গুজৰাটৰ আহমেদাবাদৰ চান্দোলা অঞ্চলত চলি থকা দ্বিতীয় পৰ্যায়ৰ বেদখল বিৰোধী অভিযান আজি দ্বিতীয় দিনৰ বাবে অব্যাহত আছে । এই অভিযানত প্ৰশাসনে বৃহৎ পৰিসৰত অবৈধ নিৰ্মাণসমূহ আঁতৰাইছে । উল্লেখ্য যে মুঠ ২.৫ লাখ বৰ্গমিটাৰতকৈ অধিক ভূমি বেদখলৰ পৰা মুক্ত কৰিবলৈ এই অভিযান চলোৱা হৈছে । ইয়াৰ পৰিপ্ৰেক্ষিতত কেইবাখনো বুলডজাৰ আৰু ৩০০০ৰো অধিক আৰক্ষী জোৱান এই স্থানত নিয়োগ কৰা হৈছে ।

‘এতিয়ালৈকে ৯৯.৯% কাম সম্পূৰ্ণ হৈছে’

বিষয়টোৰ তথ্য দি প্ৰশাসনে কয় যে কালিৰে পৰা চান্দোলা অঞ্চলত দ্বিতীয় পৰ্যায়ৰ অভিযান আৰম্ভ হৈছে । ইয়াৰ পিছত এতিয়ালৈকে ৯৯.৯ শতাংশ ভঙাৰ কাম সম্পূৰ্ণ হৈছে । এতিয়া কিছুমান ধৰ্মীয় গাঁথনি আঁতৰোৱা হৈছে । উৰাবাতৰিত বিশ্বাস নকৰিবলৈ জনসাধাৰণক আহ্বান জনাইছে জে চি পি য়ে । লগতে প্ৰশাসনে সম্পূৰ্ণ স্বচ্ছতাৰে আৰু আইনৰ পৰিসৰৰ ভিতৰত কাম কৰি আছে বুলি জানিবলৈ দিয়ে ।

অভিযান শান্তিপূৰ্ণভাৱে চলি আছে-

ইয়াৰ সমান্তৰালকৈ প্ৰশাসনে কয় যে কোনো ধৰণৰ হিংসা নোহোৱাকৈ এই কাৰ্য শান্তিপূৰ্ণভাৱে চলি আছে । লগতে প্ৰশাসনে স্থানীয় ৰাইজক সহযোগিতা বিচাৰি আবেদন জনাইছে । এই অভিযানৰ উদ্দেশ্য হৈছে মহানগৰীৰ চৰকাৰী ভূমি অবৈধ বেদখলৰ পৰা মুক্ত কৰি ইয়াৰ সঠিক ব্যৱহাৰ সুনিশ্চিত কৰা ।

ৰাজকোটতো ভাঙি পেলোৱা হয় অবৈধ সম্পত্তি-

উল্লেখ্য যে ইয়াৰ পূৰ্বে ৰাজকোট চহৰত গুৰুতৰ অপৰাধৰ বাবে পঞ্জীয়নভুক্ত অভ্যাসগত অপৰাধীৰ ৬০টাতকৈও অধিক অবৈধ নিৰ্মাণ ভাঙি পেলোৱা হৈছিল । আৰক্ষীয়ে জনোৱা মতে, সোমবাৰে মহানগৰ আৰক্ষী, ৰাজকোট পৌৰ নিগম আৰু ৰাজহ বিষয়াৰ কাৰ্যালয়ৰ যৌথ দলে ৰাইয়া গাম আৰু ৰৈয়া ধৰ অঞ্চলত উচ্ছেদ অভিযান চলায় । এই অঞ্চলসমূহ গান্ধীগ্ৰাম-২ থানাৰ সীমাৰ অন্তৰ্গত ।

চান্দোলা হ্ৰদ অঞ্চলৰ সমীপত নিৰ্মিত বস্তিসমূহ ভাঙি পেলোৱাৰ বাবে বুলডজাৰ অভিযান অব্যাহত ৰাখিছে আহমেদাবাদ পৌৰ নিগম আৰু আৰক্ষীয়ে । কিছুদিন পূৰ্বে অবৈধভাৱে ভাৰতত প্ৰৱেশ কৰা বাংলাদেশীসমূহক এই অঞ্চলৰ পৰা গ্ৰেপ্তাৰ কৰা হয় ।

