আই পি এল ২০২৫ৰ দ্বাদশ মেচখন মুম্বাই ইণ্ডিয়ানছ (এম আই) আৰু কলকাতা নাইট ৰাইডাৰ্ছ (কে কে আৰ)ৰ মাজত অনুষ্ঠিত হয় । সোমবাৰ ৱাংখেড়ে ষ্টেডিয়ামত অনুষ্ঠিত হোৱা এই খেলখনত মুম্বাই ইণ্ডিয়ানছে ৮ উইকেটত জয়লাভ কৰে । মুম্বাই ইণ্ডিয়ানছে জয়ী হ’বলৈ ১১৭ ৰানৰ সহজ লক্ষ্য লাভ কৰে, যিটো তেওঁলোকে মাত্ৰ ১২.৫ অভাৰতে উপনীত হয় । মুম্বাইৰ জয়ৰ নায়ক আছিল বেগী বলাৰ অশ্বিনী কুমাৰ, যিয়ে আই পি এলত অভিষেক মেচতে ৪টা উইকেট দখল কৰে । মুম্বাইৰ হৈ ৰিয়ান ৰিকেল্টনেও অপৰাজিত অৰ্ধশতক (৬২) অৰ্জন কৰে ।

মুম্বাই ইণ্ডিয়ানছৰ প্ৰথম জয়…

চলিত ছিজনত পাঁচবাৰৰ চেম্পিয়ন মুম্বাই ইণ্ডিয়ানছৰ এইটোৱেই প্ৰথমটো জয় । উল্লেখ্য যে চেন্নাই ছুপাৰ কিংছ (চি এছ কে) আৰু গুজৰাট টাইটানছ (জি টি)ৰ বিৰুদ্ধে প্ৰথম দুখন মেচত পৰাজয়ৰ সন্মুখীন হ’বলগীয়া হৈছে মুম্বাই ইণ্ডিয়ানছ । আনহাতে, ডিফেণ্ডিং চেম্পিয়ন কে কে আৰ ৰয়েল চেলেঞ্জাৰছ বেংগালুৰু (আৰ চি বি)ৰ হাতত পৰাস্ত হোৱাৰ পিছত ছানৰাইজাৰ্ছ হায়দৰাবাদ (এছ আৰ এইচ)ৰ বিৰুদ্ধে একপক্ষীয় জয় লাভ কৰে । এতিয়া দলটো চলিত ছিজনত দ্বিতীয়টো পৰাজয়ৰ সন্মুখীন হ’বলগীয়া হৈছে ।

লক্ষ্য অনুসৰণ ‘ইমপেক্ট ছাব’ ৰোহিত শৰ্মা আৰু ৰিয়ান ৰিকেল্টনে মুম্বাই ইণ্ডিয়ানছৰ হৈ ভাল আৰম্ভণি কৰে । দুয়োজনে প্ৰথম উইকেটৰ বাবে ৫.২ অভাৰত ৪৬ ৰানৰ অংশীদাৰিত্ব কৰে । ৰোহিতক ফৰ্মত দেখা গৈছিল যদিও ভাল আৰম্ভণিক ডাঙৰ স্ক’ৰলৈ ৰূপান্তৰিত কৰিব নোৱাৰিলে । আন্দ্ৰে ৰাছেলৰ বলত হৰ্ষিত ৰাণাই ৰোহিতক কেচ আউট কৰে ।

এটা ৬ৰ সহায়ত ১২টা বলত ১৩ ৰান সংগ্ৰহ কৰে ৰোহিত শৰ্মাই । ইয়াৰ পৰা ৰিয়ান ৰিকেল্টনে কলকাতা নাইট ৰাইডাৰ্ছক কোনো সুযোগ নিদি বিস্ফোৰক অৰ্ধ শতক অৰ্জন কৰে । দক্ষিণ আফ্ৰিকাৰ অ’পেনাৰ ৰিকেল্টনে ৫টা চাৰি আৰু চাৰিটা ৬ৰ সহায়ত ৪১টা বলত অপৰাজিত ৬২ ৰান সংগ্ৰহ কৰে । সূৰ্যকুমাৰ যাদৱেও ২৭ ৰানত অপৰাজিত হৈ থাকে । কে কে আৰৰ হৈ আন্দ্ৰে ৰাছেলে দুয়োটা উইকেট দখল কৰে ।

