কি হয় পাৰমাণৱিক চাবমেৰিন ?
ড’নাল্ড ট্ৰাম্প দ্বিতীয়বাৰৰ বাবে আমেৰিকাৰ ৰাষ্ট্ৰপতি হোৱাৰ পিছৰে পৰা তেওঁ নিজৰ ইচ্ছা মতে সমগ্ৰ বিশ্বকে নিয়ন্ত্ৰিত কৰিব বিচাৰিছে । তেওঁ আমেৰিকাৰ ভাল ভাল বন্ধু ৰাষ্ট্ৰক শত্ৰুলৈ ৰূপান্তৰিত কৰিছে । শেহতীয়াকৈ আমেৰিকাৰ ৰাষ্ট্ৰপতিয়ে আনকি ভাৰতৰ অৰ্থনীতিক মৃত অৰ্থনীতি বুলিও অভিহিত কৰিছে । সতৰ্কবাণী দিয়াৰ পিছতো ভাৰতৰ সৈতে ৰাছিয়াৰ বন্ধুত্বত কোনো প্ৰভাৱ নপৰে বুলি দেখি আমেৰিকাই এতিয়া ৰাছিয়াৰ ওচৰত দুখন পাৰমাণৱিক চাবমেৰিন নিয়োগ কৰাৰ কথা ঘোষণা কৰিছে । ইয়াৰ বাবে আমেৰিকা আৰু ৰাছিয়াৰ মাজৰ সমগ্ৰ বিষয়টো উত্তেজনালৈ পৰিণত হৈছে ।
ৰাছিয়াৰ প্ৰাক্তন ৰাষ্ট্ৰপতি দিমিত্ৰী মেডভেডেভৰ উচটনিমূলক মন্তব্যৰ পিছতে ড’নাল্ড ট্ৰাম্পে দুখন পাৰমাণৱিক চাবমেৰিন নিয়োগ কৰাৰ নিৰ্দেশ দিয়া বুলি প্ৰকাশ পাইছে । ইয়াৰ পূৰ্বে ট্ৰাম্পে ৰাছিয়াক ইউক্ৰেইনৰ সৈতে যুদ্ধবিৰতি ঘোষণা কৰাৰ বাবে এক সময়সীমা দিছিল । ৰাছিয়াই যদি যুদ্ধবিৰতি ঘোষণা নকৰে তেন্তে কঠোৰ নিষেধাজ্ঞাৰ সন্মুখীন হ’ব লাগিব বুলিও তেওঁ কয় । ইয়াৰ পিছতহে দিমিত্ৰী মেডভেডেভে ৰাছিয়াই ‘ডেড হেণ্ড’ৰ দৰে বিপজ্জনক কৌশল গ্ৰহণ কৰাৰ সতৰ্কবাণী দিছিল । আচলতে ডেড হেণ্ড হৈছে শীতল যুদ্ধৰ যুগৰ এক পাৰমাণৱিক ব্যৱস্থা, যিয়ে ৰাছিয়াৰ নেতৃত্ব সম্পূৰ্ণৰূপে নিৰ্মূল হ’লেও নিজাববীয়াকৈ পাৰমাণৱিক আক্ৰমণ কৰিবলৈ সক্ষম ।
পাৰমাণৱিক চাবমেৰিন কি ?
