আমেৰিকাৰ ৰাষ্ট্ৰপতি ডোনাল্ড ট্ৰাম্পৰ হৈ প্ৰধানমন্ত্ৰী মোদীক হোৱাইট হাউচ ভ্ৰমণ কৰাৰ বাবে এক আনুষ্ঠানিক আমন্ত্ৰণ পত্ৰ প্ৰদান কৰে

চাৰিদিনীয়া কাৰ্যসূচীৰে ভাৰত ভ্ৰমণলৈ অহা আমেৰিকা যুক্তৰাষ্ট্ৰৰ বৈদেশিক পৰিক্ৰমা মন্ত্ৰী মাৰ্কো ৰুবিঅ’ই শনিবাৰে প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । এই গুৰুত্বপূৰ্ণ বৈঠকত মন্ত্ৰী ৰুবিঅ’ই আমেৰিকাৰ ৰাষ্ট্ৰপতি ডোনাল্ড ট্ৰাম্পৰ হৈ প্ৰধানমন্ত্ৰী মোদীক হোৱাইট হাউচ ভ্ৰমণ কৰাৰ বাবে এক আনুষ্ঠানিক আমন্ত্ৰণ পত্ৰ প্ৰদান কৰে । ভাৰতত নিযুক্ত আমেৰিকাৰ ৰাষ্ট্ৰদূত চাৰ্জিঅ’ গৰে ছ’চিয়েল মিডিয়া প্লেটফৰ্ম এক্স (X)-ত এই কথা নিশ্চিত কৰি বৈঠকখনক অত্যন্ত “ফলপ্ৰসূ” বুলি অভিহিত কৰে ।

প্ৰধানমন্ত্ৰীৰ কাৰ্যালয়ৰ পৰা প্ৰকাশিত এক বিবৃতিত জনোৱা হৈছে যে বৈঠককালত দুই নেতাৰ মাজত প্ৰতিৰক্ষা, কৌশলগত প্ৰযুক্তি, বাণিজ্য আৰু বিনিয়োগ, শক্তি সুৰক্ষা, সংযোগ, শিক্ষা আৰু জনসাধাৰণৰ মাজৰ পাৰস্পৰিক সম্পৰ্ককে ধৰি কেইবাটাও গুৰুত্বপূৰ্ণ ক্ষেত্ৰত দ্বিপাক্ষিক সহযোগিতাৰ ধাৰাবাহিক প্ৰগতিৰ বিষয়ে আলোচনা হয় । ইয়াৰ উপৰিও, আমেৰিকাৰ বৈদেশিক মন্ত্ৰীগৰাকীয়ে পশ্চিম এছিয়াৰ সাম্প্ৰতিক পৰিস্থিতি সহ বিভিন্ন আঞ্চলিক আৰু গোলকীয় বিষয়ত ৱাশ্বিংটনৰ দৃষ্টিভংগী প্ৰধানমন্ত্ৰী মোদীৰ সন্মুখত ডাঙি ধৰে ।

প্ৰত্যুত্তৰত প্ৰধানমন্ত্ৰী মোদীয়ে শান্তি প্ৰচেষ্টাৰ প্ৰতি ভাৰতৰ ধাৰাবাহিক সমৰ্থনৰ কথা পুনৰ দোহাৰে আৰু আলোচনা তথা কূটনীতিৰ জৰিয়তেহে সকলো ধৰণৰ সংঘাতৰ শান্তিপূৰ্ণ সমাধান সম্ভৱ বুলি আহ্বান জনায় । প্ৰধানমন্ত্ৰীয়ে মন্ত্ৰী ৰুবিঅ’ক ৰাষ্ট্ৰপতি ট্ৰাম্পলৈ তেওঁৰ আন্তৰিক শুভেচ্ছা জ্ঞাপন কৰিবলৈ অনুৰোধ জনায় । বৈঠকৰ অন্তত প্ৰধানমন্ত্ৰী মোদীয়ে এক্স (X)-ত উল্লেখ কৰে যে নতুন দিল্লী আৰু ৱাশ্বিংটনে বিশ্বৰ কল্যাণৰ বাবে ভৱিষ্যতেও এনেদৰে একত্ৰিত হৈ কাম কৰি যাব ।

