ভিয়েটনামত প্ৰচণ্ড বৰষুণ, ভূমিস্খলন আৰু বানৰ তাণ্ডৱ
‘বুৱানই’ ধুমুহাৰ ফলত ধাৰাবাহিকভাৱে হোৱা ধাৰাসাৰ বৰষুণে ভিয়েটনামৰ পৰিস্থিতি অধিক ভয়াৱহ কৰি তুলিছে । ইয়াৰ ফলত বহু ঠাইত বান আৰু ভূমিস্খলনৰ সৃষ্টি হৈছে । দেশখনত এই প্ৰাকৃতিক দুৰ্যোগৰ ফলত হোৱা মৃত্যুৰ সংখ্যা ১৯ জনলৈ বৃদ্ধি পোৱাৰ লগতে বহু লোক এতিয়াও সন্ধানহীন হৈ আছে । মঙলবাৰে ৰাষ্ট্ৰীয় বতৰ সংস্থাই জনাইছে যে বিগত ২৪ ঘন্টাত ভিয়েটনামৰ কিছু অঞ্চলত ৩০ চে.মি.তকৈ অধিক বৰষুণ হৈছে । ধাৰাসাৰ বৰষুণ অব্যাহত থাকিব বুলি সকীয়াই দিছে সংস্থাটোৱে ।
কেইবাদিনো হৈ থকা বৰষুণৰ ফলত বান আৰু ভূমিস্খলনৰ ফলত পথৰ সংযোগ বিচ্ছিন্ন হোৱাৰ লগতে বহু গাঁও বিচ্ছিন্ন হৈ পৰিছে । উত্তৰ দিশৰ ছন লা আৰু লাও কাই প্ৰদেশৰ পৰা মধ্য ভিয়েটনামৰ ঙে আন প্ৰদেশলৈকে সংঘটিত হৈছে এই দুৰ্যোগ । বৰষুণ আৰু বান্ধৰ পৰা এৰি দিয়া পানীৰ ফলত নদীৰ জলপৃষ্ঠ বৃদ্ধি পোৱাত উত্তৰ দিশৰ কেইবাটাও অঞ্চলত বান আৰু ভূমিস্খলনৰ সৃষ্টি হয় । য়েন বাই অঞ্চলৰ থাও নদী বিপদসীমাৰ ওপৰেৰে বৈ যোৱাৰ ফলত ঘৰ-দুৱাৰ এক মিটাৰ পৰ্যন্ত পানীৰে বুৰাই পেলোৱাৰ ফলত মানুহে ঘৰ-দুৱাৰ খালী কৰিবলগীয়া হৈছে ।
ৰাজধানী হানয়ৰ বহু ৰাস্তা বানপানীত বুৰ গৈছে । কৰ্তৃপক্ষই লাল নদীৰ সমীপৰ বাসিন্দাসকলক সাৱধানতা অৱলম্বন কৰিবলৈ সকীয়াই দিয়ে । মঙলবাৰে ৰাষ্ট্ৰীয় সংবাদ মাধ্যমে প্ৰকাশ কৰা অনুসৰি ৮জন মাছমৰীয়াকে ধৰি ১৩জন লোক এতিয়াও সন্ধানহীন হৈ আছে ।
সোমবাৰে পুৱা ভিয়েটনামৰ উপকূলত ধুমুহাই ভাবুকি আৰু অধিক বৃদ্ধি কৰে । বিশেষজ্ঞসকলে কয় যে জলবায়ু পৰিৱৰ্তনে এনে ধুমুহাক অধিক তীব্ৰতৰ কৰি তুলিছে । উষ্ণ মহাসাগৰে এই ধুমুহাবোৰক অধিক শক্তি প্ৰদান কৰে, যাৰ ফলত বিশেষকৈ পূব এছিয়াত তীব্ৰ বতাহ, অধিক প্ৰচণ্ড বৰষুণ আৰু বতৰৰ ধৰণ সলনি হয় ।
লগতে পঢ়ক : বন্ধ হৈ পৰিল ইণ্টাৰনেট; নৈতিকতাৰ নামত তালিবানৰ কঠোৰ নিয়ন্ত্ৰণ
