মধ্যপ্ৰাচ্যত চলি থকা সংঘাত আৰু তেল যোগানৰ প্ৰতি আহি থকা ভাবুকিৰ সন্দৰ্ভত প্ৰধানমন্ত্ৰী মোদীয়ে সকলো ৰাজ্যৰ মুখ্যমন্ত্ৰীৰ সৈতে এক গুৰুত্বপূৰ্ণ বৈঠকত মিলিত হয়।
পশ্চিম এছিয়াত চলি থকা যুদ্ধৰ মাজতে সকলো ৰাজ্যৰ মুখ্যমন্ত্ৰীসকলৰ সৈতে প্ৰধানমন্ত্ৰী নৰেন্দ্ৰ মোদীৰ এক গুৰুত্বপূৰ্ণ বৈঠক অনুষ্ঠিত হয়। মধ্যপ্ৰাচ্যত চলি থকা সংঘাত আৰু হৰমুজ প্ৰণালী বন্ধ কৰাৰ ভাবুকিক লৈ আহ্বান কৰা এই বৈঠকখন প্ৰায় দুঘণ্টা ধৰি চলিছিল।
এই বৈঠকত প্ৰধানমন্ত্ৰী মোদীয়ে ৰাজ্যৰ মুখ্যমন্ত্ৰীসকলক স্পষ্ট বাৰ্তা প্ৰদান কৰি কয় যে আমি ‘টিম ইণ্ডিয়া’ হিচাপে কাম কৰিব লাগিব।তদুপৰি সাম্প্ৰতিক সংকটৰ বাবে দেশত কোনো ধৰণৰ লকডাউন নহ’ব বুলি স্পষ্ট কৰি দিছে।
প্ৰায় দুঘণ্টা ধৰি চলি থকা এই বৈঠকৰ প্ৰধান উদ্দেশ্য আছিল বিশ্ব সংকটৰ সময়টো দেশত পেট্ৰ’ল, ডিজেল, অত্যাৱশ্যকীয় সামগ্ৰীৰ যোগানত ব্যাঘাত জন্মাব নালাগে, আৰু ইয়াৰ বোজা সাধাৰণ জনতাৰ ওপৰত পৰিব নালাগে।
মাত্ৰ কেইদিনমানৰ পূৰ্বে প্ৰধানমন্ত্ৰী মোদীয়ে দেশবাসীক সকীয়াই দিছিল যে মধ্যপ্ৰাচ্যৰ এই সংকটে ভাৰতৰ বাবে দীৰ্ঘম্যাদী প্ৰত্যাহ্বানৰ সৃষ্টি কৰিব পাৰে।কেন্দ্ৰীয় চৰকাৰে নিজৰ ফালৰ পৰা সম্ভৱপৰ প্ৰতিটো পদক্ষেপ গ্ৰহণ কৰিছে,কিন্তু তৃণমূল পৰ্যায়ত এই আঁচনিসমূহ সফল কৰাৰ প্ৰকৃত দায়িত্ব ৰাজ্যসমূহৰ কান্ধত নিহিত হৈ আছে।
সেই কাৰণে প্ৰধানমন্ত্ৰী গৰাকীয়ে মুখ্যমন্ত্ৰীসকলৰ ওচৰত আবেদন জনাইছে যে তেওঁলোকে নিজৰ নিজৰ ৰাজ্যত এনে ব্যৱস্থা কৰিব লাগে যাৰ দ্বাৰা সাধাৰণ মানুহৰ প্ৰয়োজনীয় বস্তুক লৈ কোনো প্ৰভাৱ নপৰে।তেওঁ সোঁৱৰাই দিয়ে যে যেতিয়া দেশ সংকটত পৰে, তেতিয়া কেন্দ্ৰ আৰু ৰাজ্যসমূহে একেলগে এটা পৰিয়ালৰ দৰে যুঁজিব লাগিব।
লগতে পঢ়ক: ‘হৰমুজৰ পৰা চাৰিখন টেংকাৰ আহিছে’; বৈদেশিক পৰিক্ৰমা মন্ত্ৰালয়ৰ ডাঙৰ তথ্য
