযানৰ বুজ ল’বলৈ উপ-মুখ্যমন্ত্ৰী ব্ৰজেশ পাঠক ঘটনাস্থলীত উপস্থিত হয় । সংবাদ মাধ্যমৰ সন্মুখত তেওঁ কয়, “ভিতৰত প্ৰচুৰ পৰিমাণে কাঠৰ আচবাব থকাৰ বাবে ধোঁৱাৰ সৃষ্টি হৈছে আৰু দৃশ্যমানতা কম হৈ পৰিছে । প্ৰতিটো কোঠা পৰীক্ষা কৰা হৈছে । আহতসকলক কেজিএমচি ট্ৰমা চেণ্টাৰত ভৰ্তি কৰোৱা হৈছে । ঘটনাটোৰ এক উচ্চস্তৰীয় তদন্তৰ নিৰ্দেশ দিয়া হৈছে ।”

প্ৰধানমন্ত্ৰী মোদী আৰু মুখ্যমন্ত্ৰী যোগীৰ শোক প্ৰকাশ

এই মৰ্মান্তিক ঘটনাত গভীৰ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে । প্ৰধানমন্ত্ৰীৰ কাৰ্যালয়ে এক্স (X) ত এক পোষ্টৰ জৰিয়তে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে । ইয়াৰ লগতে প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা প্ৰতিগৰাকী মৃতকৰ নিকটাত্মীয়ক ২ লাখ টকা আৰু আহতসকললৈ ৫০,০০০ টকাৰ এককালীন সাহায্য ঘোষণা কৰে ।

অন্যহাতে, উত্তৰ প্ৰদেশৰ মুখ্যমন্ত্ৰী যোগী আদিত্যনাথেও এই ঘটনাত গভীৰ দুখ প্ৰকাশ কৰিছে । তেওঁ জিলা প্ৰশাসনৰ বিষয়াসকলক ক্ষতিগ্ৰস্ত পৰিয়ালসমূহৰ সৈতে পোনপটীয়া যোগাযোগ স্থাপন কৰিবলৈ আৰু আহতসকলক উপযুক্ত চিকিৎসাৰ লগতে সম্ভৱপৰ সকলো চৰকাৰী সহায় আগবঢ়াবলৈ কঠোৰ নিৰ্দেশ দিছে ।

লগতে পঢ়ক : সন্ধ্যা থিয়েটাৰৰ পদপৃষ্টৰ ঘটনা; আদালতত হাজিৰ হ’ব লাগিব অল্লু অৰ্জুন