আই চি চি এদিনীয়া ৰেংকিং প্ৰকাশ

বুধবাৰে আই চি চিয়ে প্ৰকাশ কৰিছে এদিনীয়া ৰেংকিং । ভাৰতৰ ৰিষ্ট স্পীনাৰ কুলদীপ যাদৱ তৃতীয় স্থানলৈ অৱনমিত যোৱাৰ বিপৰীতে দক্ষিণ আফ্ৰিকাৰ স্পীনাৰ কেশৱ মহাৰাজে বুধবাৰে প্ৰকাশিত আই চি চিৰ শেহতীয়া এদিনীয়া ৰেংকিঙত পুনৰ শীৰ্ষস্থান দখল কৰে ।

তীক্ষনা আৰু কুলদীপক অতিক্ৰম-

৩৫ বছৰীয়া বাওঁহতীয়া স্পীনাৰ মহাৰাজে এদিনীয়া ৰেংকিংত কুলদীপ আৰু শ্ৰীলংকাৰ মহেশ তীক্ষনাক অতিক্ৰম কৰি শীৰ্ষস্থান দখল কৰে । ইয়াৰ পূৰ্বে ২০২৩ চনৰ নৱেম্বৰ আৰু ডিচেম্বৰ মাহত কিছুদিন শীৰ্ষত আছিল মহাৰাজ । কুলদীপৰ বাহিৰেও ৰবীন্দ্ৰ জাডেজা হৈছে একমাত্ৰ ভাৰতীয় বলাৰ যি বলাৰৰ তালিকাত শীৰ্ষ ১০ ৰ ভিতৰত অন্তৰ্ভুক্ত হৈছে । চেম্পিয়নছ ট্ৰফীত খিতাপ জয় কৰাৰ পাছত ভাৰতীয় দলটোৱে এতিয়ালৈকে কোনো এদিনীয়া খেলা নাই ।

জেডন ছিলছৰ জাঁপ-

ৱেষ্ট ইণ্ডিজৰ বেগী বলাৰ জেডন ছিলছেও বলিং ৰেংকিঙত ডাঙৰ অগ্ৰগতি লাভ কৰিবলৈ সক্ষম হৈছে । পাকিস্তানৰ বিৰুদ্ধে তিনিখন মেচৰ শৃংখলাৰ অন্তিমখন খেলত ১৮ ৰানত ৬টা উইকেট দখল কৰে তেওঁ । তেওঁ ১৮ নম্বৰ স্থানত উপনীত হয় । পাকিস্তানৰ লেগ স্পীনাৰ আব্ৰাৰ আহমেদ (৩৯ নম্বৰ) আৰু ৱেষ্ট ইণ্ডিজৰ অফ স্পীনাৰ ৰষ্টন চেজ (৫৮ নম্বৰ)ও ৰেংকিঙত উন্নীত হোৱা বলাৰসকলৰ ভিতৰত আছে ।

শীৰ্ষস্থান অক্ষুন্ন গীলৰ-

এদিনীয়া ৰেংকিংত পুৰুষৰ বেটিংত শুভমন গীল ৭৮৪ পইণ্টেৰে শীৰ্ষত আছে । ষষ্ঠ স্থানত শীৰ্ষ দহৰ ভিতৰত থকা আনজন ভাৰতীয় বেটছমেন শ্ৰেয়াছ আয়াৰ । পাকিস্তানৰ বিৰুদ্ধে যোৱা এদিনীয়া খেলখনত অপৰাজিত ১২০ ৰান সংগ্ৰহ কৰা ৱেষ্ট ইণ্ডিজৰ অধিনায়ক শ্বহী হোপে দুটা স্থান আগুৱাই নৱম স্থানলৈ যোৱাৰ বিপৰীতে এইডেন মাৰ্ক্ৰাম (চাৰিটা স্থান বৃদ্ধিৰে ২১ নম্বৰ), টেম্বা বাভুমা (৫টা স্থান বৃদ্ধিৰে ২৩ নম্বৰলৈ) আৰু মিচেল মাৰ্ছ (ছটা স্থান বৃদ্ধিৰে ৪৮ নম্বৰলৈ) ৰেংকিঙত আগবাঢ়িছে ।

