আন এক অভিলেখ গঢ়িবলৈ সাজু ইছৰো

ভাৰতীয় মহাকাশ গৱেষণা সংস্থা চমুকৈ ইছৰোৱে দেওবাৰে ৪৪১০ কিলোগ্ৰাম ওজনৰ উপগ্ৰহ CMS-03 উৎক্ষেপণ কৰাৰ বাবে সাজু হৈছে । এই উপগ্ৰহটোৱেই হ’ব ভাৰতৰ পৰা এতিয়ালৈকে উৎক্ষেপণ কৰা আটাইতকৈ গধুৰ উপগ্ৰহ । ইয়াক ইছৰোৰ শক্তিশালী ৰকেট এল ভি এম ৩-এম৫ৰ দ্বাৰা পৃথিৱীৰ জিঅ’চিনক্ৰ’নাছ ট্ৰেন্সফাৰ কক্ষপথলৈ প্ৰেৰণ কৰা হ’ব । CMS-03 যোগাযোগ উপগ্ৰহটোৱে ভাৰতৰ উচ্চ ক্ষমতাসম্পন্ন মহাকাশ যোগাযোগৰ ক্ষেত্ৰত এক নতুন গতি প্ৰদান কৰাৰ লগতে সামুদ্ৰিক অঞ্চলত ডিজিটেল কভাৰেজ আৰু যোগাযোগ সেৱা শক্তিশালী কৰিব ।

 এই উপগ্ৰহটো অন্ধ্ৰ প্ৰদেশৰ শ্ৰীহৰিকোটাৰ পৰা উৎক্ষেপণ কৰা হ’ব । ভাৰতীয় মহাকাশ গৱেষণা সমস্থাই কয় যে উপগ্ৰহটোক উৎক্ষেপণ ৰকেটৰ সৈতে সংযুক্ত কৰা হৈছে, উৎক্ষেপণ পেডত স্থাপন কৰা হৈছে আৰু উৎক্ষেপণৰ কাউণ্টডাউন আৰম্ভ হৈছে । ২ নৱেম্বৰৰ সন্ধিয়া প্ৰায় ৫:২৬ বজাত এই উৎক্ষেপণ হ’ব । এই উপগ্ৰহটো উৎক্ষেপণ কৰিবলগীয়া এল এম ভি ৩ ৰকেট হৈছে ইছৰোৰ আটাইতকৈ শক্তিশালী ৰকেট ।

এই ৰকেটে ৪০০০ কিলোগ্ৰাম ওজনৰ পেলোড মহাকাশলৈ নিক্ষেপ কৰিব পাৰে । ইয়াৰ পূৰ্বে ইছৰোৱে ২০১৮ চনৰ ৫ ডিচেম্বৰত নিজৰ গধুৰ উপগ্ৰহ GSAT-11 উৎক্ষেপণ কৰিছিল যদিও সেই উৎক্ষেপণ ভাৰতৰ পৰা নহয়, ফ্ৰেন্স গিয়ানাৰ কৌৰৌ উৎক্ষেপণ ঘাটিৰ পৰা হৈছিল । GSAT-11 ৰ মুঠ ওজন আছিল ৫,৮৫৪ কিলোগ্ৰাম । এতিয়া ইছৰোৱে ভাৰতৰ মাটিৰ পৰা নিজৰ আটাইতকৈ গধুৰ উপগ্ৰহ CMS-03 উৎক্ষেপণ কৰিবলৈ সাজু হৈছে ।

কিয় বিশেষ এই উপগ্ৰহ ?

CMS-03 উপগ্ৰহৰ জৰিয়তে দেশৰ ডিজিটেল যোগাযোগ, উপগ্ৰহ ইণ্টাৰনেট আৰু সামুদ্ৰিক সংযোগ শক্তিশালী হ’ব । এই উপগ্ৰহ ভাৰতৰ ৰাষ্ট্ৰীয় যোগাযোগ আন্তঃগাঁথনিৰ ক্ষেত্ৰত এক ডাঙৰ পদক্ষেপ হিচাপে চিহ্নিত হৈছে, টেলিভিছন সম্প্ৰচাৰ, টেলিমেডিচিন, অনলাইন শিক্ষা, দুৰ্যোগ ব্যৱস্থাপনা আৰু জৰুৰীকালীন যোগাযোগ সেৱাৰ সুবিধা উন্নত কৰিছে । এই অভিযানে ভাৰতক ভৱিষ্যতৰ উপগ্ৰহ নক্ষত্ৰমণ্ডল আৰু গভীৰ সাগৰীয় যোগাযোগৰ দিশত আগুৱাই নিব ।