হাই প্ৰফাইল বৈঠকখনত ভাৰতৰ বৈদেশিক পৰিক্ৰমা মন্ত্ৰী এছ জয়শংকৰ, ৰাষ্ট্ৰীয় নিৰাপত্তা উপদেষ্টা অজিত ডোভাল, আমেৰিকাৰ ৰাষ্ট্ৰদূত চাৰ্জিঅ’ গৰ আৰু আমেৰিকাৰ বৈদেশিক পৰিক্ৰমা বিভাগৰ অধীনস্থ সচিব এলিছন হুকাৰো উপস্থিত আছিল । ভাৰতৰ বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে ৰুবিঅ’ৰ এই ভ্ৰমণে ভাৰত-আমেৰিকাৰ ব্যাপক গোলকীয় কৌশলগত অংশীদাৰিত্বক এক নতুন মাত্ৰা প্ৰদান কৰিব ।

উল্লেখ্য যে ২৩ মে’ৰ পৰা ২৬ মে’লৈ হ’বলগীয়া এই ৪ দিনীয়া ভ্ৰমণসূচীৰ আৰম্ভণিতে শনিবাৰে পুৱা মাৰ্কো ৰুবিঅ’ই পত্নী জেনেট ডি ৰুবিঅ’ আৰু এটা উচ্চস্তৰীয় প্ৰতিনিধি দলৰ সৈতে প্ৰথমে কলকাতাত অৱতৰণ কৰে । যোৱা ১৪ বছৰৰ ভিতৰত এয়া কোনো শীৰ্ষ আমেৰিকান কূটনীতিবিদৰ প্ৰথম কলকাতা ভ্ৰমণ । কলকাতাত উপস্থিত হৈ তেওঁ ‘মিছনেৰীজ অৱ চেৰিটি’লৈ গৈ মদাৰ টেৰেছাৰ প্ৰতি শ্ৰদ্ধাঞ্জলি জ্ঞাপন কৰে আৰু তেওঁৰ কৰুণা তথা সেৱাৰ মহান উত্তৰাধিকাৰক প্ৰশংসা কৰে । কলকাতাৰ ভ্ৰমণসূচী সামৰি শনিবাৰে বিয়লি তেওঁ নতুন দিল্লীত উপস্থিত হয় । দিল্লীত থকাৰ সময়ছোৱাত আমেৰিকাৰ বৈদেশিক মন্ত্ৰীগৰাকীয়ে আমেৰিকান দূতাবাসৰ ‘ছাপৰ্ট এনেক্স বিল্ডিং’ৰ উৎসৰ্গীকৃত অনুষ্ঠানতো অংশগ্ৰহণ কৰি ভাষণ প্ৰদান কৰিব ।

লগতে পঢ়ক : প্ৰধানমন্ত্ৰী মোদীৰ সৈতে মাৰ্কো ৰুবিঅ’ৰ গুৰুত্বপূৰ্ণ বৈঠক; ভাৰতক আমেৰিকাৰ “অপৰিহাৰ্য অংশীদাৰ” আখ্যা

ট্ৰাম্পে কয় মই অতি সোনকালে ইৰানে আমাক পঠোৱা পৰিকল্পনাটো পৰ্যালোচনা কৰিম কিন্তু মই কল্পনা কৰিব নোৱাৰো যে ই গ্ৰহণযোগ্য হ’ব

আমেৰিকাৰ ৰাষ্ট্ৰপতি ডনাল্ড ট্ৰাম্পে শনিবাৰে কয় যে তেওঁ ইৰানৰ পৰা শেহতীয়াকৈ লাভ কৰা এটা নতুন প্ৰস্তাৱ পৰ্যালোচনা কৰি আছে । অৱশ্যে ইয়াৰ ফলাফলক লৈ তেওঁ গভীৰ সন্দেহ প্ৰকাশ কৰি যুক্তি দিছে যে তেহৰানে নিজৰ অতীতৰ কৰ্মৰ বাবে এতিয়ালৈকে “উপযুক্ত মূল্য ভৰা নাই”।

ট্ৰুথ ছ’চিয়েলত কৰা এটা পোষ্টত ট্ৰাম্পে কয়, “মই অতি সোনকালে ইৰানে আমাক পঠোৱা পৰিকল্পনাটো পৰ্যালোচনা কৰিম, কিন্তু মই কল্পনা কৰিব নোৱাৰো যে ই গ্ৰহণযোগ্য হ’ব । কাৰণ যোৱা ৪৭ বছৰত তেওঁলোকে মানৱতা আৰু বিশ্বৰ প্ৰতি যি কৰিছে, তাৰ বাবে তেওঁলোকে এতিয়াও উপযুক্ত মূল্য ভৰা নাই ।”