পুৰুষৰ টি-২০ ৰেংকিঙত ভাৰতৰ অভিষেক শৰ্মা আৰু তিলক বাৰ্মাই শীৰ্ষ দুটা স্থান অব্যাহত ৰাখিছে । অধিনায়ক সূৰ্যকুমাৰ যাদৱ ষষ্ঠ আৰু যশস্বী জয়ছোৱাল দশম স্থানত আছে । দক্ষিণ আফ্ৰিকাৰ ডেৱাল্ড ব্ৰেভিছে ৯ স্থান জঁপিয়াই ১২ নম্বৰ স্থানলৈ যোৱাৰ বিপৰীতে অষ্ট্ৰেলিয়াৰ মাৰ্ছ আৰু গ্লেন মেক্সৱেলে ক্ৰমে চাৰি আৰু ১০ স্থান জপিয়াই ২৫ আৰু ৩০ নম্বৰ স্থান লাভ কৰিছে । টি-২০ বলিং ৰেংকিঙত অষ্ট্ৰেলিয়াৰ বেগী বলাৰ নাথান এলিছ (নৱম স্থান) আৰু জোছ হেজলউডে (১৮ নম্বৰ) যথেষ্ট উন্নতি সাধন কৰাৰ বিপৰীতে দক্ষিণ আফ্ৰিকাৰ বেগী বলাৰ কাগিছ’ ৰাবাডাই ৪৪ নম্বৰৰ পৰা ৩৭ নম্বৰলৈ গতি কৰিছে ।

লগতে পঢ়ক : ICC ৰ এদিনীয়া ৰেংকিঙৰ পৰা হঠাতে কিয় নোহোৱা হ’ল বিৰাট কোহলী আৰু ৰোহিত শৰ্মাৰ নাম….

আই চি চিৰ শেহতীয়া ৰেংকিঙত ৱাশ্বিংটন-জাডেজাৰ অগ্ৰগতি

ভাৰত বনাম ইংলেণ্ডৰ পঞ্চম টেষ্টৰ পূর্বে ৩০ জুলাই বুধবাৰে আই চি চিয়ে শেহতীয়া ৰেংকিং প্রকাশ কৰিছে ৷ মানচেষ্টাৰত শতক অৰ্জন কৰা ৰবীন্দ্ৰ জাডেজা আৰু ৱাশ্বিংটন সুন্দৰ এই ৰেংকিঙত লাভৱান হোৱাৰ বিপৰীতে যশস্বী জয়ছৱাল ৩টা স্থান অৱনমিত হৈছে । ভাৰতীয় খেলুৱৈ হিচাপে এতিয়া আই চি চিৰ পুৰুষৰ টেষ্ট বেটছমেন ৰেংকিঙত শীৰ্ষস্থান দখল কৰিছে ঋষভ পন্টে, তেওঁ তালিকাৰ ৭ নম্বৰত আছে । অধিনায়ক শুভমন গীল ৯ম স্থানত আছে ।

তিনিটা স্থান অৱনমিত হ’ল জয়ছোৱাল-
যশস্বী জয়ছোৱাল পূৰ্বে পঞ্চম স্থানত আছিল, এতিয়া টেষ্ট বেটছমেন ৰেংকিঙত ৮ম স্থানলৈ অৱনমিত হৈছে তেওঁ । তেওঁৰ ৰেটিং পইণ্ট ৭৬৯ । ৭৭৬ পইণ্টেৰে ৭ নম্বৰ স্থানত আছে ঋষভ পন্ট । ইংৰাজ বেটছমেন জো ৰুটে নিজৰ প্ৰথম স্থান অক্ষুণ্ণ ৰাখিছে, তেওঁৰ ৰেটিং পইণ্ট আছে ৯০৪ ।

