ৰাজ্যজুৰি আৰম্ভ হৈছে হাইস্কুল শিক্ষান্ত পৰীক্ষা। সমগ্ৰ ৰাজ্যৰ মুঠ ১,০৪৬টা পৰীক্ষা কেন্দ্ৰত ৪,৩৮,৫৬৫ গৰাকী পৰীক্ষাৰ্থীয়ে এই গুৰুত্বপূৰ্ণ পৰীক্ষাত অৱতীৰ্ণ হৈছে ।
আজিৰে পৰা সমগ্ৰ ৰাজ্যজুৰি আৰম্ভ হৈছে হাইস্কুল শিক্ষান্ত পৰীক্ষা । এইবাৰ অসম মাধ্যমিক শিক্ষা পৰিষদ চমুকৈ ASSEB-ৰ নতুন নিয়মেৰে এই পৰীক্ষা অনুষ্ঠিত কৰা হৈছে । সমগ্ৰ ৰাজ্যৰ মুঠ ১,০৪৬টা পৰীক্ষা কেন্দ্ৰত ৪,৩৮,৫৬৫ গৰাকী পৰীক্ষাৰ্থীয়ে এই গুৰুত্বপূৰ্ণ পৰীক্ষাত অৱতীৰ্ণ হৈছে । পুৱা ৯ বজাৰ পৰা আৰম্ভ হ’ব লগা এই পৰীক্ষাত এইবাৰ কেইবাটাও নতুন নিয়ম বলবৎ কৰা হৈছে । উল্লেখযোগ্য যে, এইবাৰ প্ৰশ্নকাকতত প্ৰতিটো ভাষাৰ প্ৰশ্ন পৃথকভাৱে উপলব্ধ হ’ব ।
পৰীক্ষাৰ স্বচ্ছতা আৰু শৃংখলা ৰক্ষাৰ বাবে কৰ্তৃপক্ষই অত্যন্ত কঠোৰ নীতি-নিৰ্দেশনা জাৰি কৰিছে । পৰীক্ষা কেন্দ্ৰত সোমোৱাৰ আগতে প্ৰতিগৰাকী পৰীক্ষাৰ্থীয়ে এই নিয়মসমূহ পালন কৰাটো বাধ্যতামূলক কৰা হৈছে । পৰীক্ষাৰ্থীসকলে তেওঁলোকৰ লগত কেৱল কলম, এডমিট কাৰ্ড, ক্লিপ ব’ৰ্ড, কম্পাছ আৰু পানীৰ বটলহে নিব পাৰিব । পৰীক্ষা হলৰ ভিতৰলৈ মোবাইল ফোন বা যিকোনো ধৰণৰ ইলেকট্ৰনিক ডিভাইছ নিয়াটো সম্পূৰ্ণৰূপে নিষিদ্ধ কৰা হৈছে । ইয়াৰ উপৰিও পৰীক্ষাৰ্থীয়ে নিজৰ লগত কোনো অতিৰিক্ত কাগজ ৰাখিব নোৱাৰিব ।
সমগ্ৰ পৰীক্ষা প্ৰক্ৰিয়াটো চিচি টিভি কেমেৰাৰ তীক্ষ্ণ নজৰত অনুষ্ঠিত কৰা হৈছে । পৰীক্ষাৰ্থীৰ সামান্য ভুল বা নিয়ম উলংঘাই তেওঁলোকক বিপদত পেলাব পাৰে । গতিকে পৰীক্ষাৰ্থীসকলক সাৱধানতাৰে আৰু নিয়ম মানি পৰীক্ষাত বহিবলৈ আহ্বান জনোৱা হৈছে ।
লগতে পঢ়ক : বাৰে বাৰে দিব নোৱাৰিব অসামৰিক সেৱাৰ পৰীক্ষা! ইউ পি এছ চিৰ ডাঙৰ সিদ্ধান্ত