অশ্বিনী কুমাৰে সৃষ্টি কৰিলে ইতিহাস… ৰাছেল, ৰিংকু সকলো ব্যৰ্থ-

টছত পৰাস্ত হৈ প্ৰথমে বেটিং কৰিবলৈ বাছনি কৰাৰ পিছত কলকাতা ১৬.২ অভাৰত ১১৬ ৰান সংগ্ৰহ কৰি অল আউট হয় । কলকাতা নাইট ৰাইডাৰ্ছৰ আৰম্ভণি শোচনীয় আছিল আৰু পাৱাৰ প্লে’তেই ৪ উইকেট হেৰুৱাইছিল । ইয়াৰ পূৰ্বে বাওঁহাতৰ পেচাৰ ট্ৰেণ্ট ব’ল্টে ক্লীন বল্ড কৰিছিল সুনীল নাৰিনক (০) । ইয়াৰ পাছতে দীপক চহৰে উইকেটকীপাৰ-বেটছমেন কুইণ্টন ডি ককক আউট কৰে । ইয়াৰ পিছত অশ্বিনী কুমাৰে অভিষেক মেচৰ প্ৰথমটো বলত অধিনায়ক অজিংক্য ৰাহানেক পেভিলিয়নৰ বাট দেখুৱাই । আনহাতে দীপক চহৰে ভেংকটেশ আয়াৰক আউট কৰে (৩) । ভেংকটেশ আউট হোৱাৰ সময়ত কে কে আৰৰ স্ক’ৰ আছিল ৪১ ৰান ।

অংকৃশ ৰঘুবংশীয়ে কিছু চেষ্টা কৰিছিল যদিও হাৰ্দিক পাণ্ডিয়াৰ বলত এটা ডাঙৰ শ্বট খেলিবলৈ চেষ্টা কৰি নমন ধীৰৰ হাতত কেচ তুলি আউট হয় তেওঁ । ৰঘুবংশীয়ে ৩টা চাৰি আৰু এটা ৬ৰ সহায়ত ১৬টা বলত ২৬ ৰান সংগ্ৰহ কৰে । ইয়াৰ পাছতে অশ্বনী কুমাৰে ৰিংকু সিং (১৭), ‘ইমপেক্ট চাব’ মনীষ পাণ্ডে (১৯) আৰু আন্দ্ৰে ৰাছেল (৫)ক আউট কৰি কলকাতা নাইট ৰাইডাৰ্ছৰ বেটিং মেৰুদণ্ড ভাঙি পেলায় । তাৰ পাছত হৰ্ষিত ৰানাক বিগনেশ পুথুৰে পেভিলিয়নমুখী কৰে । আনহাতে ২২ ৰান সংগ্ৰহ কৰি মিচেল ছাণ্টনাৰৰ বলি হয় ৰমনদীপ সিং ।

মুম্বাই ইণ্ডিয়ানছৰ হৈ অশ্বিনী কুমাৰে ২৪ ৰানত ৪টা উইকেট দখল কৰাৰ বিপৰীতে দীপক চহৰে দুটা উইকেট লাভ কৰে । ইয়াৰ উপৰিও ট্ৰেণ্ট ব’ল্ট, হাৰ্দিক পাণ্ডিয়া, ভিগনেশ পুথুৰ আৰু মিচেল ছাণ্টনাৰে এটাকৈ উইকেট লাভ কৰে ।