আই চি চিৰ ৰেংকিঙত ৰবীন্দ্ৰ জাডেজা আৰু ৱাশ্বিংটন সুন্দৰৰ অগ্ৰগতি-
আই চি চিৰ পুৰুষৰ বলিং ৰেংকিঙত ৰবীন্দ্ৰ জাডেজাই এটা স্থান অগ্ৰগতি লাভ কৰিছে, পূৰ্বে তেওঁ ১৫ নম্বৰ স্থানত আছিল আৰু এতিয়া ৬৮২ ৰেটিং পইণ্টেৰে ১৪ নম্বৰ স্থানলৈ আহিছে । ৮৯৮ পইণ্টেৰে শীৰ্ষ স্থানত আছে যশপ্ৰীত বুমৰাহ ।

পুৰুষৰ টেষ্ট অল ৰাউণ্ডাৰ ৰেংকিঙত ডাঙৰ জাঁপ মাৰিছে ৱাশ্বিংটন সুন্দৰে, তেওঁ ৮ টা স্থান আগবাঢ়িছে । মেট হেনৰীৰ সৈতে যৌথভাৱে ১৩ নম্বৰত আছে । মানচেষ্টাৰত খেলা চতুৰ্থ টেষ্টত তেওঁ প্ৰথমটো আন্তঃৰাষ্ট্ৰীয় শতক অৰ্জন কৰে ।

চতুৰ্থ টেষ্টৰ দ্বিতীয় ইনিংছত ১০৭ ৰানৰ অপৰাজিত ইনিংছ খেলিছিল ৰবীন্দ্ৰ জাডেজাই । ৱাশ্বিংটন সুন্দৰে ১০১ ৰান সংগ্ৰহ কৰে, এইটো আছিল তেওঁৰ প্ৰথম আন্তঃৰাষ্ট্ৰীয় শতক । ইয়াৰ পূৰ্বে শুভমন গীলেও এটা শতক (১০৩) অৰ্জন কৰিছিল, যাৰ সহায়ত ভাৰতীয় দলটোৱে চতুৰ্থখন টেষ্ট ড্ৰ’ত সমাপ্ত কৰাত সফল হয় ।

তিনিটা স্থান আগুৱালে বেন ষ্টোকছে-
ইংলেণ্ড ক্ৰিকেট দলৰ অধিনায়ক বেন ষ্টোকছে চতুৰ্থ টেষ্টত ৫টা উইকেট দখল কৰাৰ লগতে শতকো অৰ্জন কৰে, তেওঁ এনে কৰা বিশ্বৰ পঞ্চমজন অধিনায়ক হিচাপে পৰিগণিত হয় । শেহতীয়া ৰেংকিঙত তেওঁ ৩টা স্থান আগুৱাইছে, এতিয়া তেওঁ ৩০১ ৰেটিং পইণ্টেৰে তৃতীয় স্থানলৈ আহিছে ।

লগতে পঢ়ক : এদিনীয়া ক্ৰিকেটত দ্ৰুততম শতক অৰ্জন কৰা শীৰ্ষ ৫ জন বেটছমেন কোন ?

আই চি চি টেষ্ট ৰেংকিঙত শীৰ্ষ ৫ গৰাকী বলাৰ কোন ?

আই চি চিয়ে প্ৰকাশ কৰিছে টেষ্ট বলাৰৰ শেহতীয়া ৰেংকিং । এই তালিকাত প্ৰথম স্থানত আছে ভাৰতীয় বেগী বলাৰ যশপ্ৰীত বুমৰাহ । আই চি চি টেষ্ট বলাৰৰ শীৰ্ষ ৫ ৰেংকিঙত বুমৰাহ একমাত্ৰ ভাৰতীয় বলাৰ । শীৰ্ষ ৫ৰ তালিকাত আছে অষ্ট্ৰেলিয়াৰ দুজন বলাৰ । একে সময়তে দক্ষিণ আফ্ৰিকা আৰু পাকিস্তান দলৰ এজন বলাৰ এই তালিকাত আছে । এইবাৰ ৰেংকিঙত এটা পৰিৱৰ্তনহে দেখা গৈছে ।