উল্লেখ্য যে পাৰমাণৱিক শক্তিসম্পন্ন চাবমেৰিন আচলতে পাৰমাণৱিক অস্ত্ৰৰে সজ্জিত ছাবমেৰিন নহয় । আচলতে ই এখন স্বাভাৱিক চাবমেৰিন । পাৰমাণৱিক চাবমেৰিন আৰু সাধাৰণ চাবমেৰিনৰ মাজত একমাত্ৰ পাৰ্থক্যটো হ’ল যে সাধাৰণ চাবমেৰিন সাধাৰণতে ডিজেলৰ দ্বাৰা চালিত হয় আৰু পাৰমাণৱিক চাবমেৰিন পাৰমাণৱিক শক্তিৰ দ্বাৰা চালিত হয় । অৰ্থাৎ যেনেকৈ পাৰমাণৱিক ৰিয়েক্টৰ ব্যৱহাৰ কৰি বিদ্যুৎ উৎপাদন কৰা হয়, ঠিক সেইদৰে পাৰমাণৱিক চাবমেৰিনত পাৰমাণৱিক ৰিয়েক্টৰ স্থাপন কৰি ইয়াক শক্তি প্ৰদান কৰা হয় ।
পাৰমাণৱিক ইন্ধন পাৰমাণৱিক চাবমেৰিনত ব্যৱহাৰ কৰা হয় । এনে চাবমেৰিনে পাৰমাণৱিক অস্ত্ৰ কঢ়িয়াব পৰাকৈয়ো সক্ষম হ’ব পাৰে, ঠিক যেনেকৈ ডিজেল চালিত চাবমেৰিনকো পাৰমাণৱিক অস্ত্ৰ কঢ়িয়াব পৰাকৈও সক্ষম কৰি তুলিব পাৰি ।
কোনখন দেশত কিমানখন পাৰমাণৱিক চাবমেৰিন আছে ?
বৰ্তমান বিশ্বৰ বহু দেশত পাৰমাণৱিক চাবমেৰিন আছে । বি বি চিৰ এক প্ৰতিবেদন অনুসৰি আমেৰিকাত সৰ্বাধিক পাৰমাণৱিক ছাবমেৰিন আছে, ৬৮খন ।ইয়াৰ পিছত আহিছে ৰাছিয়া, য’ত মুঠ ২৯খন পাৰমাণৱিক চাবমেৰিন আছে । চীনৰ ১২খন, ব্ৰিটেইনৰ ১১খন, ফ্ৰান্সৰ ৮খন আৰু ভাৰতৰ এখন পাৰমাণৱিক শক্তিসম্পন্ন চাবমেৰিন আছে ।
আমেৰিকাৰ পাৰমাণৱিক শক্তিসম্পন্ন চাবমেৰিনৰ শক্তি-
বিশ্বৰ ভিতৰতে সৰ্বাধিক পাৰমাণৱিক ছাবমেৰিন থকা দেশ আমেৰিকাত অহাইঅ’ শ্ৰেণীৰ বেলিষ্টিক মিছাইল চাবমেৰিন আছে । ইয়াত ১৪খন অহাইঅ’ শ্ৰেণীৰ এছ এছ বি এন চাবমেৰিন আছে । ইহঁতৰ আটাইতকৈ ডাঙৰ বৈশিষ্ট্য হ’ল ইহঁতে দীৰ্ঘদিন ধৰি পানীৰ ওপৰলৈ নহাকৈ সাগৰৰ গভীৰতাত কাম কৰিবলৈ সক্ষম । এই চাবমেৰিনসমূহত ২৪টা ট্ৰাইডেণ্ট II D5 মিছাইল সজ্জিত কৰা হৈছে । ইয়াৰ উপৰিও আমেৰিকাত আছে ২৪খন ভাৰ্জিনিয়া শ্ৰেণীৰ এছ এছ এন চাবমেৰিন । সেইবোৰতো অত্যাধুনিক প্ৰযুক্তিৰ ব্যৱহাৰ কৰা হৈছে ।