উল্লেখ্য যে, আই পি এলত অভিষেক ঘটাই চাৰিটা উইকেট দখল কৰা প্ৰথমজন ভাৰতীয় বলাৰ অশ্বিনী কুমাৰ । আই পি এলত অভিষেক ঘটাই শ্ৰেষ্ঠ বলিঙৰ অভিলেখ অৰ্জন কৰিছে আলজাৰী জোচেফ । ২০১৯ চনত ছানৰাইজাৰ্ছ হায়দৰাবাদৰ বিৰুদ্ধে মুম্বাই ইণ্ডিয়ানছৰ হৈ ১২ ৰানত ৬টা উইকেট দখল কৰিছিল তেওঁ । আই পি এলৰ অভিষেক মেচত চাৰিটা বা তাতকৈ অধিক উইকেট দখল কৰা অশ্বিনী হৈছে ষষ্ঠজন বলাৰ ।

আই পি এলৰ এখন মেচত আজি দিল্লী কেপিটেলে ছানৰাইজাৰ্ছ হায়দৰাবাদক ৭ উইকেটত পৰাস্ত কৰিছে । চলিত ছিজনত হায়দৰাবাদৰ এয়া একেৰাহে দ্বিতীয়টো পৰাজয় । এই মেচখনত এছ আৰ এইচে প্ৰথমে বেটিং কৰি ১৬৩ ৰান সংগ্ৰহ কৰে । ইয়াৰ প্ৰতিক্ৰিয়া স্বৰূপে দিল্লীয়ে ১৬ অভাৰতে বিজয় লক্ষ্যত উপনীত হয় । দিল্লী কেপিটেলছে একেৰাহে দ্বিতীয়টো জয় লাভ কৰিছে, য’ত ফাফ ডু প্লেছিছে অৰ্ধশতক অৰ্জন কৰিছে । ডু প্লেছিছৰ পঞ্চাশ ৰান আৰু অনিকেত বাৰ্মাৰ ৭৪ ৰানৰ সহায়ত দিল্লীয়ে মেচখনত বিজয় সাব্যস্ত কৰে ।

সহজেই লক্ষ্যত উপনীত হয় দিল্লী-

দিল্লী কেপিটেলছে ১৬৪ ৰানৰ লক্ষ্য লাভ কৰে । ইয়াৰ উত্তৰত জেক ফ্ৰেজাৰ মেকগাৰ্ক আৰু ফাফ ডু প্লেছিছে দিল্লীৰ হৈ বিস্ফোৰক আৰম্ভণি কৰে । মেকগাৰ্ক আৰু ডু প্লেছিছৰ মাজত ৮১ ৰানৰ অপেনিং অংশীদাৰিত্ব আছিল । মেকগাৰ্কে ৩৮ ৰান সংগ্ৰহ কৰাৰ বিপৰীতে ডু প্লেছিছে ২৭টা বলত ৫০ ৰানৰ ধুমুহাময় ইনিংছ খেলি দিল্লীৰ জয়ৰ ভেটি স্থাপন কৰে । এই ইনিংছত তেওঁ ৩টা চাৰি আৰু ৩টা ছয় কোবাই ।

দিল্লীৰ হৈ অভিষেক পোৰেলো জিলিকি উঠে, তেওঁ শেষত ছয় কোবাই দিল্লী কেপিটেলছৰ জয় নিশ্চিত কৰে । পোৰেলে ১৮টা বলত ৩৪ ৰানৰ অপৰাজিত ইনিংছ খেলে । একে সময়তে ট্ৰিষ্টান ষ্টাবছেও ১৪টা বলত ২১ ৰান সংগ্ৰহ কৰি অপৰাজিত হৈ থাকে । আজি আই পি এল ২০২৫ত প্ৰথমখন মেচ খেলা কে এল ৰাহুলে ডাঙৰ ইনিংছ খেলাত ব্যৰ্থ হয় আৰু তেওঁ ৫ টা বলত ১৫ ৰান সংগ্ৰহ কৰি আউট হয় । ৫টা বলৰ চুটি ইনিংছত ৰাহুলে ২টা চাৰি আৰু এটা ছয় কোবাই ।

