অসমত পুনৰ বিজেপি চৰকাৰ আহিলে উচ্ছেদকে ধৰি চৰকাৰী চাকৰি দিয়া সন্দৰ্ভত প্ৰধানমন্ত্ৰী মোদীৰ সন্মুখতে ডাঙৰ মন্তব্য কৰে মুখ্যমন্ত্ৰী ড০ হিমন্ত বিশ্ব শৰ্মাই ।
প্রধানমন্ত্রী নৰেন্দ্ৰ মোদীৰ ১৪ ফেব্ৰুৱাৰীৰ অসম ভ্ৰমণৰ মাজতে মুখ্যমন্ত্রী ড০ হিমন্ত বিশ্ব শৰ্মাই এক বৃহৎ ঘোষণা কৰিছে । প্ৰধানমন্ত্ৰীৰ সন্মুখতে হিমন্ত বিশ্ব শৰ্মাই যদি অসমত পুনৰ বিজেপি চৰকাৰ আহে তেন্তে প্ৰায় পাঁচ লাখ ভূমি বেদখল মুক্ত কৰাৰ লগতে যোগ্য প্ৰাৰ্থীক দুই লাখ চৰকাৰী চাকৰি প্ৰদান কৰা হ’ব বুলি প্ৰতিশ্ৰুতি দিয়ে ।
ডিব্ৰুগড়ত প্ৰধানমন্ত্ৰীৰ উপস্থিতিত অনুষ্ঠিত এখন ৰাজহুৱা সভাত মুখ্যমন্ত্ৰীগৰাকীয়ে এই ঘোষণা কৰে । তেওঁ উল্লেখ কৰে যে আগন্তুক কাৰ্যকালত বেদখলকৃত ভূমি উদ্ধাৰ কৰিবলৈ আৰু যুৱক-যুৱতীসকলৰ বাবে বৃহৎ পৰিসৰত কৰ্মসংস্থাপনৰ সুযোগ সৃষ্টি কৰিবলৈ চৰকাৰ বদ্ধপৰিকৰ ।
অসমৰ প্ৰতি ৰঙা চকু দেখুওৱাসকলক সকীয়নি দি মুখ্যমন্ত্ৰী ড০ হিমন্ত বিশ্ব শৰ্মাই কয়-“বিজেপি চৰকাৰ পুনৰ আহি আছে । আপোনালোকৰ ৰঙা চকু আমি উন্নয়নেৰে, সুৰক্ষাৰ মন্ত্ৰৰে কাঢ়ি ল’ম । এই অসম আৰু কেতিয়াও থমকি নৰয় ।“
এইবাৰ ডেঢ় লাখ বিঘা মাটিত উচ্ছেদ চলোৱা বুলি উল্লেখ কৰি মুখ্যমন্ত্ৰী ড০ শৰ্মাই অহা কাৰ্যকালত পাঁচ লাখ বিঘা মাটিত উচ্ছেদ চলোৱা হ’ব বুলি উল্লেখ কৰে ।
ইফালে চৰকাৰী নিযুক্তি সন্দৰ্ভতো ডাঙৰ মন্তব্য কৰে মুখ্যমন্ত্ৰীগৰাকীয়ে । অসমত পুনৰ বিজেপি চৰকাৰ হ’লে নিবনুৱা শিক্ষিত যুৱক-যুৱতীক ২ লাখ চাকৰি দিয়া হ’ব বুলি মন্তব্য কৰে তেওঁ । মুখ্যমন্ত্ৰী ড০ শৰ্মাই কয়-“এইবাৰ ডেঢ় লাখ চাকৰি দিয়া হ’ল, অহাবাৰ বিজেপি চৰকাৰ হ’লে দুই লাখ চৰকাৰী চাকৰি দিয়া হ’ব ।
ভূমি বেদখলমুক্ত কৰা আৰু কৰ্মসংস্থাপন সৃষ্টিৰ সন্দৰ্ভত মুখ্যমন্ত্ৰী হিমন্ত বিশ্ব শৰ্মাই কৰা ঘোষণা অনুষ্ঠানটোৰ কেন্দ্ৰীয় আকৰ্ষণ হৈ ৰয়, যিয়ে আগন্তুক কাৰ্যকালত ভূমি সংস্কাৰ আৰু চাকৰি সৃষ্টিৰ ওপৰত ৰাজ্য চৰকাৰৰ গুৰুত্বক প্ৰতিফলিত কৰিছে ।
লগতে পঢ়ক : গুৱাহাটী-উত্তৰ গুৱাহাটী সংযোগী কুমাৰ ভাস্কৰ বৰ্মা সেতু মুকলি প্ৰধানমন্ত্ৰী নৰেন্দ্ৰ মোদীৰ