আৰক্ষী আয়ুক্ত জি.এছ মালিকে কয়, আহমেদাবাদ পৌৰ নিগমৰ নেতৃত্বত এই অভিযান চলোৱা হৈছে । আইন-শৃংখলা বজাই ৰখাৰ বাবে যুটীয়া আৰক্ষী আয়ুক্ত শৰদ সিংঘলৰ নেতৃত্বত প্ৰায় ২০০০ আৰক্ষী জোৱান নিয়োগ কৰা হৈছে । এই অভিযান পৰিদৰ্শন কৰিবলৈ অহা মালিকে সাংবাদিকৰ সৈতে হোৱা কথা-বতৰাত কয় যে চাণ্ডোলা হ্ৰদত ভাঙি পেলোৱাৰ অভিযান চলি থকাৰ বাবে মহানগৰীৰ সকলো থানাক সতৰ্ক কৰি দিয়া হৈছে । এইটো মুছলমান সংখ্যাগৰিষ্ঠ অঞ্চল ।

২০১৯ বৰ্ষতো চলিছিল অভিযান-

ইফালে, শৰদ সিংঘালে কয় যে আহমেদাবাদ পৌৰ নিগমে পুৱাৰ পৰাই এই অভিযান আৰম্ভ কৰিছে, য’ত পঞ্চাশটা দল নিয়োগ কৰা হৈছে আৰু প্ৰতিটো দলৰ জে চি বি আছে । চান্দোলা হ্ৰদ অঞ্চলত শেষবাৰৰ বাবে উচ্ছেদ অভিযান ২০১৯ চনতো কৰা হৈছিল বুলিও তেওঁ কয় । শেহতীয়াকৈ আহমেদাবাদ পৌৰ নিগমে কৰা এক সমীক্ষাত প্ৰকাশ পাইছে যে চৰকাৰী মাটি পুনৰ বেদখল কৰি হ্ৰদৰ চাৰিওফালে জুপুৰি নিৰ্মাণ কৰা হৈছে । এই অঞ্চলসমূহত অবৈধ বাংলাদেশীয়ে বাস কৰি আহিছিল ।

মাষ্টাৰমাইণ্ড মাহমুদ পাঠানৰ বিৰুদ্ধে ব্যৱস্থা গ্ৰহণৰ প্ৰস্তুতি-

আৰক্ষী আয়ুক্ত মালিকে কয় যে চান্দোলা হ্ৰদৰ সমীপৰ চৰকাৰী ভূমি বেদখলৰ মাষ্টাৰমাইণ্ড মাহমুদ পাঠান ওৰফে বিলু বিহাৰীৰ বিৰুদ্ধে এফ আই আৰ ৰুজু কৰা হৈছে । তেওঁ অবৈধভাৱে প্ৰৱেশ কৰা বাংলাদেশী প্ৰব্ৰজনকাৰীক ভাড়াত ঘৰ আৰু আধাৰ কাৰ্ড বনাবলৈ সহায় কৰিছিল ।

নিয়োগ কৰা হৈছে ২০০০ আৰক্ষী-

চান্দোলা হ্ৰদৰ সমীপৰ ছিয়াসতনগৰ আৰু বাঙালী ভাছৰ দৰে অঞ্চলত অবৈধ নিৰ্মাণ কাৰ্য ভাঙি পেলোৱাত আহমেদাবাদ পৌৰ নিগমক সহায় কৰিবলৈ ২০০০ আৰক্ষী আৰু ৰাজ্যিক সংৰক্ষিত আৰক্ষীৰ ২০টা কোম্পানী নিয়োগ কৰা হৈছে । সমগ্ৰ মহানগৰীৰ আৰক্ষীক সতৰ্ক কৰি দিয়া হৈছে । কোনোবাই যদি আইন নিজৰ হাতত ল’বলৈ চেষ্টা কৰে তেন্তে তেওঁৰ বিৰুদ্ধে কঠোৰ ব্যৱস্থা গ্ৰহণ কৰা হ’ব । তেওঁ কয় যে হ্ৰদৰ কাষত বসবাস কৰা সংখ্যালঘু জনগোষ্ঠীৰ লোকসকলেও অবৈধ বাংলাদেশী অনুপ্ৰৱেশকাৰীৰ বিৰুদ্ধে ব্যৱস্থা গ্ৰহণ কৰাটো বিচাৰে । মালিকে কয় যে হ্ৰদৰ পাৰত নিৰ্মিত পাঠানৰ অবৈধ ফাৰ্ম হাউচটোও কৰ্তৃপক্ষই ভাঙি পেলায় ।