ফ্ল’ৰিডাত এয়াৰ ফৰ্চ ৱানত উঠাৰ সময়ত সংবাদ মাধ্যমৰ সৈতে হোৱা কথা-বতৰাৰ কিছু সময়ৰ পিছতে এই পোষ্টটো পোহৰলৈ আহে । তাত সাংবাদিকসকলে তেওঁক এই ১৪ দফীয়া প্ৰস্তাৱটো দেখিছে নেকি বুলি সোধাত তেওঁ উত্তৰ দিয়ে, “নাই, মই দেখা নাই । মই ইয়াত (বিমানত) চাই আছো ।” তেওঁ লগতে কয়, “হয়, মই আপোনালোকক এই বিষয়ে পিছত জনাম ।”

ইৰানৰ সৈতে কোনো চুক্তিত আৱদ্ধ হোৱাতকৈ আমেৰিকাই ইয়াৰ পৰা আঁতৰি থকাই ভাল হ’ব বুলি তেওঁ পূৰ্বে কৰা মন্তব্যৰ কথা সাংবাদিকসকলে সোঁৱৰাই দিয়াত ট্ৰাম্পে সেই কথা অস্বীকাৰ কৰে । তেওঁ কয়, “মই তেনেদৰে কোৱা নাছিলোঁ । মই কৈছিলোঁ যে যদি আমি এতিয়া গুচি যাওঁ, তেন্তে তেওঁলোকক পুনৰ নিৰ্মাণ কৰিবলৈ ২০ বছৰ সময় লাগিব । কিন্তু আমি এতিয়াই গুচি যোৱা নাই । আমি এইটো এনেকৈ সমাধান কৰিম যাতে কোনেও ২ বছৰ বা ৫ বছৰৰ পিছত আকৌ ঘূৰি আহিবলগীয়া নহয় ।” প্ৰস্তাৱটোৰ বিষয়ে পুনৰ সোধাত তেওঁ কয়, “তেওঁলোকে মোক চুক্তিখনৰ ধাৰণাটোৰ বিষয়ে জনাইছে । এতিয়া তেওঁলোকে মোক ইয়াৰ সঠিক শব্দবোৰ দিব ।”

তথ্য অনুসৰি, ইৰানে আমেৰিকা যুক্তৰাষ্ট্ৰক এখন ১৪ দফীয়া আঁচনি দাখিল কৰিছে, য’ত লেবাননকে ধৰি সকলো মোৰ্চাতে “যুদ্ধ সমাপ্ত কৰা”ৰ লক্ষ্যৰে এক ব্যাপক গাঁথনিৰ ৰূপৰেখা দাঙি ধৰা হৈছে । এই প্ৰস্তাৱটো ৱাশ্বিংটনে পূৰ্বে প্ৰেৰণ কৰা ন দফীয়া আঁচনিৰ প্ৰত্যুত্তৰত আহিছে, য’ত কথিতভাৱে যুদ্ধবিৰতিৰ বাবে দুমাহৰ সময়সীমা অন্তৰ্ভুক্ত কৰা হৈছিল । অৱশ্যে ইৰানে কোনো বৰ্ধিত অন্তৱৰ্তীকালীন ব্যৱস্থা নাকচ কৰিছে বুলি কোৱা হৈছে । তেওঁলোকে ইয়াৰ পৰিৱৰ্তে ৩০ দিনৰ ভিতৰত এক পূৰ্ণাংগ সমাধান আৰু সাময়িক যুদ্ধবিৰতিৰ পৰিৱৰ্তে স্থায়ীভাৱে “যুদ্ধৰ অন্ত” পেলোৱাৰ ওপৰত জোৰ দিছে ।

