এতিয়াৰে পৰা ইনষ্টাগ্ৰাম, ফেচবুক আৰু হোৱাটছএপ ব্যৱহাৰ কৰাৰ অভিজ্ঞতা সম্পূৰ্ণ সলনি হ’বলৈ গৈ আছে
ছ’চিয়েল মিডিয়া জায়ান্ট মেটা (Meta)-ই ব্যৱহাৰকাৰীসকলৰ বাবে এক ডাঙৰ ঘোষণা কৰিছে । এতিয়াৰে পৰা ইনষ্টাগ্ৰাম, ফেচবুক আৰু হোৱাটছএপ ব্যৱহাৰ কৰাৰ অভিজ্ঞতা সম্পূৰ্ণ সলনি হ’বলৈ গৈ আছে, কাৰণ কোম্পানীটোৱে এই জনপ্ৰিয় এপসমূহৰ বাবে নতুন পেইড চাবস্ক্ৰিপচন প্লেন মুকলি কৰিছে । ভাৰতসহ সমগ্ৰ বিশ্বৰ ব্যৱহাৰকাৰীসকলৰ বাবে এই প্লেনসমূহ অনা হৈছে ।
মেটাই এতিয়া নিজৰ এপ্পসমূহৰ বাবে ‘প্লাছ সংস্কৰণ’ (Plus version) মুকলি কৰিবলৈ লৈছে । ইয়াৰ জৰিয়তে ধন পৰিশোধ কৰা গ্ৰাহকসকলে কিছুমান এনেকুৱা এক্সক্লুচিভ সঁজুলি আৰু কাষ্টমাইজেশ্যন ফিচাৰ লাভ কৰিব, যিবোৰ সাধাৰণ বা বিনামূলীয়া সংস্কৰণত উপলব্ধ নহ’ব ।
কেৱল বিজ্ঞাপনৰ ওপৰত নিৰ্ভৰশীলতা নহয়, উপাৰ্জন বৃদ্ধিৰ নতুন লক্ষ্য মেটাৰ এই পৰিকল্পনাৰ মূল উদ্দেশ্য হৈছে নিজৰ ৰাজহ বা উপাৰ্জন বৃদ্ধি কৰা । কোম্পানীটোৰ এই পদক্ষেপৰ পৰা স্পষ্ট হৈ পৰিছে যে এতিয়া তেওঁলোকে উপাৰ্জনৰ বাবে কেৱল বিজ্ঞাপনৰ ওপৰত নিৰ্ভৰ কৰি থাকিব নিবিচাৰে । তাৰ পৰিৱর্তে এক নতুন পথৰ সন্ধান কৰিছে, য’ত ব্যৱহাৰকাৰীসকলে প্ৰিমিয়াম ফিচাৰ্চ, উন্নত অভিজ্ঞতা আৰু অধিক দৰ্শক (Audience reach) লাভ কৰিবলৈ প্ৰতি মাহে এটা নিৰ্দিষ্ট পৰিমাণৰ ধন পৰিশোধ কৰিব লাগিব ।
ফেচবুক, ইনষ্টাগ্ৰাম আৰু হোৱাটছএপ প্লাছৰ মূল্য আন্তঃৰাষ্ট্ৰীয় বজাৰত ইনষ্টাগ্ৰাম প্লাছ আৰু ফেচবুক প্লাসৰ মাহিলী মূল্য ৩.৯৯ ডলাৰ (প্ৰায় ৩৮৭ টকা) ধাৰ্য কৰা হৈছে । আনহাতে, হোৱাটছএপ প্লাসৰ মাহিলী মূল্য ২.৯৯ ডলাৰ (প্ৰায় ২৯০ টকা) ৰখা হৈছে । অৱশ্যে, মেটাই এতিয়ালৈকে ভাৰতীয় বজাৰৰ বাবে ইয়াৰ নিৰ্দিষ্ট মূল্য ঘোষণা কৰা নাই ।
হোৱাটছএপ প্লাছত কি কি বিশেষ সুবিধা লাভ কৰিব ?
