১৭ ফেব্ৰুৱাৰীত ৰাজনৈতিক দলসমূহৰ সৈতে বৈঠকত মিলিত হয় নিৰ্বাচন আয়োগ ।
অসমৰ স্বীকৃত ৰাষ্ট্ৰীয় আৰু আঞ্চলিক ৰাজনৈতিক দলসমূহে আগন্তুক বিধানসভা নিৰ্বাচন এটা অথবা সৰ্বাধিক দুটা পৰ্যায়ত অনুষ্ঠিত কৰিবলৈ নিৰ্বাচন আয়োগক (EC) অনুৰোধ জনাইছে । ১৭ ফেব্ৰুৱাৰীত ৰাজনৈতিক দলসমূহৰ সৈতে বৈঠকত মিলিত হয় নিৰ্বাচন আয়োগ ।
ৰাজ্যৰ নিৰ্বাচনী প্ৰস্তুতি পৰ্যালোচনা কৰিবলৈ অহা নিৰ্বাচন আয়োগৰ পূৰ্ণাংগ কমিটিৰ সৈতে মহানগৰীত অনুষ্ঠিত পৃথক পৃথক বৈঠকত দলসমূহে এই দাবী উত্থাপন কৰে । মুখ্য নিৰ্বাচন আয়ুক্ত জ্ঞানেশ কুমাৰ, নিৰ্বাচন আয়ুক্ত সুখবীৰ সিং সান্ধু আৰু বিবেক যোশীৰ সৈতে বৰ্তমান তিনিদিনীয়া ভ্ৰমণসূচীৰে অসমত আছে । ভ্ৰমণৰ দ্বিতীয় দিনা আয়োগে ৰাজ্যৰ মুখ্য নিৰ্বাচনী বিষয়া অনুৰাগ গোৱেলৰ উপস্থিতিত ৰাজনৈতিক দলসমূহৰ প্ৰতিনিধিক সাক্ষাৎ কৰে ।
বৈঠকত অংশগ্ৰহণ কৰা দলসমূহ:
আম আদমী পাৰ্টী (AAP), ভাৰতীয় জনতা পাৰ্টি (BJP), ভাৰতীয় কমিউনিষ্ট পাৰ্টি (মাৰ্ক্সবাদী) (CPI-M) আৰু ভাৰতীয় জাতীয় কংগ্ৰেছ, অল ইণ্ডিয়া ইউনাইটেড ডেম’ক্ৰেটিক ফ্ৰণ্ট (AIUDF), অসম গণ পৰিষদ (AGP), বড়োলেণ্ড পিপলছ ফ্ৰণ্ট (BPF) আৰু ইউনাইটেড পিপলছ পাৰ্টি লিবাৰেল (UPPL) এ এই বৈঠকত অংশগ্ৰহণ কৰে ।
জানিব পৰা মতে অধিকাংশ দলেই নিৰ্বাচন “এটা বা সৰ্বাধিক দুটা পৰ্যায়ত” অনুষ্ঠিত কৰাৰ দাবী জনাইছে । ইয়াৰ উপৰিও, বিহুৰ কথা মনত ৰাখি নিৰ্বাচনৰ দিন ধাৰ্য কৰিবলৈ তেওঁলোকে আয়োগক অনুৰোধ জনাইছে । ইফালে শাসনাধীষ্ঠ দল বিজেপিয়ে বিহুৰ পূৰ্বে নিৰ্বাচন অনুষ্ঠিত কৰাৰ বাবে নিৰ্বাচন আয়োগক অনুৰোধ জনোৱাৰ কথা সদৰী কৰে মুখ্যমন্ত্ৰী হিমন্ত বিশ্ব শৰ্মাই ।
ৰাজনৈতিক দলসমূহে অসমত চলোৱা “ভোটাৰ তালিকাৰ বিশেষ সংশোধন” প্ৰক্ৰিয়াৰ শলাগ লয় । লগতে ৰাজ্যখনত নিৰ্বাচন শান্তিপূৰ্ণভাৱে সম্পন্ন কৰিবলৈ বিভিন্ন পৰামৰ্শ আগবঢ়ায় ।
নিৰ্বাচন আয়োগে তেওঁলোকৰ এই ভ্ৰমণকালত মুখ্য সচিব, গৃহ সচিব, আৰক্ষী সঞ্চালক প্ৰধান আৰু অন্যান্য জ্যেষ্ঠ বিষয়াসকলক সাক্ষাৎ কৰি প্ৰশাসনিক তথা নিৰাপত্তা ব্যৱস্থাৰ বুজ লোৱাৰ কথা আছে । উল্লেখ্য যে ১২৬ জনীয়া অসম বিধানসভাৰ বৰ্তমানৰ কাৰ্যকাল ২০ মে’ত সমাপ্ত হ’ব, যাৰ বাবে মাৰ্চ-এপ্ৰিল মাহত নিৰ্বাচন হোৱাৰ সম্ভাৱনা আছে । ভ্ৰমণৰ অন্তিম দিনা অৰ্থাৎ ১৮ ফেব্ৰুৱাৰীত আয়োগে সংবাদ মাধ্যমক সম্বোধন কৰিব ।
লগতে পঢ়ক : ‘কংগ্ৰেছৰ সময়ত CM হোৱা হ’লে কাললৈ কলংক ৰৈ গ’লহেতেন’: হিমন্ত বিশ্ব শৰ্মা
