আমেৰিকাত ১২ খন দেশৰ লোকৰ প্ৰৱেশত নিষেধাজ্ঞা আৰোপ

আমেৰিকাৰ ৰাষ্ট্ৰপতি ড’নাল্ড ট্ৰাম্পে এক নতুন ঘোষণা কৰিছে । তেওঁ ১২খন দেশৰ নাগৰিকক আমেৰিকাত প্ৰৱেশ কৰাত সম্পূৰ্ণৰূপে নিষেধাজ্ঞা আৰোপ কৰিছে । ইয়াৰ লগতে আন ৭খন দেশৰ পৰা অহা লোকৰ ওপৰত আংশিক বাধা আৰোপ কৰা হৈছে । আমেৰিকাৰ ৰাষ্ট্ৰীয় নিৰাপত্তাৰ প্ৰতি উদ্বেগ প্ৰকাশ কৰি ট্ৰাম্পে এই পদক্ষেপ গ্ৰহণ কৰিছে ।

ৰয়টাৰৰ এক প্ৰতিবেদন অনুসৰি, যি ১২খন দেশৰ নাগৰিকক দেশখনত প্ৰৱেশ কৰাত সম্পূৰ্ণৰূপে নিষেধাজ্ঞা আৰোপ কৰা হৈছে, তাৰ ভিতৰত আফগানিস্তান, ম্যানমাৰ, চাড, কংগো, ইকুৱেটৰিয়েল গিনি, ইৰিত্ৰিয়া, হাইটি, ইৰাণ, লিবিয়া, ছোমালিয়া, চুডান আৰু য়েমেন আদি অন্তৰ্ভুক্ত । এই দেশসমূহৰ নাগৰিকে আৰু ইউ এছ এত প্ৰৱেশ কৰিব নোৱাৰিব । সোমবাৰৰ পৰা পুৱা ১২:০১ বজাৰ পৰা কাৰ্যকৰী হ’ব এই নিষেধাজ্ঞা ।

এই ৭ খন দেশৰ ওপৰতো আংশিক নিষেধাজ্ঞা-

ইয়াৰ উপৰিও ট্ৰাম্পে আন ৭খন দেশৰ পৰা অহা লোকৰ ওপৰতো নিষেধাজ্ঞা আৰোপ কৰিছে । ইয়াৰ ভিতৰত বুৰুণ্ডি, কিউবা, লাওছ, ছিয়েৰা লিয়ন, ট’গো, তুৰ্কমেনিস্তান আৰু ভেনিজুৱেলা আদি অন্যতম । এই দেশসমূহৰ পৰা অহা লোকসকলৰ ক্ষেত্ৰত এতিয়া বিশেষ চৰ্ত আৰু কঠোৰ নিৰীক্ষণ প্ৰযোজ্য হ’ব । অৱশ্যে ড’নাল্ড ট্ৰাম্পে এনে নীতি গ্ৰহণ কৰাটো এয়াই প্ৰথম নহয় । প্ৰথম ৰাষ্ট্ৰপতিৰ কাৰ্যকালত তেওঁ ৭খন মুছলমান সংখ্যাগৰিষ্ঠ দেশৰ পৰা অহা লোকৰ ভ্ৰমণ নিষিদ্ধ কৰিছিল, যিটো পিছলৈ ২০১৮ চনত উচ্চতম ন্যায়ালয়ে অনুমোদন জনায় ।

কাৰণ বুজাই দিলে ট্ৰাম্পে-

ট্ৰাম্পে নিজৰ বিবৃতিত কয় যে দেশৰ ৰাষ্ট্ৰীয় নিৰাপত্তা আৰু মোৰ নাগৰিকৰ স্বাৰ্থ সুৰক্ষিত কৰাৰ বাবে মই এই পদক্ষেপ ল’বলগীয়া হৈছে । তেওঁ কয় যে আমি পুনৰ কাৰ্যকৰী কৰিম যাক একাংশই ‘ট্ৰাম্প ভ্ৰমণ নিষেধাজ্ঞা’ বুলি কয়, যাতে উগ্ৰ ইছলামিক সন্ত্ৰাসবাদীক দেশত প্ৰৱেশ কৰাত বাধা দিব পৰা যায় । এটা পদক্ষেপ যিটো উচ্চতম ন্যায়ালয়েও ন্যায্যতা প্ৰদান কৰিছিল ।

