শেহতীয়াকৈ নিজৰ আগন্তুক ছবি ‘ভাৰত ভাগ্য বিধাতা’ৰ ট্ৰেইলাৰ মুকলি অনুষ্ঠানত উপস্থিত থকা কংগনা ৰাণাৱটক সংবাদ মাধ্যমে ৰণবীৰ সিঙৰ ওপৰত হোৱা এই ব্যৱস্থা সন্দৰ্ভত প্ৰশ্ন কৰিছিল
বলীউডৰ ছুপাৰষ্টাৰ ৰণবীৰ সিঙক লৈ চিনেমা জগতত সৃষ্টি হোৱা ‘ডন ৩’ বিতৰ্কই এতিয়া এক নতুন মোৰ লৈছে । ছবিখনৰ পৰা ৰণবীৰ হঠাতে বাদ পৰাৰ পিছত আৰম্ভ হোৱা এই বিবাদে ইমানেই গুৰুতৰ ৰূপ ধাৰণ কৰিছে যে বলীউডৰ অন্যতম শক্তিশালী সংস্থা FWICE (ফেডাৰেচন অব্ ৱেষ্টাৰ্ণ ইণ্ডিয়া চিনে এম্প্লইজ)-এ অভিনেতাগৰাকীৰ বিৰুদ্ধে এক ‘অসহযোগ নিৰ্দেশনা’ (Non-cooperation directive) জাৰি কৰিবলগীয়া হৈছে । এই পৰিস্থিতিৰ মাজতে এতিয়া এণ্ট্ৰী ঘটিছে বিতৰ্কিত অভিনেত্ৰী তথা সাসংদ কংগনা ৰাণাৱটৰ । ৰণবীৰৰ সমৰ্থনত থিয় দি কংগনাই আকৌ এবাৰ নিজৰ মন্তব্যৰে খলকনি তুলিছে ।
কংগনাৰ বিস্ফোৰক মন্তব্য : “মৰ্যাদা বাঢ়িলে শত্ৰুও বাঢ়িবই!”
শেহতীয়াকৈ নিজৰ আগন্তুক ছবি ‘ভাৰত ভাগ্য বিধাতা’ৰ ট্ৰেইলাৰ মুকলি অনুষ্ঠানত উপস্থিত থকা কংগনা ৰাণাৱটক সংবাদ মাধ্যমে ৰণবীৰ সিঙৰ ওপৰত হোৱা এই ব্যৱস্থা সন্দৰ্ভত প্ৰশ্ন কৰিছিল । সদায় নিজৰ স্পষ্ট কথাৰ বাবে জনাজাত কংগনাই কোনো কুণ্ঠাবোধ নকৰাকৈ ক’লে-
“এনেকুৱা কেতিয়াও হ’ব নোৱাৰে যে আপোনাৰ মৰ্যাদা বা স্থান বৃদ্ধি পাব আৰু আপোনাৰ শত্ৰু নাবাঢ়িব । আজি ৰণবীৰ সিঙে ভাবিব লাগে যে তেওঁৰ স্থান বৰ্তমান কি পৰ্যায়ত আছে, যাৰ বাবে তেওঁৰ ইমান শত্ৰু সৃষ্টি হৈছে ।”
নিজৰ কেৰিয়াৰৰ সংগ্ৰামৰ কথা উল্লেখ কৰি কংগনাই ৰণবীৰক সান্ত্বনা দি লগতে কয়- “যেতিয়া আপুনি জীৱনত আগবাঢ়ি যায়, তেতিয়া বিভিন্ন ধৰণৰ বাধা-বিঘিনি আহে । আপুনি সদায় পোন বাটটো নাপায় । মোৰ লগতো বহুত কিবাকিবি ঘটিছে, কিন্তু চাওক আজি মই ক’ত আছোঁ । মোৰ গাড়ীখনো ভালেই চলি আছে । শেষত সকলো ঠিক হৈ যায় ।”
আচলতে কি হৈছিল ?
