আজি কেন্দ্ৰীয় লোকসেৱা আয়োগে অনুষ্ঠঠিত কৰা  অসামৰিক সেৱা পৰীক্ষাৰ চূড়ান্ত ফলাফল ঘোষণা কৰা হয় । ২০২৪ চনৰ ইউ পি এছ চি অসামৰিক সেৱা পৰীক্ষাত শীৰ্ষ স্থান দখল কৰি শক্তি ডুবেই দেশলৈ গৌৰৱ কঢ়িয়াই আনিছে । আজি প্ৰকাশ পোৱা ইউ পি এছ চি চি এছ ই পৰীক্ষাৰ ফলাফলত শক্তি ডুবেই সৰ্বভাৰতীয় ৰেংক ১ লাভ কৰিছে ।

শক্তি ডুবে উত্তৰ প্ৰদেশৰ প্ৰয়াগৰাজৰ বাসিন্দা । প্ৰয়াগৰাজৰ পৰাই স্কুল-কলেজীয়া শিক্ষা সমাপ্ত কৰে তেওঁ । শক্তিয়ে এলাহাবাদ বিশ্ববিদ্যালয়ৰ পৰা স্নাতক ডিগ্ৰী লাভ কৰিছে । তেওঁ বেনাৰস হিন্দু বিশ্ববিদ্যালয়ৰ পৰা জৈৱ ৰসায়ন বিজ্ঞানত স্নাতকোত্তৰ শিক্ষা সমাপ্ত কৰে । ২০১৬ চনত স্নাতকোত্তৰ সম্পূৰ্ণ কৰা শক্তিয়ে ২০১৮ চনৰ পৰা অসামৰিক সেৱা পৰীক্ষাৰ বাবে প্ৰস্তুতি আৰম্ভ কৰে ।

বিজ্ঞানৰ পৰা অসামৰিক সেৱালৈ যাত্ৰা-

কেন্দ্রীয় লোকসেৱা আয়োগৰ অসামৰিক সেৱা পৰীক্ষা ২০২৪ত প্রথম স্থান দখল কৰা শক্তি ডুবেই প্রমাণ কৰিছে যে কঠোৰ পৰিশ্ৰম আৰু দৃঢ় ইচ্ছাশক্তিৰে যিকোনো লক্ষ্যত উপনীত হ’ব পৰা যায় । তেওঁৰ শৈক্ষিক যাত্ৰা বিজ্ঞান ক্ষেত্ৰৰ পৰা আৰম্ভ হৈ দেশৰ সন্মানীয় পৰীক্ষাৰ শীৰ্ষত উপনীত হয় ।

২০১৮ চনৰ পৰা আৰম্ভ হৈছিল প্ৰস্তুতি-

শক্তি ডুবেই এলাহাবাদ বিশ্ববিদ্যালয়ৰ পৰা বি এছ চি কৰিছিল, তাৰ পিছত ২০১৬ চনত তেওঁ বেনাৰস হিন্দু বিশ্ববিদ্যালয়ৰ পৰা জৈৱ ৰসায়ন বিজ্ঞানত স্নাতকোত্তৰ ডিগ্ৰী লাভ কৰে । পঢ়াৰ সময়ত প্ৰশাসনিক সেৱাত যোগদান কৰাৰ সপোন দেখিছিল আৰু ২০১৮ চনৰ পৰা ইউ পি এছ চিৰ প্ৰস্তুতিৰ কামত সম্পূৰ্ণৰূপে জড়িত হৈ পৰে তেওঁ ।

তেওঁৰ ঐচ্ছিক বিষয়-

উল্লেখ্য যে বিজ্ঞানৰ ছাত্ৰী হোৱাৰ পিছতো শক্তি ডুবেই ইউ পি এছ চি পৰীক্ষাৰ বাবে ৰাজনীতি বিজ্ঞান আৰু আন্তঃৰাষ্ট্ৰীয় সম্পৰ্কৰ দৰে বিষয়ক ঐচ্ছিক বিষয় হিচাপে বাছি লৈছিল । ইউ পি এছ চি পৰীক্ষাৰ ফলাফল ঘোষণা হোৱাৰ পিছতে তেওঁৰ পৰিয়ালত আনন্দৰ জোৱাৰ উঠিছে ।

