প্ৰাকৃতিক গেছ কঢ়িয়াই অনা ‘দিশা’ নামৰ এখন বিশাল জাহাজ গুজৰাটৰ ডাহেজ বন্দৰত সুৰক্ষিতভাৱে উপস্থিত হয়
পশ্চিম এছিয়াৰ উত্তেজনাময় পৰিস্থিতিৰ মাজতে ভাৰতৰ বাবে এটা স্বস্তিদায়ক খবৰ । শুকুৰবাৰে পুৱাৰ ভাগত ৬২,৩৭০ মেট্ৰিক টন তৰলীকৃত প্ৰাকৃতিক গেছ (LNG) কঢ়িয়াই অনা ‘দিশা’ নামৰ এখন বিশাল জাহাজ গুজৰাটৰ ডাহেজ বন্দৰত সুৰক্ষিতভাৱে উপস্থিত হয় । ভাৰূচ বন্দৰ কৰ্তৃপক্ষই প্ৰকাশ কৰা অনুসৰি, জাহাজখনে পেট্ৰ’নেট এল এন জি জেটীত সফলতাৰে লংগৰ পেলাইছে ।
হৰমুজ প্ৰণালী অতিক্ৰম কৰি ডাঙৰ সফলতা
সম্প্ৰতি পশ্চিম এছিয়াত সৃষ্টি হোৱা ভূ-ৰাজনৈতিক উত্তেজনাৰ পৰিপ্ৰেক্ষিতত এই জাহাজখনৰ যাত্ৰা অতি স্পৰ্শকাতৰ আছিল । বৰ্তমান অত্যন্ত বিপজ্জনক বুলি বিবেচিত ‘হৰমুজ প্ৰণালী’ সফলতাৰে অতিক্ৰম কৰি জাহাজখনে ভাৰতীয় বন্দৰত প্ৰৱেশ কৰাটো অনাগত দিনৰ শক্তি সুৰক্ষাৰ বাবে এক গুৰুত্বপূৰ্ণ সফলতা হিচাপে দেখা গৈছে ।
সক্ৰিয় হৈ পৰিছে কেন্দ্ৰীয় চৰকাৰ
পাৰস্য উপসাগৰীয় অঞ্চলত সৃষ্টি হোৱা জটিল পৰিস্থিতিৰ ওপৰত কেন্দ্ৰীয় চৰকাৰে তীক্ষ্ণ নজৰ ৰাখিছে । বৃহস্পতিবাৰে কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰালয়ৰ সঞ্চালক ওপেশ কুমাৰ শৰ্মাই সদৰী কৰে যে পাৰস্য উপসাগৰত আৱদ্ধ হৈ থকা অন্যান্য ভাৰতীয় জাহাজ আৰু শক্তি কাৰ্গোসমূহ সুৰক্ষিতভাৱে দেশলৈ ঘূৰাই অনাৰ বাবে চৰকাৰে বিভিন্ন মন্ত্ৰালয় আৰু অংশীদাৰসকলৰ সৈতে ঘনিষ্ঠভাৱে কাম কৰি আছে ।
লগতে পঢ়ক : অব্যাহত থাকিব টেলিগ্ৰামৰ ওপৰত নিষেধাজ্ঞাঃ উচ্চ ন্যায়ালয়ত খাৰিজ আবেদন