হোৱাইট হাউছে কয় যে যিবোৰ দেশত সম্পূৰ্ণৰূপে নিষেধাজ্ঞা আৰোপ কৰা হৈছে, সেইবোৰ দেশ স্ক্ৰীনিং আৰু নিৰাপত্তা পৰীক্ষণত ব্যৰ্থ হোৱাৰ বাবে ইউ এছ এৰ বাবে এক গুৰুতৰ ভাবুকি হিচাপে বিবেচিত হৈছে । উল্লেখ্য যে এই পদক্ষেপ ট্ৰাম্পৰ নীতিৰ সম্প্ৰসাৰণ, যিটো তেওঁ প্ৰথম কাৰ্যকালত (২০১৭) আৰম্ভ কৰিছিল । তাৰ পিছত তেওঁ ৭ খন মুছলমান সংখ্যাগৰিষ্ঠ দেশ (ইৰাক, ছিৰিয়া, ইৰাণ, চুডান, লিবিয়া, ছোমালিয়া, য়েমেন)ৰ নাগৰিকক আমেৰিকালৈ অহাত নিষেধাজ্ঞা আৰোপ কৰিছিল । হোৱাইট হাউছৰ মুখপাত্ৰ এবিগেল জেকচনে ছ’চিয়েল মিডিয়া প্লেটফৰ্ম এক্সত কয় যে ৰাষ্ট্ৰপতি ট্ৰাম্পে আমেৰিকানক বিপজ্জনক বিদেশী উপাদানৰ পৰা ৰক্ষা কৰাৰ প্ৰতিশ্ৰুতি পালন কৰি আছে ।

লগতে পঢ়ক : “আমাৰ বাবে সিহঁতৰ কোনো কাম নাই”; আমেৰিকাৰ প্ৰস্তাৱক সমালোচনা খেমেইনীৰ

আমেৰিকা

সৰ্বদলীয় প্ৰতিনিধি দলৰ নেতা তথা কংগ্ৰেছৰ সাংসদ শশী থাৰুৰে বিশ্ববাসীক এই বাৰ্তা দিছে যে ভাৰতীয় প্ৰতিনিধি দলটোৱে এই কথা স্পষ্ট কৰি দিবলৈ আহিছে যে ভাৰতক আক্ৰমণ কৰা অপশক্তিৰ বিৰুদ্ধে আমি মৌন হৈ নাথাকো । তেওঁ বিশ্ব সম্প্ৰদায়ক সন্ত্ৰাসবাদৰ এই মহামাৰীৰ বিৰুদ্ধে সংহতি আৰু সামূহিক শক্তিৰে থিয় দিবলৈ আহ্বান জনায় ।

৯/১১ স্মৃতিসৌধৰ বাহিৰত সংবাদ মাধ্যমৰ সন্মুখত থাৰুৰে এই কথা কয় । তেওঁ কয়, ‘৯/১১ স্মৃতিসৌধলৈ এই যাত্ৰা এক গম্ভীৰ সোঁৱৰণ যে আমেৰিকা যেনেকৈ সন্ত্ৰাসবাদৰ চিকাৰ হৈছে, ভাৰতেও বাৰে বাৰে এই আঘাতৰ সন্মুখীন হৈছে । এই মৰ্মস্পৰ্শী স্মৃতিসৌধত যি ঘাঁ দেখা পোৱা গৈছে এনেকুৱা ঘাঁ আমিও সহিছো । আমি ইয়ালৈ আহিছো এক সংহতিৰ অনুভৱ লৈ আৰু এইটোও কৈছো যে এইটো এটা অভিযান ।‘