‘টেক ক্ৰাঞ্চ’ৰ ৰিপৰ্ট অনুসৰি, হোৱাটছএপ প্লাছৰ গ্ৰাহকসকলে মূলতঃ পাৰ্চনেলাইজেচন মেচেজিঙৰ ওপৰত ভিত্তি কৰি কেইবাটাও শক্তিশালী ফিচাৰ পাব । ইয়াৰ ভিতৰত কাষ্টম থিম, ইউনিক ৰিংট’ন, প্ৰিমিয়াম ষ্টিচকাৰ আৰু পূৰ্বতকৈ অধিক চেট্ পিন কৰি থোৱাৰ সুবিধা অন্তৰ্ভুক্ত আছে ।
ফেচবুক আৰু ইনষ্টাগ্ৰাম প্লাছৰ বিশেষ ফিচাৰসমূহ ইনষ্টাগ্ৰাম প্লাছ আৰু ফেচবুক প্লাছৰ গ্ৰাহকসকলৰ বাবে প্ৰফাইল কাষ্টমাইজেশ্যন আৰু এডভান্সড টুলচৰ ব্যৱস্থা কৰা হৈছে । ইনষ্টাগ্ৰাম প্লাছত ব্যৱহাৰকাৰীসকলে তেওঁলোকৰ ষ্ট’ৰী কোনে কোনে আৰু কিমানবাৰ পুনৰ চাইছে সেয়া সহজে চাব পাৰিব । লগতে ‘ক্ল’জ ফ্ৰেণ্ডচ’ ফিচাৰৰ সহায়ত আনলিমিটেড ষ্ট’ৰী অডিয়েন্স লিষ্ট বনাব পাৰিব আৰু দৰ্শকৰ তালিকাত নিজৰ নাম নোলোৱাকৈয়ে আনৰ ষ্ট’ৰীৰ প্ৰিভিউ চাব পাৰিব ।
ইয়াৰ উপৰি, ব্যৱহাৰকাৰীসকলে ২৪ ঘণ্টাতকৈ অধিক সময়লৈকে নিজৰ ষ্ট’ৰী দেখুওৱাৰ বিকল্প পাব । প্ৰতি সপ্তাহত এটা ষ্ট’ৰীক ‘স্পটলাইট’ কৰিব পৰা যাব যাতে সেইটোৱে অধিক দৰ্শকৰ দৃষ্টি আকৰ্ষণ কৰিব পাৰে । লগতে ষ্ট’ৰীৰ ভিউৱাৰ্চ লিষ্টত ছাৰ্চ কৰাৰ সুবিধাও থাকিব । কছমেটিক আপগ্ৰেড হিচাপে ইনষ্টাগ্ৰাম প্লাসত এনিমেটেড ছুপাৰ হাৰ্ট ৰিয়েকচন, কাষ্টম এপ আইকন, বায়’ৰ বাবে বিশেষ ফণ্ট আৰু অধিক প্ৰফাইল পিন কৰাৰ দৰে সুবিধা দিয়া হৈছে ।
মেটা ভেৰিফাইডতকৈ সম্পূৰ্ণ সুকীয়া এই প্লেন মন কৰিবলগীয়া যে মেটাৰ এই নতুন চাবস্ক্ৰিপচন প্লেনসমূহ বৰ্তমান চলি থকা মেটা ভেৰিফাইডতকৈ সম্পূৰ্ণ সুকীয়া । মেটা ভেৰিফাইড হৈছে কোম্পানীটোৰ বৰ্তমানৰ পেইড চাৰ্ভিচ, য’ত কেৱল আইডেন্টিটি ভেৰিফিকেচন (পৰিচয় পত্ৰ পৰীক্ষণ) আৰু কাষ্টমাৰ চাপৰ্ট আদিহে উপলব্ধ থাকে ।