মিচেল ষ্টাৰ্কৰ পাঁচ উিকেট-

দিল্লী কেপিটেলছৰ জয়ৰ ভেটি স্থাপন কৰে মিচেল ষ্টাৰ্কে । তেওঁ ট্ৰেভিছ হেড, ঈশান কিষাণ আৰু নীতিশ কুমাৰ ৰেড্ডীকে ধৰি ৫ জন ছানৰাইজাৰ্ছ হায়দৰাবাদৰ বেটছমেনক আউট কৰে । ষ্টাৰ্কৰ উপৰিও দিল্লীৰ হৈ কুলদীপ যাদৱেও ৩টা উইকেট দখল কৰে । উল্লেখ্য যে ৫টা উইকেট দখল কৰি ষ্টাৰ্কে পাৰ্পল কেপৰ দৌৰত প্ৰথম স্থান লাভ কৰিছে ।

ইণ্ডিয়ান প্ৰিমিয়াৰ লীগ (আই পি এল) ২০২৫ ছিজনৰ ৫ নম্বৰ মেচখন গুজৰাট টাইটানছ (জি টি) আৰু পঞ্জাব কিংছ (পি বি কে এছ)ৰ মাজত অনুষ্ঠিত হয় । এই মেচখন অতি ৰোমাঞ্চকৰ আছিল । মঙলবাৰে (২৫ মাৰ্চ) আহমেদাবাদত অনুষ্ঠিত হোৱা এই মেচখনত শ্ৰেয়াছ আয়েৰৰ অধিনায়কত্বত থকা পঞ্জাৱ দলটোৱে ১১ ৰানত জয়লাভ কৰে ।

টছ হেৰুৱাই মেচখনত প্ৰথমে বেটিং কৰাৰ পিছত পঞ্জাৱ দলে ২৪৪ ৰানৰ লক্ষ্য নিৰ্ধাৰণ কৰে । প্ৰত্যুত্তৰত গুজৰাট দলে ৫টা উইকেট হেৰুৱাই মাত্ৰ ২৩২ ৰানহে কৰিবলৈ সক্ষম হয় । দলটোৰ হৈ ৪১টা বলত ৭৪ ৰানৰ সৰ্বোচ্চ ইনিংছ খেলে ছাই সুদৰ্শনে । আনহাতে জোছ বাটলাৰে ৩৩টা বলত ৫৪ ৰান সংগ্ৰহ কৰে ।

শ্বাৰফেন ৰাদাৰফোৰ্ডে ২৮টা বলত ৪৬ ৰান সংগ্ৰহ কৰিছিল যদিও দলটোক জয়ৰ দিশত আগবঢ়াই নিব নোৱাৰিলে । পাঞ্জাব কিংছে শক্তিশালী বলিং কৰে । অৰ্শদীপ সিঙে ২টা উইকেট দখল কৰে । আনহাতে মাৰ্কো জেনছেন আৰু গ্লেন মেক্সৱেলে ১টাকৈ সফলতা লাভ কৰে ।

প্ৰথমটো আ পি এল শতকৰ পৰা বঞ্চিত শ্ৰেয়াছ-

মেচখনত পঞ্জাব কিংছে ৫টা উইকেট হেৰুৱাই ২৪৩ ৰান সংগ্ৰহ কৰে । শ্ৰেয়াছ আয়েৰে অধিনায়কোচিত ইনিংছ খেলি ২৭টা বলত পঞ্চাশ ৰান কৰে । মেচখনত শ্ৰেয়াছে ৪২টা বলত অপৰাজিত ৯৭ ৰান সংগ্ৰহ কৰে । এই সময়ছোৱাত তেওঁ ৯টা ছয় আৰু ৫টা চাৰি কোবাই ।

