দেশত বৃদ্ধি পোৱা নক্সালবাদ সন্দৰ্ভত দেওবাৰে কেন্দ্ৰীয় গৃহমন্ত্ৰী অমিত শ্বাহৰ এক বিবৃতি প্ৰকাশ পাইছে । তেওঁ কয় যে ২০২৬ চনৰ ৩১ মাৰ্চৰ ভিতৰত নক্সালবাদ সম্পূৰ্ণৰূপে নিৰ্মূল হ’ব । তাৰ পিছত ইয়াৰ বাবে দেশৰ কোনো নাগৰিকেই প্ৰাণ হেৰুৱাব নালাগে । উল্লেখ্য যে ছত্তীশগড়ত নিৰাপত্তা বাহিনীয়ে ৩১ নক্সালবাদীক হত্যা কৰাৰ পিছত এই মন্তব্য কৰিছে গৃহমন্ত্ৰীগৰাকীয়ে ।

অমিত শ্বাহে ল’লে এই সংকল্প-

অমিত শ্বাহে ছ’চিয়েল মিডিয়া প্লেটফৰ্ম এক্সত লিখিছে যে মই মোৰ সংকল্প দোহাৰিছো যে ২০২৬ চনৰ ৩১ মাৰ্চৰ পূৰ্বে আমি নক্সালবাদক দেশৰ পৰা সম্পূৰ্ণৰূপে নিৰ্মূল কৰিম যাতে দেশৰ কোনো নাগৰিকে ইয়াৰ বাবে নিজৰ প্ৰাণ হেৰুৱাব নালাগে ।

ভাৰত নক্সাল মুক্ত হ’ব-

গৃহমন্ত্ৰী অমিত শ্বাহে কয় যে ভাৰতক নক্সাল মুক্ত কৰাৰ দিশত ছত্তীশগড়ৰ বিজাপুৰত নিৰাপত্তা বাহিনীয়ে ডাঙৰ সফলতা লাভ কৰিছে । তেওঁ কয় যে এই অভিযানত ৩১ নক্সালবাদী নিহত হোৱাৰ লগতে বিপুল পৰিমাণৰ অস্ত্ৰ-শস্ত্ৰ আৰু বিস্ফোৰক সামগ্ৰীও উদ্ধাৰ কৰা হৈছে ।

জোৱানৰ শ্বহীদ সন্দৰ্ভতো কয় শ্বাহে-

অমিত শ্বাহে আৰু কয় যে নিৰাপত্তা বাহিনীয়েও মানৱবিৰোধী নক্সালবাদ নিৰ্মূল কৰাৰ প্ৰয়াসত তেওঁলোকৰ দুজন বীৰ জোৱানক হেৰুৱাইছে আৰু এই বীৰসকলৰ ওচৰত দেশ সদায় ঋণী হৈ থাকিব । লগতে তেওঁ কয় যে শ্বহীদ জোৱানসকলৰ পৰিয়াললৈ মোৰ আন্তৰিক সমবেদনা জ্ঞাপন কৰিছো ।

আজি (৫ ফেব্ৰুৱাৰী) দিল্লীত বিধানসভা নিৰ্বাচনৰ ভোটগ্ৰহণ অনুষ্ঠিত হৈছে । এইবাৰ বিধানসভা নিৰ্বাচনত বিজেপি, কংগ্ৰেছ আৰু আম আদমী পাৰ্টিয়ে সম্পূৰ্ণ শক্তিৰে ভোট যুদ্ধত অৱতীৰ্ণ হৈছে ।

আজি পুৱা ৭ বজাৰ পৰা দিল্লীৰ সকলো ভোটকেন্দ্ৰতে ভোটগ্ৰহণ আৰম্ভ হৈছে । সন্ধিয়া ৬ বজালৈ ভোটদান কৰিব পাৰিব ৰাইজে । ইফালে ভোটগ্ৰহণৰ পূৰ্বে প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহে ৰাইজক বিশেষ আহ্বান জনাইছে ।

প্ৰধানমন্ত্ৰী মোদী আৰু গৃহমন্ত্ৰীৰ আহ্বান-

ছ’চিয়েল মিডিয়াত প্ৰধানমন্ত্ৰী মোদীয়ে লিখিছে, “আজি দিল্লী বিধানসভাৰ নিৰ্বাচনত সকলো আসনৰ বাবে ভোটদান কৰা হ’ব । ভোটাৰসকলক মই গণতন্ত্ৰৰ এই উৎসৱত সম্পূৰ্ণ উৎসাহেৰে অংশগ্ৰহণ কৰি নিজৰ বহুমূলীয়া ভোটদান কৰিবলৈ আহ্বান জনাইছো । এই উপলক্ষে প্ৰথমবাৰৰ বাবে ভোট দান কৰা সকলো যুৱ বন্ধুবৰ্গলৈ মই মোৰ বিশেষ শুভেচ্ছা জনাইছো। মনত ৰাখিব – প্ৰথমে ভোট দিয়ক, তাৰ পিছত জলপান !”

একে সময়তে গৃহমন্ত্ৰী অমিত শ্বাহে কয়, “দিল্লী বিধানসভা নিৰ্বাচনত ভোট দিবলৈ যোৱা মোৰ ভাতৃ-ভগ্নীসকললৈ আহ্বান জনাইছো যে মিছা প্ৰতিশ্ৰুতি, প্ৰদূষিত যমুনা, সুৰাৰ দোকান, ভঙা ৰাস্তা আৰু লেতেৰা পানীৰ বিৰুদ্ধে ভোট দিয়ক । জনকল্যাণৰ এক শক্তিশালী ৰেকৰ্ড আৰু দিল্লীৰ উন্নয়নৰ বাবে এক স্পষ্ট দৃষ্টিভংগী থকা এখন চৰকাৰ সৃষ্টি কৰিবলৈ আজি উৎসাহেৰে ভোট দিয়ক । আপোনাৰ এটা ভোটই দিল্লীক পৃথিৱীৰ আটাইতকৈ উন্নত ৰাজধানী গঢ়ি তুলিব পাৰে । প্ৰথমে ভোট দিয়ক, তাৰ পিছত জলপান খাওক ।”

উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়েও ভোটদানৰ বাবে আবেদন জনায়-

উত্তৰাখণ্ডৰ মুখ্যমন্ত্ৰী পূষ্কৰ সিং ধামীয়েও ৰাইজক ভোটদানৰ আহ্বান জনাই কয় যে, “মই অনুৰোধ কৰিছো যে দিল্লীৰ সকলো জনসাধাৰণে ঘৰৰ পৰা ওলাই আহি বৃহৎ সংখ্যক ভোটদান কৰক আৰু দিল্লীত দুৰ্নীতিগ্ৰস্ত ব্যৱস্থাৰ সমাপ্তিৰ ক্ষেত্ৰত তেওঁলোকৰ অমূল্য ভূমিকা পালন কৰিবলৈ অনুৰোধ জনাইছো ।”

ইফালে নতুন দিল্লী বিধানসভা সমষ্টিৰ কংগ্ৰেছ প্ৰাৰ্থী সন্দীপ দীক্ষিতে কয় যে, “প্ৰতিটো নিৰ্বাচন গুৰুত্বপূৰ্ণ । এতিয়া মই ভোট দিবলৈ যাম । আশা কৰোঁ সকলোৱে ওলাই আহি ভোট দিব ।”