জাফৰ এক্সপ্ৰেছত আক্ৰমণ বেলুচ বিদ্ৰোহীৰ
পাকিস্তানৰ বেলুচ বিদ্ৰোহীয়ে পুনৰবাৰ জাফৰ এক্সপ্ৰেছক আক্ৰমণৰ লক্ষ্য কৰি লৈছে । মঙলবাৰে বেলুচিস্তান ৰিপাব্লিকান গাৰ্ডে দাবী কৰে যে তেওঁলোকে জাফৰ এক্সপ্ৰেছক লক্ষ্য কৰি ৰেলখনৰ কেইবাটাও ডবাক আই ই ডি বিস্ফোৰণৰ সহায়ত লাইনচ্যুত কৰে । পাকিস্তানৰ সংবাদ মাধ্যমৰ বাতৰি অনুসৰি শিকাৰপুৰ আৰু জেকবাবাদৰ মাজত অৱস্থিত চুলতান কোট অঞ্চলত এই আক্ৰমণ সংঘটিত হয় । বেলুচিস্তানে স্বাধীনতা নোপোৱালৈকে এনেধৰণৰ আক্ৰমণ অব্যাহত থাকিব বুলি ঘোষণা কৰিছে বি আৰ জিয়ে ।
ৰিম’ট নিয়ন্ত্ৰিত আই ই ডি বিস্ফোৰণেৰে এই আক্ৰমণ সংঘটিত কৰে বিদ্ৰোহীয়ে । এই বিস্ফোৰণ ইমানেই শক্তিশালী আছিল যে কেইবাটাও ৰে’লৰ ডবা লাইনচ্যুত হয় । বিদ্ৰোহীসকলে দাবী কৰিছে যে কেইবাজনো পাকিস্তানী জোৱানে জাফৰ এক্সপ্ৰেছত যাত্ৰা কৰি আছিল আৰু তেওঁলোকক লক্ষ্য কৰি এই আক্ৰমণ সংঘটিত কৰা হয় । এই আক্ৰমণত কেইবাজনো পাকিস্তানী জোৱান নিহত হোৱাৰ লগতে বহু লোক আহত হয় । বেলুচ বিদ্ৰোহীয়ে দাবী কৰিছে যে এই আক্ৰমণত ছটা ৰে’লৰ ডবা লাইনচ্যুত হয় ।
লগতে পঢ়ক : কানাডাৰ তিনিটাকৈ স্থানত গুলীচানলা; লৰেন্স বিষ্ণোই গেঙে ললে দায়িত্ব