শ্ৰেয়াছে আই পি এলৰ প্ৰথমটো শতক অৰ্জন কৰিবলৈ মাত্ৰ ৩ ৰান দূৰত থাকে । তেওঁৰ বাহিৰেও অ’পেনাৰ প্ৰিয়ংশ আৰ্য্যই ৪৭ ৰান সংগ্ৰহ কৰে । শেষত শশাংক সিঙে ১৬টা বলত ৪৪ ৰান সংগ্ৰহ কৰি অপৰাজিত হৈ থাকে । গুজৰাটৰ হৈ ছাই কিশোৰে ৩টা উইকেট দখল কৰে ।

অক্ষৰ পেটেলৰ অধিনায়কত্বত দিল্লী কেপিটেলছে (ডি চি) এক সুন্দৰ আৰম্ভণি কৰিছে । ইণ্ডিয়ান প্ৰিমিয়াৰ লীগ (আই পি এল) ২০২৫ ছিজনত সোমবাৰে (২৪ মাৰ্চ) বিশাখাপট্টনমত লক্ষ্ণৌ ছুপাৰ জায়েন্টছৰ বিৰুদ্ধে দিল্লীয়ে ১ উইকেটত জয়লাভ কৰে ।

প্ৰথমে বিস্ফোৰক আৰম্ভণি, তাৰ পিছত লক্ষ্ণৌৰ দলত খহনীয়া-

মেচখনত লক্ষ্ণৌ দলে এক সুন্দৰ আৰম্ভণি কৰিছিল । অ’পেনাৰ মিচেল মাৰ্ছে ২১ ৰান আৰু তিনি নম্বৰ স্থানত অহা নিকোলাছ পুৰানে ২৪টা বলত পঞ্চাশ ৰান সংগ্ৰহ কৰে । পুৰানে ৩০টা বলত ৭৫ ৰান আৰু মাৰ্ছে ৩৬ বলত ৭২ ৰান সংগ্ৰহ কৰে । পুৰানে ৭ আৰু মাৰ্ছে ৬টা ছয় কোবাই । শেষত ডেভিদ মিলাৰে ১৯টা বলত ২৭ ৰান সংগ্ৰহ কৰে ।

এটা সময়ত লক্ষ্ণৌৱে ১৩ অভাৰত ২ উইকেটত ১৬১ ৰান সংগ্ৰহ কৰিছিল । তেতিয়া লক্ষ্ণৌৰ দলটোৱে ২৫০ তকৈ অধিক ৰান কৰিব পাৰিব যেন লাগিছিল যদিও দিল্লীৰ বলাৰসকলে এক উজ্জ্বল প্ৰত্যাৱৰ্তন ঘটাই । ৮টা উইকেট হেৰুৱাই লক্ষ্ণৌ দলটোক ২০৯ ৰানত সীমাবদ্ধ কৰি ৰাখে দিল্লীয়ে । দিল্লীৰ হৈ মিচেল ষ্টাৰকে ৩টা আৰু কুলদীপ যাদৱে ২টা উইকেট দখল কৰে । বিপ্ৰজ নিগম আৰু মুকেশ কুমাৰে ১টাকৈ উইকেট দখল কৰে ।

আশুতোষ শৰ্মা আৰু বিপ্ৰজ নিগমে দিল্লীক পৰাজিত খেলখনত জয়ী কৰি তুলিলে । আশুতোষ শৰ্মাৰ ৩১ বলত ৬৬ আৰু বিপ্ৰজ নিগমৰ ১৫ বলত ৩৯ ৰানে লক্ষ্ণৌৰ পৰা মেচখন কাঢ়ি লৈ ​​যায় । মেচখনত জয়লাভ কৰি অপৰাজিত হৈ উভতি আহে আশুতোষ । তেওঁৰ বেটৰ পৰা ৫টা চাৰি আৰু ৫টা ছয় আহে ।