সোমবাৰে পশ্চিম কাৰ্বি আংলঙৰ খেৰণিত সংঘটিত হয় উত্তেজনাময় পৰিস্থিতিৰ । একাংশ প্ৰতিবাদকাৰীয়ে মুখ্য কাৰ্যবাহী তুলিৰাম ৰংহাঙৰ বাসগৃহতো অগ্নিসংযোগ কৰে ।

পশ্চিম কাৰ্বি আংলঙৰ খেৰণিত সোমবাৰে বিয়লি অগ্নিগৰ্ভা পৰিস্থিতিৰ সৃষ্টি হয় । জিলাখনৰ ভিজিআৰ-পিজিআৰ মাটিত উচ্ছেদৰ দাবীত ধৰ্ণা কাৰ্যসূচী ৰূপায়ণ কৰি থকা দুই এজন প্ৰতিবাদকাৰীক আৰক্ষীয়ে আটক কৰাৰ পিছতে সংঘটিত এই উত্তেজনাময় পৰিস্থিতি । প্ৰতিবাদকাৰীয়ে অগ্নিসংযোগ আৰু হিংসাত্মক প্ৰতিবাদ কৰাৰ পিছতে পৰিস্থিতি অধিক উত্তেজনাময় হৈ পৰে । আৰক্ষীৰ সৈতে প্ৰত্যক্ষ সংঘাততো লিপ্ত হয় প্ৰতিবাদকাৰী ।

কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ ডনকামুকামত থকা পুৰণি বাসগৃহত প্ৰতিবাদকাৰীসকলে আৰক্ষীক শিলগুটি নিক্ষেপ কৰে । পৰিস্থিতি নিয়ন্ত্ৰণ কৰিবলৈ পিছলৈ আৰক্ষীয়ে গুলীচালনা কৰিবলৈ বাধ্য হয় । আৰক্ষীৰ গুলীচালনাত তিনিজনকৈ প্ৰতিবাদকাৰী আহত হোৱা বুলি জানিব পৰা গৈছে, যাৰ পিছতেই এই প্ৰতিবাদ অধিক হিংসাত্মক হৈ পৰে ।

উত্তেজিত প্ৰতিবাদকাৰীয়ে আৰক্ষীৰ সৈতে সংঘৰ্ষত লিপ্ত হোৱাৰ বিপৰীতে প্ৰতিবাদকাৰীৰ একাংশই ডনকামুকামত থকা কাৰ্বি আংলং স্বায়ত্ব শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ পুৰণি বাসগৃহত শিলগুটি নিক্ষেপ কৰাৰ উপৰিও অগ্নিসংযোগ কৰে ।

ঘটনাস্থলীত অতিৰিক্ত আৰক্ষীৰ দল ততাতৈয়াকৈ উপস্থি হৈ পৰিস্থিতি নিয়ন্ত্ৰণলৈ অনাৰ প্ৰচেষ্টা অব্যাহত ৰাখিছে । ইফালে শিক্ষামন্ত্ৰী ডাঃ ৰানোজ পেগুৱে মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্দেশত পশ্চিম কাৰ্বি আংলঙত ততাতৈয়াকৈ উপস্থিত হৈ পৰিস্থিতি স্বাভাৱিক অৱস্থা ঘূৰাই অনাৰ প্ৰচেষ্টা নিৰীক্ষণ কৰিছে ।

লগতে পঢ়ক : বাংলাদেশ হিংসাৰ মাজতে অসমত বৃদ্ধি সতৰ্কতা… চোকা দৃষ্টি ৰাখিছে ৰাজ্য চৰকাৰে- মুখ্যমন্ত্ৰী