এআই ব্যৱহাৰকাৰীৰ বাবে ‘Meta One’ প্লেন মেটাই ছ’চিয়েল মিডিয়া এপৰ উপৰিও ‘Meta One’ নামেৰে এআই (AI), ক্ৰিয়েটৰ আৰু বিজনেচ ফ’কাচড্ প্লেনো মুকলি কৰিছে । ইয়াৰ অধীনত মেটা এআই চাবস্ক্ৰিপচন প্লেনক দুটা ভাগত বিভক্ত কৰা হৈছে । প্ৰথমটো হৈছে ‘মেটা ৱান প্লাস’, যাৰ মাহিলী মূল্য ৭.৯৯ ডলাৰ (প্ৰায় ৭৫৫ টকা)। যিসকলে মেটা এআই ব্যৱহাৰ কৰি প্ৰচুৰ পৰিমাণে ইমেজ বা ভিডিঅ’ তৈয়াৰ কৰে আৰু দীঘলীয়া ৰিজনিং টাস্ক সম্পূৰ্ণ কৰে, তেওঁলোকৰ বাবে এই প্লেনটো প্ৰস্তুত কৰা হৈছে । দ্বিতীয়টো হৈছে ‘মেটা ৱান প্ৰিমিয়াম’, যাৰ মাহিলী মূল্য ১৯.৯৯ ডলাৰ (প্ৰায় ১,৯৩৯ টকা)। ইয়াত সৰ্বোচ্চ ব্যৱহাৰৰ সীমা অধিক পোৱা যাব ।
অৱশ্যে, সাধাৰণ ব্যৱহাৰকাৰীৰ বাবে Meta AI চ্যাটবটৰ বিনামূলীয়া ব্যৱহাৰ পূৰ্বৰ দৰেই জাৰি থাকিব । কিন্তু ইমেজ আৰু ভিডিঅ’ বনোৱাৰ এটা নিৰ্দিষ্ট সীমা শেষ হোৱাৰ পিছত এই পেইড প্লেন লোৱাটো বাধ্যতামূলক হৈ পৰিব, যদিও এই সৰ্বোচ্চ সীমাৰ বিষয়ে মেটাই এতিয়ালৈকে স্পষ্টকৈ একো জনোৱা নাই ।
ক্ৰিয়েটৰ আৰু ব্যৱসায়ীসকলৰ বাবেও নতুন সুবিধা ক্ৰিয়েটৰ আৰু ব্যৱসায়মুখী ব্যৱহাৰকাৰীসকলৰ বাবে মেটাই দুটা বিশেষ প্লেন আনিছে । তাৰে প্ৰথমটো হ’ব ‘Meta One Essential’, যাৰ মাহিলী মূল্য ১৪.৯৯ ডলাৰ (প্ৰায় ১,৪৫৪ টকা)। ইয়াত ভেৰিফিকেচন বেনিফিটচ, উন্নত প্ৰফাইল লিংক আৰু ক্ৰিয়েটৰসকলে নিজকে বিভিন্ন ছ’চিয়েল মিডিয়া প্লেটফৰ্ম তথা ৱেব প’ৰ্টেলত প্ৰচাৰ কৰাৰ সুবিধা পাব ।
আনহাতে, ইনফ্লুৱেঞ্চাৰ আৰু ডাঙৰ বিজনেচসমূহৰ বাবে ‘Meta One Advanced’ প্লেনটো প্ৰস্তুত কৰা হৈছে । ইয়াৰ জৰিয়তে ব্যৱহাৰকাৰীসকলে ফেচবুক ফীড আৰু ছাৰ্চ ৰিজাল্টত অগ্ৰাধিকাৰ পাব, যাৰ ফলত তেওঁলোকৰ পোষ্টসমূহ অতি সহজে অধিক দৰ্শকৰ ওচৰলৈ যাব পাৰিব ।
লগতে পঢ়ক : মঙলৰ অতি কাষেৰে পাৰ হৈ গ’ল নাছাৰ ‘চাইকী’, প্ৰেৰণ কৰিলে ৰঙা গ্ৰহটোৰ বিৰল ছবি
