আমেৰিকাই কৰিলে যুদ্ধবিৰতি ঘোষণা; ইৰাণে কৰিলে অস্বীকাৰ
আমেৰিকাই কৰিলে যুদ্ধবিৰতি ঘোষণা
ইৰাণে নিজৰ পাৰমাণৱিক স্থানত আমেৰিকাৰ আক্ৰমণৰ প্ৰতিশোধ লোৱাৰ লগে লগে ইজৰাইল আৰু ইৰাণৰ মাজত যুদ্ধ ক্ৰমাগতভাৱে বৃদ্ধি পাইছে । আমেৰিকাই ইৰাণক যিদৰে আক্ৰমণ কৰিছিল, ঠিক সেইদৰেই ইৰাণেও কাটাৰত থকা আমেৰিকাৰ ঘাটি আক্ৰমণ কৰে । আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ আক্ৰমণক অতি সামান্য বুলি অভিহিত কৰে । লগতে ইৰাণ আৰু ইজৰাইলৰ মাজত যুদ্ধবিৰতি হোৱা বুলিও দাবী কৰে ট্ৰাম্পে । ইফালে ইৰাণৰ বৈদেশিক মন্ত্ৰীয়ে কয় যে যদি ইজৰাইলে স্থানীয় সময় অনুসৰি পুৱা ৪ বজাৰ ভিতৰত বিমান আক্ৰমণ বন্ধ কৰে তেন্তে তেহৰাণে আক্ৰমণ বন্ধ কৰিব ।
ইৰাণৰ বৈদেশিক মন্ত্ৰী আব্বাছ আৰঘাচিয়ে তেহৰাণৰ সময় অনুসৰি পুৱা ৪:১৬ বজাত ছ’চিয়েল প্লেটফৰ্ম এক্সত নিজৰ বাৰ্তা প্ৰকাশ কৰে । তেওঁ কয়, ‘এতিয়ালৈকে কোনো ধৰণৰ যুদ্ধবিৰতি বা সামৰিক অভিযান বন্ধ কৰাৰ ক্ষেত্ৰত কোনো চুক্তি হোৱা নাই । কিন্তু যদিহে ইজৰাইলে তেহৰাণৰ সময় অনুসৰি পুৱা ৪ বজাৰ আগতে ইৰাণী জনসাধাৰণৰ বিৰুদ্ধে কৰা আক্ৰমণ বন্ধ কৰে, তেন্তে তাৰ পিছত আমাৰ প্ৰত্যুত্তৰ দিয়াৰ কোনো উদ্দেশ্য নাই । আমাৰ সামৰিক অভিযান শেষ কৰাৰ চূড়ান্ত সিদ্ধান্ত পিছত লোৱা হ’ব ।’
ইয়াৰ পূৰ্বে যেতিয়া ট্ৰাম্পে ইৰাণ আৰু ইজৰাইলৰ মাজত যুদ্ধবিৰতি হৈছে বুলি প্ৰকাশ কৰিছিল তেহৰাণে এই দাবী অস্বীকাৰ কৰিছিল । আমেৰিকাৰ পৰা কোনো ধৰণৰ যুদ্ধবিৰতিৰ প্ৰস্তাৱ পোৱা নাই বুলি ইৰাণে প্ৰকাশ কৰিছে । অৱশ্যে আমেৰিকাৰ এই দাবীক লৈ ইজৰাইলে মৌনতা অৱলম্বন কৰিছে ।
কি ক’লে ট্ৰাম্পে ?
ইৰাণে ডোহাৰ সমীপৰ আমেৰিকাৰ সামৰিক ঘাটিক লক্ষ্য কৰি লোৱাৰ কেইঘণ্টামান পিছতে ট্ৰাম্পে ট্ৰুথ ছ’চিয়েলত যুদ্ধবিৰতি ঘোষণা কৰে । ২৪ ঘণ্টাৰ ভিতৰত যুদ্ধবিৰতি কাৰ্যকৰী কৰা হ’ব বুলিও তেওঁ কয় । তেওঁ লিখিছে, ‘সকলোকে অভিনন্দন । ইজৰাইল আৰু ইৰাণৰ মাজত সম্পূৰ্ণ চুক্তি হৈছে যে ১২ ঘণ্টাৰ বাবে সম্পূৰ্ণ যুদ্ধবিৰতি থাকিব । ৬ ঘণ্টাৰ পিছত যুদ্ধ শেষ হোৱা বুলি বিবেচনা কৰা হ’ব । ইৰাণে আনুষ্ঠানিকভাৱে যুদ্ধবিৰতি আৰম্ভ কৰিব আৰু ইজৰাইলে ১২ ঘণ্টাত যুদ্ধবিৰতি আৰম্ভ কৰিব আৰু ১২ দিনীয়া যুদ্ধৰ আনুষ্ঠানিকভাৱে ২৪ ঘণ্টাত অন্ত পৰিব ।’
লগতে পঢ়ক : ইৰাণক মুকলি সমৰ্থন ৰাছিয়াৰ; তেহৰাণক সম্ভৱপৰ সকলো সহায় দিয়াৰ আশ্বাস