প্ৰতিবেদন অনুসৰি, ইৰানৰ প্ৰস্তাৱত দৃঢ় সুৰক্ষা গেৰাণ্টি অন্তৰ্ভুক্ত কৰা হৈছে যিয়ে ইৰানৰ বিৰুদ্ধে ভৱিষ্যতে যিকোনো সামৰিক আগ্ৰাসন নিষিদ্ধ কৰিব আৰু ইৰানৰ “চুবুৰীয়া পৰিৱেশ”ৰ পৰা আমেৰিকাৰ সামৰিক বাহিনী প্ৰত্যাহাৰ কৰাৰ প্ৰয়োজন হ’ব । ইয়াত বিদ্যমান নৌ-নিষেধাজ্ঞা আৰু অৱৰোধ প্ৰত্যাহাৰ কৰাৰ লগতে বিদেশত থকা ইৰানৰ জব্দ কৰা সম্পত্তি মুকলি কৰি দিয়া আৰু নিষেধাজ্ঞা তথা সামৰিক চাপৰ বাবে হোৱা ক্ষতিৰ ক্ষতিপূৰণৰো দাবী জনোৱা হৈছে ।

অৰ্থনৈতিকভাৱে এই পৰিকল্পনাত ইৰানৰ ওপৰত আৰোপ কৰা আমেৰিকা আৰু আন্তঃৰাষ্ট্ৰীয় সকলো নিষেধাজ্ঞা সম্পূৰ্ণৰূপে আঁতৰোৱাৰ দাবী কৰা হৈছে । আঞ্চলিকভাৱে এই প্ৰস্তাৱটো ইৰান-আমেৰিকাৰ উত্তেজনাৰ বাহিৰলৈও বিস্তৃত হৈছে আৰু ইয়াত “সকলো মৰ্চাতে যুদ্ধ”ৰ সমাপ্তি ঘটাবলৈ কোৱা হৈছে, য’ত স্পষ্টভাৱে লেবাননৰ সংঘাতকো অন্তৰ্ভুক্ত কৰা হৈছে ।

লগতে পঢ়ক : ভুল কৰিলেই পুনৰ আৰম্ভ হ’ব আক্ৰমণঃ ইৰাণক ট্ৰাম্পৰ কঠোৰ সকীয়নি

ইৰাণৰ সামৰিক শক্তি বিশেষকৈ ক্ষেপণাস্ত্ৰ নিৰ্মাণৰ ক্ষমতাক লৈ ট্ৰাম্পে কঠোৰ স্থিতি গ্ৰহণ কৰিছে

ইৰাণৰ পৰা হোৱাইট হাউচলৈ আহিছে এটা অতি বিশেষ প্রস্তাৱ । কি আছে সেই প্রস্তাৱত ?  এয়া শান্তিৰ দিশে এক পদক্ষেপ নে আমেৰিকাক বিভ্রান্ত কৰাৰ আন এক কৌশল ?  যোৱা ৪৭ বছৰ ধৰি চলা শত্ৰুতাৰ মাজত হঠাৎ ইৰাণৰ এই কোমল সুৰে এতিয়া বিশ্বজুৰি তোলপাৰ লগাইছে । ড’নাল্ড ট্ৰাম্পৰ মেজত পৰি থকা এই ৰূপৰেখাই হয়তো সলনি কৰি দিব পাৰে মধ্য প্ৰাচ্যৰ ইতিহাস, কিন্তু এটা ভুল পদক্ষেপ আৰু গোটেই পৰিকল্পনাটো ভস্মীভূত হ’বলৈ লাগিব মাথোঁ কেইটামান ছেকেণ্ড । সকলোৰে চকু এতিয়া ট্ৰাম্পৰ ওপৰত ।

ইৰাণৰ শেহতীয়া প্ৰস্তাৱৰ ওপৰত আমেৰিকাৰ স্থিতি সতৰ্ক যদিও দৃঢ় যেন পৰিলক্ষিত হৈছে । আমেৰিকাৰ ৰাষ্ট্ৰপতি ড’নাল্ড ট্ৰাম্পে দুয়োখন দেশৰ মাজত আলোচনা আগবাঢ়িছে বুলি উল্লেখ কৰিছে যদিও এতিয়াও চূড়ান্ত সিদ্ধান্তত উপনীত হোৱা নাই । তেওঁ ইংগিত দিয়ে যে এই প্ৰস্তাৱটো গুৰুত্বসহকাৰে বিবেচনা কৰা হৈছে, কিন্তু ইয়াক গ্ৰহণ কৰাটো সহজ নহ’ব ।