আই চি চি টেষ্ট ৰেংকিং শীৰ্ষ-৫ বলাৰ

যশপ্ৰীত বুমৰাহঃ ভাৰতীয় বলাৰ যশপ্ৰীত বুমৰাহ বিশ্বৰ অন্যতম শ্ৰেষ্ঠ বলাৰ । বৰ্তমান বুমৰাহ ৯০৭ ৰেটিংৰে প্ৰথম স্থানত আছে । শেহতীয়াকৈ ২০২৪-২৫ বৰ্ডাৰ-গাভাস্কাৰ ট্ৰফীত অষ্ট্ৰেলিয়াৰ বিৰুদ্ধে ৫খন মেচত ৩২টা উইকেট দখল কৰিছিল বুমৰাহে । ইয়াৰ পিছত ইংলেণ্ডৰ বিৰুদ্ধে ছিৰিজত প্ৰথমখন টেষ্টত পাঁচ উইকেট দখল কৰে তেওঁ ।

কাগিছ’ ৰাবাডাঃ দক্ষিণ আফ্ৰিকাৰ ফাষ্ট বলাৰ ৰাবাডা এই তালিকাত ৮৫৯ ৰেটিং পইণ্টেৰে দ্বিতীয় স্থানত আছে । শেহতীয়াকৈ অষ্ট্ৰেলিয়াৰ বিৰুদ্ধে ২০২৫ চনৰ বিশ্ব টেষ্ট চেম্পিয়নশ্বিপৰ ফাইনেলত ৰাবাডাই শক্তিশালী বলিং প্ৰদৰ্শন আগবঢ়াইছিল । যাৰ বাবে দক্ষিণ আফ্ৰিকাই এই খিতাপ দখল কৰে । ফাইনেলত ৰাবাডাই ৯টা উইকেট দখল কৰে ।

পেট কামিন্সঃ অষ্ট্ৰেলিয়াৰ অধিনায়ক পেট কামিন্স ৮৪৬ ৰেটিং পইণ্টেৰে ৰেংকিঙৰ তৃতীয় স্থানত আছে । ভাৰতৰ বিৰুদ্ধে বৰ্ডাৰ গাভাস্কাৰ ট্ৰফীত কামিন্সে ২৫টা উইকেট দখল কৰিছিল । বিশ্ব টেষ্ট চেম্পিয়নশ্বিপৰ ফাইনেলতো তেওঁ ভাল বলিং প্ৰদৰ্শন আগবঢ়াইছিল । ফাইনেলত তেওঁ ৭টা উইকেট দখল কৰে ।

জোছ হেজলউডঃ অষ্ট্ৰেলিয়াৰ বেগী বলাৰ হেজলউডে ৱেষ্ট ইণ্ডিজৰ বিৰুদ্ধে চলি থকা টেষ্ট শৃংখলাত ভাল বলিং কৰিছে । প্ৰথমখন মেচত ৫ উইকেটৰ হল লয় তেওঁ । প্ৰথমখন মেচত তেওঁ মুঠ ৭টা উইকেট দখল কৰিছিল, যাৰ বাবে তেওঁ এটা স্থান আগুৱাইছে । এতিয়া তেওঁ ৮১৭ ৰেটিং পইণ্টেৰে চতুৰ্থ স্থানত উপনীত হৈছে ।

নোমান আলীঃ পাকিস্তানী বলাৰ নোমান আলী শীৰ্ষ ৫ তালিকাৰ একমাত্ৰ স্পীন বলাৰ । ৮০৬ ৰেটিং পইণ্টেৰে পঞ্চম স্থানত আছে নোমান । তেওঁ এটা স্থান অৱনমিত হৈছে ।

লগতে পঢ়ক : সীমিত অভাৰৰ শৃংখলাৰ বাবে টীম ইণ্ডিয়াই নকৰে বাংলাদেশ ভ্ৰমণ; চৰকাৰে দিছে নিৰ্দেশ!