এই চাবমেৰিনত বিশেষ অভিযানৰ বাবে বিশেষ চেম্বাৰ নিৰ্মাণ কৰা হৈছে । লগতে আমেৰিকাত তিনিখন ছিউলফ ক্লাছৰ চাবমেৰিন আছে যিবোৰে অধিক অস্ত্ৰ কঢ়িয়াই নিব পাৰে । কেৱল এয়াই নহয়, এতিয়াও আমেৰিকাত ২৪খন এঞ্জেলছ ক্লাছৰ চাবমেৰিন সেৱাত আছে । বিশেষকৈ ১৯৭৬ চনত ছোভিয়েট ইউনিয়নৰ পৰা অহা ভাবুকিৰ সৈতে মোকাবিলা কৰিবলৈ এইবোৰ নিৰ্মাণ কৰা হৈছিল ।
আমেৰিকাৰ অহাইঅ’ শ্ৰেণীৰ চাবমেৰিনে গতানুগতিক অস্ত্ৰৰে আক্ৰমণ কৰিবলৈ সক্ষম, ইয়াৰ জৰিয়তে আমেৰিকাৰ নৌসেনাই পাৰমাণৱিক আক্ৰমণ চলাব পাৰে । কোৱা হয় যে এই ছাবমেৰিনসমূহ এতিয়ালৈকে নিৰ্মিত অন্যতম বৃহৎ ছাবমেৰিন । এই চাবমেৰিনে সাগৰৰ ভিতৰত ৭৪০০ কিলোমিটাৰতকৈও অধিক দূৰত্ব অতিক্ৰম কৰিও পাৰমাণৱিক অস্ত্ৰ যোগান ধৰিব পাৰে । গতানুগতিক এছ এছ বি এন সংস্কৰণৰ দৰে নহয়, এই চাবমেৰিনসমূহৰ এছ এছ জি এন সংস্কৰণত ১৫৪টা টমাহক ক্ৰুজ মিছাইল কঢ়িয়াব পাৰে । ইয়াৰ ফলত আমেৰিকাৰ নৌসেনাৰ গতানুগতিক আক্ৰমণ আৰু অধিক ভয়াৱহ হৈ পৰে ।
ৰাছিয়াৰ পাৰমাণৱিক চাবমেৰিনৰ শক্তি-
ৰাছিয়াত আছে বৰেই আৰু ডেল্টা শ্ৰেণীৰ বেলিষ্টিক মিছাইল চাবমেৰিন । ডেল্টা শ্ৰেণীৰ চাবমেৰিনৰ সংখ্যা এতিয়া মাত্ৰ ছখন, যাৰ ঠাইত বৰেই শ্ৰেণীৰ এছ এছ বি এন ছাবমেৰিনে স্থাপন কৰা হৈছে । বৰ্তমান ৰাছিয়াত এনে ৮ খন ছাবমেৰিন আছে আৰু ইয়াত ১৬ টা বুলাভা মিছাইলৰ লগতে ৬ টা টৰ্পিডো লঞ্চাৰ কঢ়িয়াব পাৰে । ৰাছিয়াৰ ডেল্টা-IV ছাবমেৰিনে ১৬টা চিনেভা এছ এল বি এম নিয়োগ কৰে । এইবোৰৰ বাহিৰেও ৰাছিয়াত দ্ৰুত আক্ৰমণ চলাব পৰা য়াচেন আৰু আকুলা চাবমেৰিন আছে ।
ৰাছিয়াত আছে চাৰিখন য়াচেন শ্ৰেণীৰ দ্ৰুত আক্ৰমণাত্মক চাবমেৰিন । কালিব্ৰ আৰু অনিক্স মিছাইলেৰে সজ্জিত । শ্বাৰ্ক নামেৰেও পৰিচিত আকুলা শ্ৰেণীৰ চাবমেৰিনে কালিব্ৰ, অনিক্স আৰু গ্ৰেনিট ক্ষেপণাস্ত্ৰ নিক্ষেপ কৰিবলৈ সক্ষম । ৰাছিয়াৰ সৈতে এনে ছাবমেৰিনৰ মুঠ সংখ্যা পাঁচখন ।
লগতে পঢ়ক : সঁচা হ’ব নেকি এলিয়েন সম্পৰ্কে ষ্টিফেন হকিঙে কৰা ভৱিষ্যদ্বাণী? বিজ্ঞানীসকলে দিলে সকীয়ানী
