ক্ৰিকেটৰ কিংবদন্তিসকলৰ পৰা আৰম্ভ কৰি সাধাৰণ অনুৰাগীলৈকে সকলোৰে শুভেচ্ছাৰে ভৰি পৰিল আজিৰ দিনটো । ১৯৮৩ চনত ভাৰতক প্ৰথমবাৰৰ বাবে বিশ্বকাপ জয়ৰ সোৱাদ দি ইতিহাস ৰচনা কৰা কিংবদন্তি কপিল দেৱে আজি তেওঁৰ ৬৭তম জন্মদিন উদযাপন কৰিছে ।
ভাৰতীয় ক্ৰিকেটৰ উজ্জ্বল নক্ষত্ৰ তথা দেশৰ অন্যতম শ্ৰেষ্ঠ অলৰাউণ্ডাৰ কপিল দেৱে আজি নিজৰ ৬৭তম জন্মদিন উদযাপন কৰিছে। ‘হাৰিয়ানা হাৰিকেন’ হিচাপে জনাজাত এই কিংবদন্তি ক্ৰিকেটাৰগৰাকীৰ জন্মদিন উপলক্ষে দেশ-বিদেশৰ ক্ৰিকেট অনুৰাগী আৰু খেলজগতৰ বহু বিশিষ্ট ব্যক্তিৰ পৰা শুভেচ্ছাৰ ঢল বৈ আহিছে।
কপিল দেৱৰ অধিনায়কত্বতেই ভাৰতে ১৯৮৩ চনত প্ৰথমবাৰৰ বাবে ক্ৰিকেট বিশ্বকাপ জয় কৰি ইতিহাস ৰচনা কৰিছিল। বেট আৰু বলে সমান দক্ষতা দেখুৱাই তেওঁ কঠিন প্ৰত্যাহ্বানসমূহ অতিক্ৰম কৰি ভাৰতীয় দলক বিশ্বজয়ৰ শীৰ্ষত উপনীত কৰাইছিল। ফাষ্ট বলিং আৰু আগ্ৰাসী বেটিঙৰ বাবে পৰিচিত কপিল দেৱ আজিও ক্ৰিকেট অনুৰাগী তথা নতুন প্ৰজন্মৰ খেলুৱৈসকলৰ বাবে এক অনুপ্ৰেৰণাৰ উৎস।
১৯৫৯ চনৰ ৬ জানুৱাৰীত চণ্ডীগড়ত জন্মগ্ৰহণ কৰা কপিল দেৱ ৰামলাল নিখাঞ্জে ঘৰুৱা ক্ৰিকেটত চমকপ্ৰদ প্ৰদৰ্শনেৰে সকলোৰে দৃষ্টি আকৰ্ষণ কৰে। ১৯৭৮ চনৰ অক্টোবৰ মাহত তেওঁ এদিনীয়া আন্তঃৰাষ্ট্ৰীয় ক্ৰিকেটত অভিষেক ঘটোৱাৰ লগতে একে বছৰতে টেষ্ট ক্ৰিকেটতো খেলা আৰম্ভ কৰে। পাকিস্তানৰ বিৰুদ্ধে দুয়োটা ফৰ্মেটতে তেওঁৰ আন্তঃৰাষ্ট্ৰীয় অভিষেক ঘটে।
নিজৰ তৃতীয়খন টেষ্ট মেচতেই কপিলে পাকিস্তানৰ বিৰুদ্ধে মাত্ৰ ৩৩টা বলত অৰ্ধশতক অৰ্জন কৰি ভাৰতৰ দ্ৰুততম টেষ্ট অৰ্ধশতকৰ অভিলেখ গঢ়ে। ১৯৭৯–৮০ চনৰ পাকিস্তানৰ বিৰুদ্ধে ঘৰুৱা শৃংখলাত তেওঁ অলৰাউণ্ড প্ৰদৰ্শন কৰি ৩২টা উইকেট দখল কৰাৰ লগতে ২৭৮ ৰান সংগ্ৰহ কৰে। ছয়খন মেচৰ এই শৃংখলাত ভাৰতে ২–০ ব্যৱধানত জয়লাভ কৰিছিল। ফাষ্ট আৰু ছুইং বলিঙৰ লগতে মেচ-বিজয়ী ইনিংছ খেলাৰ দক্ষতাৰ বাবে কপিল দেৱ বিশেষভাৱে পৰিচিত আছিল। ইয়াৰ উপৰিও এগৰাকী উৎকৃষ্ট ফিল্ডাৰ হিচাপেও তেওঁ নিজকে প্ৰতিষ্ঠিত কৰিছিল।
১৯৮৩ চনৰ ১৮ জুনত অনুষ্ঠিত বিশ্বকাপৰ এখন মেচত জিম্বাবুৱেৰ বিৰুদ্ধে কপিল দেৱে খেলিছিল এক অবিস্মৰণীয় ইনিংছ। সেই মেচত ভাৰতে মাত্ৰ ১০৩ ৰানতে পাঁচটা উইকেট হেৰুৱাই সংকটত পৰিছিল। শীৰ্ষস্থানীয় বেটছমেনসকল ব্যৰ্থ হোৱাৰ পিছত পৰাজয় প্ৰায় নিশ্চিত যেন লাগিছিল। কিন্তু অধিনায়ক কপিল দেৱে অপৰাজিত ১৭৫ ৰানৰ এক ঐতিহাসিক ইনিংছ খেলি দলক শক্তিশালী অৱস্থালৈ লৈ যায়। ১৩৮টা বলত ছয়টা ছয় আৰু ১৬টা চাৰিৰে তেওঁ এই ইনিংছ খেলে আৰু ভাৰতে ৬০ অভাৰত ২৬৬/৮ ৰান সংগ্ৰহ কৰে।
পিছত জিম্বাবুৱে ৫৭ অভাৰত মাত্ৰ ২৩৫ ৰানতে অলআউট হয় । সেই মেচত বলিঙতো কপিল দেৱে উৎকৃষ্ট প্ৰদৰ্শন কৰি ১১ অভাৰত ৩২ ৰান খৰচ কৰি এটা উইকেট দখল কৰে। অসাধাৰণ অলৰাউণ্ড প্ৰদৰ্শনৰ বাবে তেওঁ ‘প্লেয়াৰ অৱ দ্য মেচ’ হিচাপে নিৰ্বাচিত হয় । অৱশ্যে, বি বি চিৰ ধৰ্মঘটৰ বাবে এই ঐতিহাসিক মেচখন টেলিভিছনত সম্প্ৰচাৰিত নহ’ল ।
এইদৰেই কপিল দেৱৰ নেতৃত্বত ভাৰতে ১৯৮৩ চনত প্ৰথমবাৰৰ বাবে ক্ৰিকেট বিশ্বকাপ জয় কৰি দেশৰ ক্ৰিকেট ইতিহাসত এক স্বৰ্ণালী অধ্যায় সংযোজন কৰিছিল ।
লগতে পঢ়ক : নিউজীলেণ্ডৰ বিৰুদ্ধে এদিনীয়া শৃংখলাৰ পূৰ্বে শ্ৰেয়াছ আয়াৰৰ শক্তিশালী প্ৰত্যাৱৰ্তন…
