২ জুনত এখন জনসভাত প্ৰাক্তন মুখ্যমন্ত্ৰী মমতা বেনাৰ্জীয়ে গৃহ মন্ত্ৰালয়ৰ তথা গৃহমন্ত্ৰী অমিত শ্বাহক সাঙুৰি উচতনিমূলক মন্তব্য দিছিলে।
গৃহ মন্ত্ৰালয়ক লৈ উচটনিমূলক মন্তব্য দিয়াৰ গোচৰত পশ্চিম বংগৰ প্ৰাক্তন মুখ্যমন্ত্ৰী মমতা বেনাৰ্জীৰ বিৰুদ্ধে এজাহাৰ ৰুজু কৰা হৈছে। বৃহস্পতিবাৰে আৰক্ষীয়ে জানিবলৈ দিয়ে যে শিলিগুড়ি চাইবাৰ ক্ৰাইম থানাত এজন অধিবক্তাৰ অভিযোগৰ ভিত্তিত এই গোচৰ ৰুজু কৰা হৈছে।
এই অভিযোগ যোৱা ২ জুনত কলকাতাৰ ৰাণী ৰাছমণি ৰোডত এক প্ৰতিবাদী সভাৰ সময়ত মমতা বেনাৰ্জীয়ে কৰা মন্তব্যৰ সৈতে জড়িত। য’ত তেওঁ বাংলাদেশী নাগৰিক উচমান হাদীৰ হত্যাকাণ্ডৰ উল্লেখ কৰিছিল আৰু ইয়াত কেন্দ্ৰীয় গৃহ মন্ত্ৰালয় তথা গৃহমন্ত্ৰী অমিত শ্বাহক সাঙুৰি বক্তব্য দিছিল।
অধিবক্তা ৰিংকী সেন চেটাৰ্জীয়ে মমতাৰ বিৰুদ্ধে এই অভিযোগ দাখিল কৰিছে। তেওঁ অভিযোগ কৰে যে উচমান হাদীৰ হত্যাকাণ্ড যোৱা ডিচেম্বৰ মাহত বাংলাদেশত সংঘটিত হৈছিল। হাদীৰ হত্যাকাৰীদ্বয় মেঘালয় সীমান্ত অতিক্ৰম কৰি জানুৱাৰী মাহত পশ্চিম বংগলৈ আহিছিল আৰু ৰাজ্যখনৰ স্পেচিয়েল টাস্ক ফ’ৰ্চে (STF) তেওঁলোক দুয়োকে গ্ৰেপ্তাৰ কৰিছিল। মমতা বেনাৰ্জীয়ে ২ জুনত এখন সভাত ভাষণ প্ৰসংগত এই বিষয়টো উত্থাপন কৰে আৰু ইংগিত দিয়ে যে হত্যাকাণ্ডটো আন এখন দেশত সংঘটিত হ’লেও ইয়াত কোন জড়িত আছে তেওঁ জানে। ইয়াৰ বাবে তেওঁ গৃহ মন্ত্ৰালয়ক দোষাৰোপ কৰে।
দৰাচলতে মমতা বেনাৰ্জীয়ে ২ জুনত এখন জনসভাত কৈছিল যে, “এছটিএফে বাংলাদেশৰ পৰা এজন অভিযুক্তক গ্ৰেপ্তাৰ কৰিছিল, যাৰ বাবে তাত তীব্ৰ প্ৰতিবাদৰ সূচনা হৈছিল। মই আন দেশৰ কথা কোৱা নাই, কিন্তু কথাটো হ’ল এনে লোক মেঘালয় হৈ বংগত প্ৰৱেশ কৰে। ইয়াত উপস্থিত হোৱাৰ পিছত এছটিএফে তেওঁলোকক গ্ৰেপ্তাৰ কৰে। স্বয়ং গৃহমন্ত্ৰীয়েই এই কথা কৈছে। মই বহুদিন ধৰি এই কথা কোৱা নাছিলো, কিন্তু আজি মই এই কথা কৈছো।”
ৰিংকী সেনে কয় যে যেতিয়া মমতা বেনাৰ্জী মুখ্যমন্ত্ৰী আছিল, তেতিয়া তেওঁ এই বিষয়টো পোনপটীয়াকৈ গৃহ মন্ত্ৰালয়ৰ সৈতে উত্থাপন কৰিব পাৰিলেহেঁতেন। সেনৰ তৰফৰ পৰা কোৱা হৈছে যে কিন্তু এতিয়া তেওঁ দাবী কৰিছে যে বাংলাদেশত সংঘটিত হোৱা এটা হত্যাকাণ্ড গৃহ মন্ত্ৰালয়ৰ নিৰ্দেশত সংঘটিত এক পৰিকল্পিত হত্যাকাণ্ড আছিল। এনেধৰণৰ অভিযোগ উত্থাপন কৰি তেওঁ ভাৰত আৰু বাংলাদেশৰ মাজত উত্তেজনা বৃদ্ধি কৰিছে আৰু বিশ্বজুৰি দেশৰ ভাবমূৰ্তি ক্ষুণ্ণ কৰিছে। তেওঁৰ মন্তব্যই বাংলাদেশত হিন্দুসকলৰ নিৰাপত্তা বিপন্ন কৰি তুলিছে। সেনে লগতে কয় যে মমতা বেনাৰ্জীয়ে মুখ্যমন্ত্ৰীৰ পদত থকাৰ সময়ত দেশৰ গোপনীয়তা ৰক্ষা কৰাৰ শপত লৈছিল, কিন্তু পদত্যাগ কৰাৰ পিছত তেওঁ মৌলবাদী শক্তিক উচতনি দিছে।
লগতে পঢ়ক: পতনৰ পথত টিএমচি! ৫৯ জন বিধায়কৰ সমৰ্থন দাবী কৰি বিধানসভাত উপস্থিত বহিষ্কৃত বিধায়ক
