প্ৰধানমন্ত্ৰীয়ে ঘোষণা কৰিছে যে দেশখনত এতিয়াৰে পৰা ১৬ বছৰতকৈ কম বয়সৰ শিশুৰ বাবে ছ’চিয়েল মিডিয়াৰ ব্যৱহাৰ সম্পূৰ্ণৰূপে নিষিদ্ধ কৰা হ’ব
শিশু আৰু কিশোৰ-কিশোৰীসকলক প্ৰযুক্তিৰ কু-প্ৰভাৱৰ পৰা ৰক্ষা কৰিবলৈ চৰকাৰে এক ঐতিহাসিক আৰু ডাঙৰ পদক্ষেপ গ্ৰহণ কৰিছে । প্ৰধানমন্ত্ৰীয়ে ঘোষণা কৰিছে যে দেশখনত এতিয়াৰে পৰা ১৬ বছৰতকৈ কম বয়সৰ শিশুৰ বাবে ছ’চিয়েল মিডিয়াৰ ব্যৱহাৰ সম্পূৰ্ণৰূপে নিষিদ্ধ কৰা হ’ব । ছ’চিয়েল মিডিয়াৰ ফলত শিশুৰ মানসিক আৰু সামাজিক জীৱনত পৰা নেতিবাচক প্ৰভাৱ দূৰ কৰাৰ বাবেই চৰকাৰে এই কঠোৰ সিদ্ধান্ত লৈছে ।
উল্লেখ্য যে, বিগত বৰ্ষত অষ্ট্ৰেলিয়াই প্ৰথমবাৰৰ বাবে কিশোৰ-কিশোৰী আৰু শিশুৰ বাবে ছ’চিয়েল মিডিয়া প্লেটফৰ্ম নিষিদ্ধ কৰিছিল, যাক ইউৰোপৰ কেইবাখনো দেশে প্ৰশংসা কৰিছিল । অলপতে কানাডায়ো শিশুৰ সুৰক্ষাৰ লক্ষ্যৰে ছ’চিয়েল মিডিয়াৰ নিয়ম সলনি কৰাৰ কথা ঘোষণা কৰিছে ।
“সহজ নাছিল এই সিদ্ধান্ত, কিন্তু শিশুৰ শৈশৱ ঘূৰাই দিবই লাগিব”
প্ৰধানমন্ত্ৰীগৰাকীয়ে ছ’চিয়েল মিডিয়া প্লেটফৰ্ম ‘X’ (পূৰ্বৰ টুইটাৰ)ত এটা পোষ্ট শ্বেয়াৰ কৰি এই সিদ্ধান্তৰ কথা সদৰী কৰে । তেওঁ স্বীকাৰ কৰে যে এই সিদ্ধান্ত গ্ৰহণ কৰাটো চৰকাৰৰ বাবে সহজ নাছিল । কিয়নো বিশ্বৰ বহু প্ৰভাৱশালী বৃহৎ টেক কোম্পানীয়ে চৰকাৰক এই সিদ্ধান্ত প্ৰত্যাহাৰ কৰিবলৈ হেঁচা প্ৰয়োগ কৰি আছে । কিন্তু সকলো হেঁচাক নেওচি চৰকাৰে এই সিদ্ধান্ত কাৰ্যকৰী কৰিবই বুলি তেওঁ স্পষ্ট কৰি দিয়ে ।
প্ৰধানমন্ত্ৰীগৰাকীয়ে কয় যে দেশৰ সৰহভাগ পিতৃ-মাতৃয়ে তেওঁলোকৰ সন্তান স্মাৰ্টফোন আৰু ইণ্টাৰনেটৰ প্ৰতি আসক্ত হৈ পৰা বুলি গভীৰ উদ্বেগ প্ৰকাশ কৰিছে । তেওঁ নিজৰ পোষ্টটোত উল্লেখ কৰে :
“আমি ১৬ বছৰতকৈ কম বয়সৰ শিশুৰ বাবে ছ’চিয়েল মিডিয়াৰ ব্যৱহাৰ নিষিদ্ধ কৰিবলৈ ওলাইছোঁ । আজিৰ যুগত শিশুসকলে নিজকে এনে এখন পৃথিৱীৰ সৈতে খাপ খুৱাব লগা হৈছে, য’ত প্ৰযুক্তিয়ে তেওঁলোকৰ জীৱনৰ প্ৰতিটো দিশতে হস্তক্ষেপ কৰিছে । মই ইয়াক আৰু চলি থাকিবলৈ দিব নোৱাৰোঁ । সেয়েহে আমি শিশুসকলক তেওঁলোকৰ শৈশৱ ঘূৰাই দিবলৈ ওলাইছোঁ ।”
টেক কোম্পানীসমূহলৈ চৰকাৰৰ কঠোৰ নিৰ্দেশনা
নতুন নিয়ম অনুসৰি, চৰকাৰে প্ৰযুক্তি প্ৰতিষ্ঠানসমূহৰ ওপৰত তীব্ৰ চাপ সৃষ্টি কৰিছে । চৰকাৰে টেক কোম্পানীসমূহক নিম্নলিখিত পদক্ষেপসমূহ ল’বলৈ কঠোৰ নিৰ্দেশ দিছে :
বয়স পৰীক্ষণ : ব্যৱহাৰকাৰীৰ সঠিক বয়স নিৰূপণৰ বাবে কঠোৰ নিয়ম প্ৰণয়ন কৰিব লাগিব ।
এলগৰিডমৰ পৰিৱৰ্তন : শিশুসকলক আকৰ্ষিত কৰা বা আসক্তি বঢ়োৱা এলগৰিডমসমূহ সলনি কৰিব লাগিব ।
অশ্লীল সমলৰ পৰা সুৰক্ষা : শিশুসকল যাতে কোনো ধৰণৰ অশ্লীল ছবি বা আপত্তিজনক সমলৰ সংস্পৰ্শলৈ নাহে, তাৰ বাবে ফলপ্ৰসূ ব্যৱস্থা গ্ৰহণ কৰিব লাগিব ।
কেৱল ছ’চিয়েল মিডিয়াই নহয়, চৰকাৰে অনলাইন গেমিং আৰু ভিডিঅ’ ষ্ট্ৰীমিং প্লেটফৰ্মত হোৱা ‘লাইভ ষ্ট্ৰীমিং’ সেৱাও শিশুসকলৰ বাবে নিষিদ্ধ কৰাৰ পৰিকল্পনা কৰিছে । চৰকাৰৰ এই ঐতিহাসিক পদক্ষেপে অনাগত দিনত বিশ্বৰ ডিজিটেল জগতত এক ডাঙৰ পৰিৱৰ্তন আনিব বুলি ধাৰণা কৰা হৈছে ।
উল্লেখ্য যে, ব্ৰিটেইন চৰকাৰে গ্ৰহণ কৰিছে এই কঠোৰ পদক্ষেপ । সামাজিক মাধ্যমৰ জৰিয়তে এই কথা ঘোষণা কৰিছে প্ৰধানমন্ত্ৰী কেইৰ ষ্টাৰমাৰে ।
লগতে পঢ়ক : “ইৰাণ-আমেৰিকাৰ শান্তি চুক্তি সম্পন্ন, শুকুৰবাৰৰ পৰা মুকলি হ’ব হৰমুজ প্ৰণালী” ; ট্ৰাম্পৰ ডাঙৰ দাবী
