শেহতীয়াকৈ প্ৰাক্তন ছাত্ৰ নেতা শংকৰজ্যোতি বৰুৱাক লৈ সামাজিক মাধ্যমৰ লগতে ৰাজ্যৰ ৰাজনৈতিক মহলত তীব্ৰ চৰ্চা পৰিলক্ষিত হৈছে । অনতিপলমে সক্ৰিয় ৰাজনীতিত খোজ পেলাবলৈ সাজু হোৱা প্ৰাক্তন ছাত্ৰ নেতাগৰাকীক লক্ষ্য কৰি যুৱতীগৰাকীয়ে দিয়া বিশেষ ফেচবুক পোষ্ট কিয় ডিলিট কৰিব লগা হ’ল বুলিও এতিয়া একাংশই প্ৰশ্ন উত্থাপন কৰিছে ।
ছাত্ৰ সংগঠনৰ মজিয়াৰ পৰা এইবাৰ সক্ৰিয় ৰাজনীতিৰ পথাৰত খোজ পেলাবলৈ সাজু হৈছে সদৌ অসম ছাত্ৰ সন্থাৰ (আছু) প্ৰাক্তন সাধাৰণ সম্পাদক শংকৰজ্যোতি বৰুৱা । বহুদিনীয়া চৰ্চাৰ অন্তত অৱশেষত শনিবাৰে শংকৰজ্যোতি বৰুৱাই আনুষ্ঠানিকভাৱে ভাৰতীয় জনতা পাৰ্টিত (বিজেপি) যোগদান কৰাটো প্ৰায় নিশ্চিত হৈছে ।
খবৰ অনুসৰি, শনিবাৰে বশিষ্ঠস্থিত ৰাজ্যিক বিজেপিৰ মুখ্য কাৰ্যালয়ত আয়োজিত এক যোগদান কাৰ্যসূচীত কেইবাজনো প্ৰাক্তন সতীৰ্থৰ সৈতে তেওঁ গেৰুৱা দলটোত আনুষ্ঠানিকভাৱে যোগদান কৰিব । ৰাজ্যিক বিজেপিৰ শীৰ্ষ নেতৃত্বৰ উপস্থিতিত এই যোগদান প্ৰক্ৰিয়া সম্পন্ন হোৱাৰ সম্ভাৱনা আছে ।
উল্লেখ্য যে, বৃহস্পতিবাৰে শংকৰজ্যোতি বৰুৱাই সামাজিক মাধ্যমযোগে শীঘ্ৰেই নিজৰ নতুন ৰাজনৈতিক যাত্ৰা আৰম্ভ কৰাৰ কথা ঘোষণা কৰিছিল । তেওঁৰ এই পোষ্টটোৰ পিছতেই অসমৰ ৰাজনৈতিক মহলত তীব্ৰ চৰ্চা আৰম্ভ হৈছিল । এই পোষ্টৰ পিছতে একাংশই তেওঁক সমালোচনাও কৰিছিল । বহুতে তেওঁ বিজেপি নে আন দলত যোগদান কৰিব তাক লৈ অংক কৰিছিল যদিও শেহতীয়া খবৰে স্পষ্ট কৰিছে যে তেওঁ গেৰুৱা শিবিৰকেই বাচি লৈছে । ইয়াৰ পিছতেই এটা বিশেষ ফেচবুক পোষ্টে সূচনা কৰে এক বিতৰ্কৰ ।
কি আছিল সেই পোষ্টত?
শংকৰজ্যোতি বৰুৱাই বিজেপিত যোগদান কৰিব বুলি চলা চৰ্চাৰ মাজতেই সামজিক মাধ্যমত আৱিৰ্ভাৱ হয় এক বিশেষ ফেচবুক পোষ্ট । এগৰাকী যুৱতীয়ে শংকৰজ্যোতি বৰুৱাক লক্ষ্য কৰি দিয়া এই বিশেষ ফেচবুক পোষ্টে বিতৰ্কৰ সূচনা কৰে । শংকৰজ্যেতি বৰুৱাৰ বিৰুদ্ধে বিস্ফোৰক অভিযোগ উত্থাপন কৰি তেওঁক বিজেপি দলত অন্তৰ্ভূক্ত নকৰিবলৈ মুখ্যমন্ত্ৰী হিমন্ত বিশ্ব শৰ্মা, ৰাজ্যিক বিজেপিৰ সভাপতি দিলীপ শইকীয়া, কেন্দ্ৰীয় মন্ত্ৰী সৰ্বানন্দ সোণোৱাল আৰু পবিত্ৰ মাৰ্ঘেৰিটাক আহ্বান জনাই যুৱতীগৰাকীয়ে । কিন্তু ভাইৰেল হোৱাৰ কিছু সময়ৰ পিছতেই যুৱতীগৰাকীৰ টাইমলাইনৰ পৰা ৰহস্যজনকভাৱে অন্তৰ্ধান হয় এই বিশেষ পোষ্ট ।
পোষ্ট ডিলিট হোৱাক লৈ প্ৰশ্ন-
ইয়াৰ পিছতেই এতিয়া একাংশই প্ৰশ্ন উত্থাপন কৰিছে যে, শংকৰজ্যোতিয়ে বিজেপি দলত যোগদান কৰাটো নিশ্চিত হোৱাৰ পিছত কোনো ৰাজনৈতিক দলৰ প্ৰৰোচনা অথবা উচতনিত এই ফেচবুক পোষ্ট দিছিল নেকি । তেওঁলোকে প্ৰশ্ন কৰিছে যে, যদি অভিযোগৰ সত্যতা আছিল তেন্তে শংকৰজ্যোতিক লক্ষ্য কৰি দিয়া এই বিশেষ ফেচবুক পোষ্ট কিয় ডিলিট কৰিলে যুৱতীগৰাকীয়ে । কোনো ৰাজনৈতিক দল তথা শক্তিৰ হেঁচা অথবা প্ৰৰোচনাত পৰি যুৱতীগৰাকীয়ে এই পোষ্ট দিছিল নেকি বুলি এতিয়া একাংশই প্ৰশ্ন উত্থাপন কৰা পৰিলক্ষিত হৈছে । ইফালে একাংশই ইয়াক ব্যক্তিগত আক্ৰোশ বুলিও অভিহিত কৰিছে ।
লগতে পঢ়ক : ‘নীতিন নৱীন মোৰ বছ, মই কাৰ্যকৰ্তা’… বিজেপিৰ নতুন সভাপতিক অভিনন্দন প্ৰধানমন্ত্ৰী মোদীৰ