আলোচনাৰ অৱস্থাৰ সন্দৰ্ভত মন্তব্য কৰি ট্ৰাম্পে কয় যে আমি ইৰাণৰ সৈতে ভাল অগ্ৰগতি লাভ কৰিছো । তেওঁলোকে চুক্তি কৰিব বিচাৰে, কিন্তু তেওঁলোকৰ নেতৃত্বৰ বিষয়ে স্পষ্টতাৰ অভাৱ । মই প্ৰস্তাৱটো নিৰীক্ষণ কৰি আছো । তেওঁলোকে চুক্তিখনৰ ৰূপৰেখা শ্বেয়াৰ কৰিছে আৰু এতিয়া তেওঁলোকে সম্পূৰ্ণ সবিশেষ শ্বেয়াৰ কৰিবলৈ ওলাইছে । তেওঁৰ বক্তব্যই স্পষ্ট কৰি দিয়ে যে আমেৰিকাই ইৰাণৰ প্ৰস্তাৱ সম্পূৰ্ণৰূপে নাকচ কৰা নাই, বৰঞ্চ প্ৰতিটো দিশ ভালদৰে পৰীক্ষা কৰি আছে ।

ইৰাণৰ সামৰিক শক্তি বিশেষকৈ ক্ষেপণাস্ত্ৰ নিৰ্মাণৰ ক্ষমতাক লৈ ট্ৰাম্পে কঠোৰ স্থিতি গ্ৰহণ কৰিছে । ট্ৰাম্পে কয় যে তেওঁ ইৰাণৰ বাকী থকা ক্ষেপণাস্ত্ৰৰ ক্ষমতা সম্পূৰ্ণৰূপে নাইকিয়া কৰাটো বিচাৰে । ট্ৰাম্পে কয় যে মই ইয়াক সম্পূৰ্ণৰূপে নাইকিয়া কৰিব বিচাৰো । তেওঁ কয়- “সেইটোৱে তেওঁলোকক পুনৰ নিজৰ সামৰ্থ্য সম্প্ৰসাৰণ কৰিবলৈ আৰম্ভ কৰাত বাধা দিব ।”

ইৰাণে যদি কোনো আগ্ৰাসী বা ভুল পদক্ষেপ গ্ৰহণ কৰে তেন্তে আমেৰিকাই সামৰিক ব্যৱস্থা গ্ৰহণৰ পৰা আঁতৰি নাযায় বুলিও ট্ৰাম্পে স্পষ্ট কৰি দিয়ে । তেওঁ কয়, “যদি তেওঁলোকে কোনো ভুল পদক্ষেপ গ্ৰহণ কৰে বা অনুচিত আচৰণ কৰে তেন্তে ব্যৱস্থা গ্ৰহণ কৰা হ’ব পাৰে । এই মুহূৰ্তত পৰিস্থিতিৰ ওপৰত নজৰ ৰখা হৈছে, কিন্তু এই সম্ভাৱনা সম্পূৰ্ণৰূপে আছে ।”

ৰাষ্ট্ৰপতি ট্ৰাম্পে ছ’চিয়েল মিডিয়া পোষ্টযোগে ঘোষণা কৰে যে তেওঁ অতি সোনকালে ইৰাণে প্ৰেৰণ কৰা প্ৰস্তাৱটো পুনৰীক্ষণ কৰিব । অৱশ্যে এই প্ৰস্তাৱক লৈ সন্দেহো প্ৰকাশ কৰে । তেওঁ লিখিছে, “ইৰাণে আমালৈ পঠোৱা পৰিকল্পনাটো মই অতি সোনকালে পৰ্যালোচনা কৰিম, কিন্তু মই নাভাবো যে ইয়াক গ্ৰহণ কৰাটো সহজ হ’ব, কিয়নো যোৱা ৪৭ বছৰত যি হৈছে তাৰ বাবে তেওঁলোকে এতিয়াও পৰ্যাপ্ত মূল্য দিয়া নাই ।”

লগতে পঢ়ক : ট্ৰাম্পৰ ওপৰত সামান্যতমো বিশ্বাস নাইঃ আমেৰিকাৰ সৈতে যুদ্ধ অব্যাহত ৰখাৰ ইংগিত ইৰাণৰ

ইৰাণৰ সেনাই আমেৰিকাৰ সৈতে পুনৰ সংঘৰ্ষৰ সম্ভাৱনাৰ স্পষ্ট সংকেত দিছে

ইৰাণ আৰু আমেৰিকাৰ মাজত উত্তেজনা পুনৰ বৃদ্ধি পোৱা পৰিলক্ষিত হৈছে । ইৰাণৰ সেনাই আমেৰিকাৰ সৈতে পুনৰ সংঘৰ্ষৰ সম্ভাৱনাৰ স্পষ্ট সংকেত দিছে । তেওঁলোকে কয় যে এনে এক পৰিস্থিতি গঢ় লৈ উঠিছে য’ত চুক্তিসমূহ দুৰ্বল হৈ পৰিছে আৰু আস্থা ক্ষয় হৈছে ।