জানিব পৰা মতে, বিতৰ্কৰ সূত্ৰপাত হৈছিল যেতিয়া খবৰ ওলাইছিল যে ৰণবীৰ সিঙক ‘ডন ৩’ৰ পৰা বাহিৰ হৈছে । ছবিখনৰ প্ৰযোজক ফাৰহান আখতাৰ আৰু এক্সেল এণ্টাৰটেইনমেণ্টে অভিযোগ উত্থাপন কৰিছে যে ৰণবীৰে কোনো আগতীয়া জাননী নিদিয়াকৈ হঠাতে এই মেগা প্ৰজেক্টটোৰ পৰা আঁতৰি গৈছিল ।
ছবিখনৰ শ্বুটিং আৰম্ভ হোৱাৰ পূৰ্বৰ প্ৰস্তুতি অৰ্থাৎ প্ৰাক-প্ৰডাকচনৰ (Pre-production) কামত ইতিপূৰ্বেই কোটি কোটি টকা ব্যয় কৰা হৈছিল । ৰণবীৰৰ এই আকস্মিক সিদ্ধান্তৰ বাবে প্ৰডাকচন হাউচটোৰ প্ৰায় ৪৫ কোটি টকা লোকচান হোৱা বুলি দাবী কৰা হৈছে ।
এই লোকচানৰ পিছতে নিৰ্মাতাসকলে চলচ্চিত্ৰ কৰ্মীসকলৰ সৰ্ববৃহৎ সংস্থা FWICE-ৰ দ্বাৰস্থ হয় । সংস্থাই বিষয়টো গুৰুত্বসহকাৰে লৈ ৰণবীৰৰ বিৰুদ্ধে এক ‘অসহযোগ নিৰ্দেশনা’ জাৰি কৰে আৰু ইউনিয়নৰ কোনো সদস্যক অভিনেতাগৰাকীৰ সৈতে কাম নকৰিবলৈ আহ্বান জনায় ।
অৱশ্যে পিছত FWICE-ৰ মুখ্য উপদেষ্টা অশোক পণ্ডিতে স্পষ্টীকৰণ দি কয় যে এয়া কোনো আইনী “নিষিদ্ধকৰণ” নহয়, কিয়নো কোনো শিল্পীৰ ওপৰত তেনে নিষেধাজ্ঞা জাপি দিয়াৰ অধিকাৰ সংস্থাটোৰ নাই । এয়া কেৱল এক ‘অসহযোগ নিৰ্দেশনা’হে ।
ছচিয়েল মিডিয়াত তুমুল বিতৰ্ক, মৌন ৰণবীৰ-
কংগনা ৰাণাৱটৰ এই মন্তব্যৰ পিছতে সমগ্ৰ ছচিয়েল মিডিয়াত এতিয়া মিশ্ৰিত প্ৰতিক্ৰিয়া দেখিবলৈ পোৱা গৈছে । একাংশ অনুৰাগীয়ে কংগনাৰ এই সাহসিকতাক প্ৰশংসা কৰিছে, আনহাতে আন একাংশ নেটিজেনে দাবী কৰিছে যে ৰণবীৰ সিঙে আনৰ সমৰ্থন লৈ থকাতকৈ প্ৰথমে ‘ডন ৩’ বিতৰ্কৰ সন্দৰ্ভত নিজৰ স্পষ্টীকৰণ দিব লাগে ।
ইমান ডাঙৰ বিতৰ্ক আৰু অসহযোগিতাৰ নিৰ্দেশনাৰ পিছতো বৰ্তমানলৈকে ৰণবীৰ সিঙে ৰাজহুৱাকৈ কোনো মন্তব্য কৰা নাই । এতিয়া কংগনাৰ এই এণ্ট্ৰীয়ে বলীউডৰ এই ড্ৰামাটিক বিবাদক কোন দিশে লৈ যায়, সেয়া লক্ষণীয় হ’ব ।
লগতে পঢ়ক : ‘ডন ৩’ বিতৰ্কঃ ৰণবীৰ সিঙৰ ওপৰত নিষেধাজ্ঞা, ৪৫ কোটি টকাৰ ক্ষতিপূৰণ দাবী
