পশ্চিম বংগৰ ৫৮ লাখ ২০ হাজাৰ ৮৯৮ গৰাকী ভোটাৰৰ নাম কৰ্তনৰ বাবে চিনাক্ত কৰা হৈছে ।
আজি অৰ্থাৎ মঙলবাৰে নিৰ্বাচন আয়োগে পশ্চিম বংগৰ বিশেষ পুনৰীক্ষণৰ বাবে ভোটাৰ তালিকাৰ খচৰা প্ৰকাশ কৰে । এই তালিকা অনুসৰি বংগৰ ৫৮ লাখ ২০ হাজাৰ ৮৯৮ গৰাকী ভোটাৰৰ নাম কৰ্তনৰ বাবে চিনাক্ত কৰা হৈছে । ইয়াৰে ২৪ লাখ ১৬ হাজাৰ ৮৫২ গৰাকী ভোটাৰৰ মৃত্যু হোৱাৰ বিপৰীতে ১৯ লাখৰো অধিক ভোটাৰে বংগ এৰি গৈছে ।
পশ্চিম বংগৰ মুখ্যমন্ত্ৰী মমতা বেনাৰ্জীয়ে ভোটদান কৰা বুথ মিত্ৰ ইনষ্টিটিউচনত ১২৭ জন ভোটাৰৰ নাম কৰ্তনৰ বাবে চিহ্নিত কৰা হৈছে । শুভেন্দু অধিকাৰীৰ বুথ, নন্দ নায়ক বৰ স্কুলৰ ৭৯ নং খণ্ডত মাত্ৰ ১১ জন ভোটাৰৰ নাম আঁতৰোৱা হৈছে ।
নিৰ্বাচন আয়োগে প্ৰকাশ কৰা তথ্য অনুসৰি খচৰা তালিকাৰ পৰা মুঠ ৫৮ লাখ ২০ হাজাৰ ৮৯৮ জনৰ নাম আঁতৰোৱা হৈছে । ইয়াৰে সৰ্বাধিক ২৪ লাখ ১৬ হাজাৰ, ৮৫২ জন লোকৰ মৃত্যু হৈছে । ১৯ লাখ ৮৮ হাজাৰ ৭৬ গৰাকী লোকে বংগ এৰি আন ৰাজ্যত বাস কৰি আছে । ইয়াৰ উপৰিও ১২ লাখ ২০ হাজাৰ ৩৮ গৰাকী লোক নিৰুদ্দেশ হৈছে, তেওঁলোকৰ কোনো তথ্য উপলব্ধ নহয় । ১ লাখ ৩৮ হাজাৰ ৩২৮টা নাম ডুপ্লিকেট পোৱা গৈছে আৰু ৫৭ হাজাৰ, ৬০৪টা “অন্য” শ্ৰেণীত পোৱা গৈছে । এই লোকসকলৰ নাম তালিকাৰ পৰা আঁতৰোৱাৰ বাবে চিনাক্ত কৰা হৈছে ।
এই পৰিসংখ্যা প্ৰকাশ কৰাৰ সময়তে নিৰ্বাচন আয়োগে ভোটাৰকো আবেদন জনাইছে । ইয়াত কোৱা হৈছে যে ভোটাৰসকলে নিজৰ স্থিতি পৰীক্ষা কৰিব লাগে আৰু যদি কাৰোবাৰ নাম ভুলকৈ আঁতৰাই দিয়া হৈছে তেন্তে নিৰ্দিষ্ট সময়সীমাৰ ভিতৰত আপত্তি দাখিল কৰিব লাগে । তেনে লোকে অনলাইন আৰু অফলাইন দুয়োটাতে আবেদন কৰিব পাৰিব ।
নিৰ্বাচন আয়োগে প্ৰথম পৰ্যায়ত বিহাৰত SIR অনুষ্ঠিত কৰিছিল, তাৰ পিছত দ্বিতীয় পৰ্যায়ত ১২খন ৰাজ্যত SIR অনুষ্ঠিত কৰাৰ সিদ্ধান্ত লয় । এই প্ৰক্ৰিয়াত ভোটাৰ তালিকা উন্নীতকৰণ, নতুন ভোটাৰৰ নাম সংযোজন আৰু ভুল শুধৰণি আদি জড়িত হৈ থাকে । আয়োগে প্ৰদান কৰা তথ্য অনুসৰি পশ্চিম বংগৰ কলকাতাৰ চৌৰিঘী আৰু কলকাতা বন্দৰৰ দৰে অঞ্চলৰ পৰা সৰ্বাধিক ভোট কৰ্তন হৈছে ।
লগতে পঢ়কঃ ৰাজ কুমাৰ গোৱেলক মুখ্য তথ্য আয়ুক্ত নিযুক্তি, ৰাষ্ট্ৰপতিয়ে দিলে শপত