ইৰাণৰ ফাৰ্চ নিউজ এজেন্সীয়ে প্ৰকাশ কৰা এক বিবৃতি অনুসৰি ইৰাণৰ সামৰিক কমাণ্ডৰ সৈতে জড়িত বিষয়া মহম্মদ জাফৰ আছাদীয়ে স্পষ্টভাৱে উল্লেখ কৰিছে যে আমেৰিকাৰ পৰা অহা সংকেতসমূহে ইংগিত দিয়ে যে আমেৰিকাৰ কোনো আপোচ বা বুজাবুজি মানি চলিবলৈ ইচ্ছুক নহয় । আছাদীয়ে বিশ্বাস কৰে যে আমেৰিকাৰ শেহতীয়া বাক্যবাণেই ইয়াৰ উদ্দেশ্যৰ ওপৰত গুৰুতৰ প্ৰশ্ন উত্থাপন কৰিবলৈ যথেষ্ট । সামগ্ৰিকভাৱে ইৰাণৰ এই বক্তব্যই এই বাৰ্তা প্ৰদান কৰিছে যে তেওঁলোকে আমেৰিকাক অলপো বিশ্বাস নকৰে ।

সমগ্ৰ বিষয়টো আৰু অধিক উত্তপ্ত হৈ পৰে যেতিয়া আমেৰিকাৰ ৰাষ্ট্ৰপতি ড’নাল্ড ট্ৰাম্পে এক অতি কঠোৰ বিবৃতি প্ৰকাশ কৰে । ট্ৰাম্পে স্পষ্টভাৱে কয় যে আমি পাগলক পাৰমাণৱিক অস্ত্ৰ দিব নোৱাৰো । ট্ৰাম্পৰ এই মন্তব্যই ইতিমধ্যে চলি থকা উত্তেজনাৰ জুইত ঘিউ ঢালিছে । তেওঁৰ এই বক্তব্যক ইৰাণৰ প্ৰতি প্ৰত্যক্ষ সতৰ্কবাণী হিচাপে বিবেচিত হৈছে, যাৰ ফলত দুয়োখন দেশৰ মাজত উত্তেজনা আৰু অধিক বৃদ্ধি পাইছে ।

লগতে পঢ়ক : ‘আপোনালোকে ইৰাণক পাৰমাণৱিক অস্ত্ৰ দিব নোৱাৰে’; নাটোক সকীয়নি ট্ৰাম্পৰ

ইৰাণেও নিজৰ সামৰিক বাহিনী সম্পূৰ্ণ সতৰ্কতা অৱলম্বন কৰা বুলি উল্লেখ কৰিছে । পৰিস্থিতি অধিক বেয়া হ’লে বা আমেৰিকাই কোনো নতুন পদক্ষেপ ল’লে তেওঁলোকে প্ৰতিক্ৰিয়া প্ৰকাশ কৰিবলৈ সাজু । আছাদীয়ে কয় যে যদি কোনো “নতুন কাৰ্য্য বা ভুল” হয় তেন্তে ইৰাণ পিছুৱাই নাযায় । তেওঁ লগতে অভিযোগ কৰে যে আমেৰিকাৰ বহু বক্তব্য কেৱল দেখুৱাবলৈহে । তেওঁলোকৰ উদ্দেশ্য প্ৰকৃত সমস্যাটোৰ সমাধান কৰা নহয়, বৰঞ্চ নিজৰ পৰিস্থিতি নিজেই পৰিচালনা কৰা । বিশেষকৈ আমেৰিকাই তেলৰ মূল্য আৰু ইয়াৰ ভাবমূর্তিক লৈ বিশেষভাৱে চিন্তিত হোৱা যেন লাগে ৷

লগতে পঢ়ক : ১৯ দিনত চাৰিটাকৈ বেলিষ্টিক ক্ষেপণাস্ত্ৰ নিক্ষেপ উত্তৰ কোৰিয়াৰ, কম্পিত জাপান-দক্ষিণ কোৰিয়া