দেশৰ প্ৰশাসনক সুচাৰুৰূপে চলাই ৰখা অসামৰিক সেৱকসকলৰ অৱদান আৰু কঠোৰ পৰিশ্ৰমক স্বীকৃতি দিবলৈ প্ৰতি বছৰে ২১ এপ্ৰিলত ৰাষ্ট্ৰীয় অসামৰিক সেৱা দিৱস পালন কৰা হয় । এই দিৱসত অসামৰিক সেৱকসকলৰ পৰ্দাৰ আঁৰৰ প্ৰচেষ্টাক সন্মান জনোৱা হয় যিয়ে ৰাজহুৱা সেৱাই যাতে নাগৰিকৰ মাজলৈ যায় আৰু এক শক্তিশালী ব্যৱস্থা বজাই ৰাখে তাক সুনিশ্চিত কৰে । ২০০৬ চনত প্ৰথমবাৰৰ বাবে ৰাষ্ট্ৰীয় অসামৰিক সেৱা দিৱস উদযাপন কৰা হৈছিল ।

ভাৰত চৰকাৰে ২১ এপ্ৰিল দিনটোক ৰাষ্ট্ৰীয় অসামৰিক সেৱা দিৱস হিচাপে বাছি লৈছিল কাৰণ আজিৰ দিনটোতে দেশৰ প্ৰথমগৰাকী গৃহমন্ত্ৰী চৰ্দাৰ বল্লভভাই পেটেলে ১৯৪৭ চনত নৱনিযুক্ত প্ৰশাসনিক সেৱাৰ বিষয়াসকলক সম্বোধন কৰিছিল । এই ঐতিহাসিক অনুষ্ঠানটো দিল্লীৰ মেটকাফ হাউচত অনুষ্ঠিত হৈছিল । চৰ্দাৰ পেটেলে অসামৰিক সেৱকসকলক দেশৰ প্ৰশাসনৰ মেৰুদণ্ড বুলি অভিহিত কৰিছিল । ভাষণত তেওঁ অসামৰিক সেৱকসকলৰ বাবে সুশাসনৰ স্বৰ্ণিম নিয়ম আৰু নীতিৰ বিষয়েও ব্যাখ্যা কৰিছিল ।

চৰ্দাৰ বল্লভভাই পেটেলে সেৱকসকলক সম্বোধন কৰি এই কথা কৈছিল-

“অনুশাসনৰ লগতে আপোনালোকে এনে এক দলীয় মনোভাৱ গঢ়ি তুলিব লাগিব, যাৰ অবিহনে কোনো সেৱাৰ কোনো অৰ্থ থাকিব নোৱাৰে । যি সেৱাৰ চুক্তিত আপুনি স্বাক্ষৰ কৰিব আৰু ইয়াৰ মৰ্যাদা, সততা আৰু দুৰ্নীতিমুক্ততা সমগ্ৰ সেৱাৰ সময়ছোৱাত বজাই ৰাখিব, সেই সেৱাৰ অন্তৰ্গত হোৱাটো আপোনালোকৰ গৌৰৱান্বিত সৌভাগ্য বুলি গণ্য কৰিব লাগিব । সৰ্বোপৰি মই আপোনালোকক পৰামৰ্শ দিম যে প্ৰশাসনৰ নিৰপেক্ষতা আৰু দুৰ্নীতিমুক্ততা সম্পূৰ্ণৰূপে বজাই ৰাখিব লাগে । এজন অসামৰিক সেৱকে ৰাজনীতিত অংশ ল’ব নোৱাৰে আৰু কৰিব নালাগে । নতুবা তেওঁ সাম্প্ৰদায়িক সংঘৰ্ষত লিপ্ত হ’ব নালাগে ।”

এই দিৱস উপলক্ষে আই এ এছ এছ’চিয়েশ্যনে টুইট কৰি কয় যে তেওঁলোকে “চৰ্দাৰ পেটেলৰ শক্তিশালী, সেৱাচালিত ৰাষ্ট্ৰৰ দৃষ্টিভংগীৰ প্ৰতি নিজকে পুনৰ উৎসৰ্গা কৰিব” ।