মুখ্যমন্ত্ৰী ড° হিমন্ত বিশ্ব শৰ্মাই কংগ্ৰেছ নেতা গৌৰৱ গগৈ আৰু তেওঁৰ ব্ৰিটিছ পত্নী এলিজাবেথ কলবাৰ্ণৰ বিৰুদ্ধে এক গুৰুতৰ অভিযোগ উত্থাপন কৰিছে । মুখ্যমন্ত্ৰীয়ে জনায় যে এয়া কেৱল আৰম্ভণিহে ।
অসমৰ ৰাজনীতিত পুনৰ এক তীব্ৰ জোকাৰণিৰ সৃষ্টি কৰি মুখ্যমন্ত্ৰী ড° হিমন্ত বিশ্ব শৰ্মাই কংগ্ৰেছ নেতা গৌৰৱ গগৈ আৰু তেওঁৰ ব্ৰিটিছ পত্নী এলিজাবেথ কলবাৰ্ণৰ বিৰুদ্ধে এক গুৰুতৰ অভিযোগ উত্থাপন কৰিছে । মুখ্যমন্ত্ৰীৰ দাবী অনুসৰি, এলিজাবেথ কলবাৰ্ণৰ পাকিস্তানত এতিয়াও এটা সক্ৰিয় বেংক একাউণ্ট আছে ।
আজি আজাৰা বিমানবন্দৰ মণ্ডলৰ ৩২ নম্বৰ বুথত আয়োজিত বিজেপিৰ ‘বুথ বিজয় সভা’ত অংশগ্ৰহণ কৰি সাংবাদিকৰ আগত মুখ্যমন্ত্ৰী ড° শৰ্মাই এই বিষয়টোক অত্যন্ত “বিপজ্জনক” বুলি অভিহিত কৰে । এজন ব্যক্তিৰ পাকিস্তানৰ সৈতে এনে ধৰণৰ আৰ্থিক লেনদেন থকাৰ আঁৰত কি ৰহস্য থাকিব পাৰে, তাক লৈও তেওঁ প্ৰশ্ন উত্থাপন কৰে ।
মুখ্যমন্ত্ৰীৰ মূল অভিযোগসমূহ:
৮ ফেব্ৰুৱাৰীত অধিক তথ্য প্ৰকাশ : অসমৰ মুখ্যমন্ত্ৰীয়ে শেহতীয়া এক বিবৃতিত অহা ৮ ফেব্ৰুৱাৰীত এক বিশেষ তথ্য প্ৰকাশ কৰাৰ কথা সদৰী কৰিছে । তেওঁৰ মতে, গৌৰৱ গগৈ আৰু তেওঁৰ পৰিয়ালৰ বিৰুদ্ধে থকা ‘পাকিস্তান সংযোগ’ৰ তথ্যই বিশেষ চৰ্চা লাভ কৰিব । ইয়াক এক “ডাঙৰ বিস্ফোৰণ” আখ্যা দি তেওঁ প্ৰমাণসহ সকলো তথ্য ৰাজহুৱা কৰিব বুলি জানিবলৈ দিছে ।
আইনী ব্যৱস্থা গ্ৰহণ : যোৱা ৪ ফেব্ৰুৱাৰীত গুৱাহাটীত সংবাদমেল পাতি মুখ্যমন্ত্ৰীৰ বিৰুদ্ধে “অসত্য আৰু মানহানিকাৰক” মন্তব্য কৰাৰ বাবে গৌৰৱ গগৈ, দেৱব্ৰত শইকীয়া, জীতেন্দ্ৰ সিং আৰু ভূপেশ বাঘেলৰ বিৰুদ্ধে ৯ ফেব্ৰুৱাৰীত আইনী গোচৰ তৰিব বুলিও তেওঁ ঘোষণা কৰে ।
কংগ্ৰেছক প্ৰত্যাহ্বান : কংগ্ৰেছৰ শেহতীয়া আক্ৰমণৰ উত্তৰ দি মুখ্যমন্ত্ৰীয়ে প্ৰত্যাহ্বান জনায় যে তেওঁৰ বিৰুদ্ধে থকা যিকোনো অনিয়মৰ প্ৰমাণ দিয়ক । তেওঁ প্ৰশ্ন কৰে, “অৰুণোদয় আঁচনি দিয়া, উদ্যোগীক প্ৰসাৰিত কৰা বা ১.৫ লাখ চাকৰি দিয়াটো জানো অন্যায় ?”
কংগ্ৰেছৰ অভিযানক সমালোচনা
কংগ্ৰেছৰ নতুন অভিযান “সময় পৰিৱৰ্তনৰ”কো তীব্ৰ সমালোচনা কৰে মুখ্যমন্ত্ৰী ড° শৰ্মাই । তেওঁ কয় যে বৰ্তমান অসমত উন্নয়নৰ যি ধাৰা চলিছে, তাত নতুনকৈ পৰিৱৰ্তন কৰিবলগীয়া একো নাই । কংগ্ৰেছে কেৱল ৰাজ্যখনক পিছলৈহে লৈ যাব বিচাৰিছে বুলি তেওঁ মন্তব্য কৰে ।
একেদৰে, কংগ্ৰেছে মুকলি কৰা ৱেবচাইটটো ৩০ মিনিটৰ ভিতৰতে বিকল হোৱা ঘটনাটোক লৈয়ো তেওঁ সমালচোনা কৰে । তেওঁৰ মতে, ৰাজীৱ ভৱন এতিয়া “অসম বিৰোধী” চিন্তাধাৰাৰ কেন্দ্ৰবিন্দু হৈ পৰিছে ।
লগতে পঢ়ক : চিকেন নেক’ত ভূগৰ্ভস্থ ৰে’ল লাইন : উত্তৰ-পূবলৈ সুৰক্ষিত কৰিড’ৰৰ আশা মুখ্যমন্ত্ৰী হিমন্ত বিশ্ব শৰ্মাৰ
