ভূমিকম্পৰ কেন্দ্ৰবিন্দু আছিল তে আনাউ চহৰৰ পৰা প্ৰায় ৪০ কিলোমিটৰ উত্তৰে
বৃহস্পতিবাৰে এক তীব্ৰ ভূমিপকম্পই কঁপাই যায় নিউজীলেণ্ডৰ চাউথ আইলেণ্ড । ৰিখটাৰ স্কেলত এই ভূমিকম্পৰ প্ৰাবল্য আছিল ৬.৩ । ভূমিকম্পৰ পাছতে চুনামীৰ সতৰ্কবাণী জাৰি কৰা হৈছে । তথ্য অনুসৰি, ভূমিকম্পৰ কেন্দ্ৰবিন্দু আছিল তে আনাউ (Te Anau) চহৰৰ পৰা প্ৰায় ৪০ কিলোমিটৰ উত্তৰে । এই অঞ্চলটো ফিয়ৰ্ডলেণ্ডৰ দৰে বিখ্যাত পৰ্যটন থলীৰ প্ৰৱেশদ্বাৰ হিচাপে জনা যায় ।
নিউজীলেণ্ডৰ ৰাষ্ট্ৰীয় দুৰ্যোগ ব্যৱস্থাপনা সংস্থাই ৰাইজক সাগৰৰ পাৰ আৰু উপকূলীয় অঞ্চলৰ পৰা আঁতৰি থাকিবলৈ আহ্বান জনাইছে । অৱশ্যে প্ৰাৰম্ভিক তথ্য অনুসৰি, এই ভূমিকম্পৰ ফলত কোনো ডাঙৰ ক্ষয়-ক্ষতি বা প্ৰাণহানিৰ খবৰ পোৱা হোৱা নাই ।
আনহাতে, আমেৰিকাৰ ভূতাত্বিক জৰীপ সংস্থা আৰু জাৰ্মানীৰ জিঅ’চাইন্স ৰিচাৰ্চ চেন্টাৰে এই ভূমিকম্পৰ তীব্ৰতা ৫.৯ বুলি লিপিৱদ্ধ কৰিছে । দুয়োটা সংস্থাৰ মতে, ভূমিকম্পৰ কেন্দ্ৰবিন্দু ভূগৰ্ভৰ ৫০ কিলোমিটৰতকৈও অধিক গভীৰতাত আছিল ।
গুজৰাটত তিনি মিনিটত দুটাকৈ জোকাৰণি
ইপিনে, ভাৰতৰ গুজৰাটৰ কচ্ছ জিলাতো বৃহস্পতিবাৰে তিনি মিনিটৰ ভিতৰত ভূমিকম্পৰ দুটাকৈ জোকাৰণি অনুভূত হয় ।
গান্ধীনগৰৰ ইনষ্টিটিউট অৱ চিচম’লজিকেল ৰিচাৰ্চৰ মতে প্ৰথমটো জোকাৰণি দুপৰীয়া ২:২০ বজাত অনুভূত হৈছিল আৰু ইয়াৰ প্ৰাবল্য আছিল ৩.৬ । যাৰ কেন্দ্ৰবিন্দু আছিল খাৱড়াৰ পৰা ৩২ কিলোমিটৰ উত্তৰ-পূবে ।
দ্বিতীয়টো জোকাৰণি ইয়াৰ ঠিক তিনি মিনিট পিছত, ২:২৩ বজাত অনুভূত হয় যাৰ প্ৰাবল্য আছিল ৩.২ । ইয়াৰ কেন্দ্ৰবিন্দু ধোলাৱীৰাৰ পৰা ৩২ কিলোমিটৰ পশ্চিম-উত্তৰত আছিল ।
বৰ্তমানলৈকে কচ্ছত ভূমিকম্পৰ বাবে কোনো ধৰণৰ ক্ষয়-ক্ষতি বা প্ৰাণহানিৰ খবৰ অহা নাই । স্থানীয় প্ৰশাসনে পৰিস্থিতিৰ ওপৰত তীক্ষ্ণ নজৰ ৰাখিছে ।
লগতে পঢ়ক : প্ৰলয়ংকৰী বানৰ পিছত এইবাৰ টাইফুন ‘বাভী’ৰ তাণ্ডৱ, ১৭ লাখৰো অধিক লোকক স্থানান্তৰ
