মুখ্যমন্ত্ৰী ড০ হিমন্ত বিশ্ব শৰ্মাই জনোৱা মতে, এইবাৰৰ অম্বুবাচী মেলাত আঠ লাখতকৈও অধিক ভক্তই অংশগ্ৰহণ কৰিছে
কামাখ্যা ধামত অনুষ্ঠিত বাৰ্ষিক অম্বুবাচী মেলা আজি, শুকুৰবাৰে মন্দিৰৰ দুৱাৰ মুকলি হোৱাৰ লগে লগে সামৰণি পৰে । দেৱীৰ আশিস ল’বলৈ পুৱাৰ ভাগৰে পৰাই হাজাৰ হাজাৰ ভক্তৰ লানি নিছিগা সোঁত পৰিলক্ষিত হয় ।
বাৰ্ষিক এই ৰীতি-নীতিৰ অংশ হিচাপে সোমবাৰে সন্ধিয়াৰ পৰাই মন্দিৰৰ দুৱাৰ বন্ধ ৰখা হৈছিল । আজি পুৱা দেৱীৰ স্নান আৰু বিশেষ পূজা-অৰ্চনাৰ অন্তত মন্দিৰৰ দুৱাৰ মুকলি কৰা হয় ।
মন্দিৰ কৰ্তৃপক্ষই জনোৱা মতে, দুৱাৰ মুকলি হোৱাৰ লগে লগে ভক্তসকলে দৰ্শনৰ বাবে ভিৰ কৰিবলৈ আৰম্ভ কৰে । এগৰাকী বিষয়াৰ মতে, “আজি সূৰ্যাস্তলৈকে মন্দিৰৰ দুৱাৰ খোলা থাকিব । আমি আশা কৰিছো যে ভক্তসকলে শান্তিপূৰ্ণভাৱে দেৱী দৰ্শন কৰিব পাৰিব ।”
মুখ্যমন্ত্ৰী ড০ হিমন্ত বিশ্ব শৰ্মাই জনোৱা মতে, এইবাৰৰ অম্বুবাচী মেলাত আঠ লাখতকৈও অধিক ভক্তই অংশগ্ৰহণ কৰিছে ।
এক্সত শ্বেয়াৰ কৰা এক বার্তাত মুখ্যমন্ত্ৰীগৰাকীয়ে কয়-
“মা কামাখ্যাৰ অম্বুবাচীৰ মহিমা আৰু ইয়াৰ আঁৰত নিহিত হৈ থকা তাৎপৰ্য অদ্বিতীয়, যাৰ সমান্তৰাল আন ক’তো দেখা নাযায় । এই উৎসৱ আমাৰ সভ্যতাৰ ঐতিহ্যত নাৰী শক্তিৰ কেন্দ্ৰীয় অৱস্থানৰ এক শ্ৰেষ্ঠ প্ৰতীক । বিগত কেইদিনমানৰ ভিতৰত ৮ লাখতকৈও অধিক ভক্তই এই অনন্য আধ্যাত্মিক পৰ্বত অংশগ্ৰহণ কৰিছে ।”
লগতে তেওঁ এই বছৰৰ মেলাত আঠ লাখতকৈও অধিক ভক্তৰ সমাগম হোৱা বুলি উল্লেখ কৰে ।
ফেচবুকত শ্বেয়াৰ কৰা এক বাৰ্তাত মুখ্যমন্ত্ৰীগৰাকীয়ে কয়-“জয় মা কামাখ্যা
পৱিত্ৰ অম্বুবাচী মহাযোগৰ সমাপ্তিৰ পাছত আজি পুনৰ ভক্তসকলৰ বাবে মুকলি হৈছে মা কামাখ্যা ধামৰ পৱিত্ৰ দ্বাৰ । নীলাচল পাহাৰত আজি পুনৰ অনুভূত হ’ল আদ্যাশক্তিৰ অপাৰ মহিমা আৰু আধ্যাত্মিক শক্তিৰ স্পন্দন । এই শুভ আৰু মংগলময় ক্ষণত মা কামাখ্যাৰ শ্ৰীচৰণত সকলোৰে সুখ-শান্তি, সমৃদ্ধি আৰু কল্যাণৰ বাবে আন্তৰিক প্ৰাৰ্থনা জনালোঁ ।“
উল্লেখ্য যে, অসমৰ অন্যতম বৃহৎ ধৰ্মীয় সমাৱেশ অম্বুবাচী মেলাই প্ৰতি বছৰে দেশ-বিদেশৰ পৰা অহা তীৰ্থযাত্ৰী, সাধু-সন্ন্যাসী আৰু পৰ্যটকক আকৰ্ষণ কৰি আহিছে । চৰকাৰী তথ্য অনুসৰি, ২০২৫ চনত এই মহোৎসৱত ৪২ গৰাকী বিদেশী নাগৰিককে ধৰি ৭,৭২,০১৯ গৰাকী লোকে অংশগ্ৰহণ কৰিছিল । ইয়াৰ বিপৰীতে ২০২৪ চনত এই মেলাত ২০ গৰাকী বিদেশী ভক্তসহ মুঠ ৭,৪৬,০৬৬ গৰাকী লোকৰ সমাগম হৈছিল ।
লগতে পঢ়ক : অসমত হ’ব বৃহৎ বিনিয়োগ! মুখ্যমন্ত্ৰী হিমন্ত বিশ্ব শৰ্মালৈ জাপানৰ ৰাষ্ট্ৰদূতৰ ফোন