‘অশুভ শক্তিৰ বিৰুদ্ধে দৃঢ়তাৰে থিয় দিলে ভাৰতে’

বৰ্তমান এই প্ৰতিনিধি দলটো আমেৰিকাত আছে আৰু তাৰ পিছত গিয়ানা, পানামা, ব্ৰাজিল আৰু কলম্বিয়ালৈ যাত্ৰা কৰিব । থাৰুৰে কয়, ‘এই দেশসমূহত আমি বুজাবলৈ চেষ্টা কৰিম যে সন্ত্ৰাসবাদৰ বিৰুদ্ধে সকলোৱে একত্ৰিত হোৱাটো কিমান গুৰুত্বপূৰ্ণ । ৯/১১ৰ পিছত আমেৰিকাই যিদৰে সাহস আৰু সংকল্প দেখুৱাইছিল, আমাৰ দেশেও ২২ এপ্ৰিলৰ আক্ৰমণৰ পিছত অশুভ শক্তিৰ বিৰুদ্ধে দৃঢ়তাৰে থিয় দিছে । আমি আশা কৰোঁ যে এই আক্ৰমণৰ দোষী আৰু তেওঁলোকক প্ৰশিক্ষণ, পুঁজি আৰু অস্ত্ৰ-শস্ত্ৰ প্ৰদান কৰাসকলে ইয়াৰ পৰা কিছু শিক্ষা লৈছে । কিন্তু আমি স্পষ্টকৈ ক’ব বিচাৰো যে যদি পুনৰ এনেকুৱা হয় তেন্তে আমি মৌন হৈ নাথাকো ।‘

তেওঁ কয়, ‘এয়া উদাসীনতাৰ সময় নহয়, বৰঞ্চ পাৰস্পৰিক শক্তি আৰু সহযোগিতাৰ সময়, যাতে আমি একেলগে আমেৰিকাই সদায় মূল্য দিয়া মূল্যবোধৰ পক্ষত থিয় দিব পাৰো- গণতন্ত্ৰ, স্বাধীনতা, বৈচিত্ৰ্য আৰু বিভিন্ন সম্প্ৰদায়ৰ শান্তিপূৰ্ণ সহাৱস্থান । দুৰ্ভাগ্যজনকভাৱে এই সকলোবোৰ মূল্যবোধ এনে আক্ৰমণ সংঘটিত কৰাসকলৰ এজেণ্ডাত নাই ।‘

ভাৰতত বাৰে বাৰে হোৱা সন্ত্ৰাসবাদী আক্ৰমণৰ কথা উল্লেখ কৰি থাৰুৰে কয় যে “সন্ত্ৰাসবাদৰ দোষীক ন্যায়ৰ কাঠগঢ়ালৈ আনিব লাগিব আৰু আমি শেহতীয়া আক্ৰমণৰ দোষীক ধৰা নপৰালৈকে বিচাৰি উলিওৱাটো বন্ধ নকৰো ।”

তেওঁ কয়, ‘এই লোকসকলে ক’ত লুকাই আছে, ক’ত আশ্ৰয় পায়, ক’ত প্ৰশিক্ষণ পায়, ক’ৰ পৰা অস্ত্ৰ-শস্ত্ৰ, পুঁজি আৰু সহায় পায়, সেই বিষয়ে আমি চিন্তা কৰিব লাগিব । এই ভয়ংকৰ আক্ৰমণ চলাবলৈ সহায় কৰাসকলো জবাবদিহি হ’ব লাগিব ।’

ৰাষ্ট্ৰসংঘই সন্ত্ৰাসবাদী সংগঠনৰ ওপৰত আৰোপ কৰা নিষেধাজ্ঞা সন্দৰ্ভত মন্তব্য কৰি থাৰুৰে কয়, ‘ৰাষ্ট্ৰসংঘৰ নিষেধাজ্ঞা সমিতিয়ে পাকিস্তানৰ প্ৰায় ৫২ ব্যক্তি আৰু সংগঠনৰ তালিকা প্ৰস্তুত কৰিছে যদিও এতিয়া কেৱল তালিকাভুক্ত কৰা, কূটনীতি বা আন্তঃৰাষ্ট্ৰীয় নথি প্ৰস্তুত কৰাটোৱেই কাম নহ’ব । আমি আত্মৰক্ষাৰ অধিকাৰো প্ৰয়োগ কৰিম, যিটো প্ৰতিখন দেশেই স্বীকৃতি দিয়ে ।‘