ঋষভ পণ্টৰ বিৰুদ্ধে আই চি চিয়ে ল’লে এই ব্যৱস্থা

ইংলেণ্ডৰ বিৰুদ্ধে লীডছত অনুষ্ঠিত হোৱা প্ৰথমখন টেষ্টৰ তৃতীয়টো দিনত আম্পায়াৰৰ সিদ্ধান্তক লৈ অসন্তুষ্টি প্ৰকাশ কৰা ভাৰতৰ উইকেটকীপাৰ বেটছমেন ঋষভ পন্টক আন্তৰ্জাতিক ক্ৰিকেট পৰিষদে সমালোচনা কৰিছে । লীডছ টেষ্টৰ দুয়োটা ইনিংছতে শতক অৰ্জন কৰি ঋষভ পণ্টে শিৰোনাম দখল কৰিছিল যদিও ইংলেণ্ডৰ প্ৰথম ইনিংছত খেলপথাৰত কৰা আচৰণৰ বাবে তেওঁক ধমক দিয়া হৈছে ।

২৭ বছৰীয়া পণ্টক আই চি চিৰ আচৰণ বিধিৰ লেভেল ১ উলংঘা কৰাৰ বাবে দোষী সাব্যস্ত কৰা হয় । আই চি চিয়ে নিজৰ বিবৃতিত কয় যে, ‘ঋষভ পণ্টক খেলুৱৈ আৰু তেওঁলোকৰ সহায়ক কৰ্মচাৰীৰ সৈতে জড়িত আই চি চিৰ আচৰণ বিধিৰ ২.৮ ধাৰা উলংঘা কৰাৰ বাবে দোষী সাব্যস্ত কৰা হৈছে, যিটো আন্তঃৰাষ্ট্ৰীয় খেলৰ সময়ত আম্পায়াৰৰ সিদ্ধান্তৰ সৈতে মতানৈক্য প্ৰকাশ কৰাৰ সৈতে জড়িত ।’ ইয়াৰ উপৰিও পণ্টৰ অনুশাসনমূলক ৰেকৰ্ডত এটা ডিমেৰিট পইণ্টো সংযোজন কৰা হৈছে, যিটো যোৱা ২৪ মাহত তেওঁৰ প্ৰথম উলংঘা আছিল ।

ইংলেণ্ডৰ ইনিংছৰ ৬১ নং অভাৰত হেৰী ব্ৰুক আৰু বেন ষ্ট’কে বেটিং কৰি থকা অৱস্থাত সংঘটিত হয় এই ঘটনা । ইয়াৰ পিছতে পণ্টে বলৰ অৱস্থাক লৈ আম্পায়াৰৰ সৈতে তৰ্ক কৰা দেখা গৈছিল ।

বল জোখা যন্ত্ৰৰ সহায়ত বলটো পৰীক্ষা কৰি আম্পায়াৰসকলে বল সলনি কৰিবলৈ অস্বীকাৰ কৰাত উইকেটকীপাৰজনে বলটো মাটিত পেলাই দি নিজৰ অসন্তুষ্টি প্ৰকাশ কৰে ।

যিহেতু পণ্টে নিজৰ দোষ স্বীকাৰ কৰিছিল আৰু আই চি চিৰ মেচ ৰেফাৰী ৰিচি ৰিচাৰ্ডছনে প্ৰস্তাৱ কৰা অনুমোদন গ্ৰহণ কৰিছিল, সেয়েহে কোনো অনুশাসনমূলক শুনানি হোৱা নাছিল ।

এই অভিযোগ উত্থাপন কৰে অন-ফিল্ড আম্পায়াৰ ক্ৰীছ গাফানী আৰু পল ৰেইফেলৰ লগতে তৃতীয় আম্পায়াৰ শ্বাৰাফুদ্দুল্লাহ ইবনে শ্বাহিদ আৰু চতুৰ্থ আম্পায়াৰ মাইক বাৰ্নছে ।

আই চি চিৰ আচৰণ বিধি লেভেল ১ ভংগ কৰিলে নূন্যতম শাস্তি হ’ল আনুষ্ঠানিক সমালোচনা, আনহাতে সৰ্বোচ্চ শাস্তি হ’ল খেলুৱৈৰ মেচ মাচুলৰ ৫০ শতাংশ জৰিমনা আৰু এটা বা দুটা ডিমেৰিট পইণ্ট ।

লগতে পঢ়ক : দ্বিতীয় ইনিংছতো দুৰ্দান্ত প্ৰদৰ্শন ঋষভ পন্টৰ; টেষ্ট কেৰিয়াৰৰ নৱমটো শতক অৰ্জন কে এল ৰাহুলৰ