লগতে পঢ়ক : কাউণ্টডাউন আৰম্ভ: ২ নৱেম্বৰত উৎক্ষেপণৰ বাবে সাজু CMS-03 উপগ্ৰহ

২০২৭ চনৰ প্ৰথমাৰ্ধতে মহাকাশলৈ গগণযান অভিযান

ভাৰতৰ অভিলাষী গগণযান অভিযানৰ প্ৰস্তুতি দ্ৰুতগতিত আগবাঢ়িছে । ইছৰোৰ মুৰব্বী ভি নাৰায়ণনে কয় যে গগণযান হৈছে ভাৰতৰ প্ৰথম মানৱ মহাকাশ অভিযান আৰু ইয়াৰ বাবে বহু জটিল প্ৰযুক্তি বিকশিত কৰিবলগীয়া হৈছিল । তেওঁ কয়, “গগণযান অভিযান অতি ভালদৰে আগবাঢ়িছে । এই অভিযানৰ বাবে ৰকেটটো মানুহৰ উৰণৰ বাবে উপযোগী কৰি তুলিব লগা হৈছে, কক্ষপথৰ মডিউল প্ৰস্তুত কৰিব লগা হৈছে আৰু পৰিৱেশ নিয়ন্ত্ৰণ আৰু সুৰক্ষা ব্যৱস্থা গঢ়ি তুলিব লগা হৈছে । ইয়াৰ উপৰিও ক্ৰু এস্কেপ চিষ্টেম, পেৰাচুট ব্যৱস্থা আৰু অন্যান্য মানৱ সম্পৰ্কীয় প্ৰযুক্তিও বিকশিত কৰা হৈছে ।”

ইছৰোৰ মুৰব্বীগৰাকীয়ে কয় যে তিনিটা ক্ৰুবিহীন মিছন সম্পূৰ্ণ হ’বলগীয়া আছে । এই অভিযান সফল হোৱাৰ পিছতহে মহাকাশচাৰী প্ৰেৰণ কৰা হ’ব । তেওঁ লগতে কয় যে প্ৰথমটো ক্ৰুবিহীন অভিযানত “ব্যোমমিত্ৰ” নামৰ এটা মানৱৰূপী ৰবট জড়িত থাকিব । তেওঁ কয় যে ২০২৭ চনৰ আৰম্ভণিতে আমি মানৱ অভিযান আৰম্ভ কৰাৰ লক্ষ্য লৈছো ।

উল্লেখ্য যে ২০২৫ চনৰ ২৪ আগষ্টত ইছৰোৱে গগণযান কাৰ্যসূচীৰ অধীনত প্ৰথমটো ইন্টিগ্ৰেটেড এয়াৰ ড্ৰপ পৰীক্ষা সফলতাৰে সম্পূৰ্ণ কৰিছিল । এই পৰীক্ষা শ্ৰীহৰিকোটাৰ সতীশ ধাৱান মহাকাশ কেন্দ্ৰৰ পৰা কৰা হৈছিল ।

এই পৰীক্ষাত মহাকাশযানখনে পৃথিৱীত অৱতৰণ কৰিলে নটা পেৰাচুটে কেনেকৈ একেলগে কাম কৰিব সেয়া পৰীক্ষা কৰিছিল, যাৰ ফলত ক্ৰু মডিউলটো সাগৰত নিৰাপদে অৱতৰণ কৰাটো নিশ্চিত কৰা হৈছিল ।

লগতে পঢ়ক : এছ-৪০০ এয়াৰ ডিফেন্স চিষ্টেমৰ বাবে ভাৰতে ৰাছিয়াৰ পৰা শীঘ্ৰেই ক্ৰয় কৰিব বৃহৎ সংখ্যক ক্ষেপণাস্ত্ৰ