লগতে পঢ়ক : ‘দেশ আৰু জনসাধাৰণক ৰক্ষা কৰাৰ অধিকাৰ আমাৰ আছে’… অপাৰেচন সিন্দুৰ সন্দৰ্ভত জাৰ্মানীত ক’লে জয়শংকৰে

আমেৰিকা আৰু চৌদি আৰবে প্ৰায় ১৪২ বিলিয়ন ডলাৰৰ প্ৰতিৰক্ষা চুক্তিত স্বাক্ষৰ কৰিছে । এই বৃহৎ প্ৰতিৰক্ষা চুক্তিৰ বিষয়ে তথ্য দিছে হোৱাইট হাউছে । উপসাগৰীয় দেশখন ভ্ৰমণ আৰম্ভ কৰাৰ সময়তে মঙলবাৰে ছৌদি আৰৱৰ সৈতে কৌশলগত অৰ্থনৈতিক চুক্তি স্বাক্ষৰ কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে । ছৌদি চৰকাৰে ৰিয়াধত ট্ৰাম্পক আদৰণি জনোৱাৰ বৃহৎ ব্যৱস্থা কৰে । এয়াৰ ফৰ্চ ৱানৰ পৰা নামি অহাৰ সময়ত ট্ৰাম্পে উত্তেজনাত মুঠি ওপৰলৈ তোলে, য’ত তেওঁক আদৰণি জনায় চৌদি আৰৱৰ ক্ৰাউন প্ৰিন্স মহম্মদ বিন ছালমানে ।

এতিয়ালৈকে হোৱা আটাইতকৈ ডাঙৰ প্ৰতিৰক্ষা চুক্তি-

শক্তি, প্ৰতিৰক্ষা, খনন আদি খণ্ডত সহযোগিতা সম্পৰ্কে চুক্তি স্বাক্ষৰ কৰে দুয়োগৰাকী নেতাই । চৌদি আৰৱৰ চৰকাৰী টেলিভিছনৰ তথ্য অনুসৰি এই চুক্তিখনে কেইবাটাও ক্ষেত্ৰ সামৰি লৈছে । হোৱাইট হাউছে জনাইছে যে ছৌদি আৰবে আমেৰিকাত মুঠ ৬০০ বিলিয়ন ডলাৰ বিনিয়োগ কৰিবলৈ ওলাইছে, য’ত ১৪২ বিলিয়ন ডলাৰৰ প্ৰতিৰক্ষা চুক্তিও অন্তৰ্ভুক্ত হৈছে- যিটো দুয়োখন দেশৰ মাজত এতিয়ালৈকে হোৱা আটাইতকৈ ডাঙৰ প্ৰতিৰক্ষা চুক্তি হ’ব ।

ট্ৰাম্পৰ মাস্কৰো চৌদি আৰৱ ভ্ৰমণ-

ৰিয়াধত অনুষ্ঠিত বৈঠকৰ সময়ত ট্ৰাম্পে কয় যে মই সঁচাকৈয়ে ভাবো আমি ইজনে সিজনক বহুত ভাল পাওঁ । কোটিপতি ইলন মাস্ককে ধৰি আমেৰিকাৰ বহু বৃহৎ ব্যৱসায়ীও ট্ৰাম্পৰ সৈতে উপস্থিত আছিল । বুধবাৰে কাটাৰ আৰু বৃহস্পতিবাৰে সংযুক্ত আৰব আমিৰশ্বাহী (ইউ এ ই) ভ্ৰমণ কৰিব ট্ৰাম্প ।