এই ভ্ৰমণৰ সন্দৰ্ভত নিজৰ অনুভৱ ব্যক্ত কৰি প্ৰধানমন্ত্ৰী মোদীয়ে ইয়াক কাৰ্যসূচী আৰু ফলাফল উভয় দিশতে অত্যন্ত ব্যাপক আৰু সফল বুলি অভিহিত কৰে
ফ্ৰান্স আৰু শ্ল’ভাকিয়া ভ্ৰমণ সামৰি শুকুৰবাৰে নতুন দিল্লীত উপস্থিত হয় প্ৰধানমন্ত্ৰী নৰেন্দ্ৰ মোদী । প্ৰধানমন্ত্ৰীৰ এই ভ্ৰমণে ভাৰত আৰু ফ্ৰান্সৰ মাজত থকা বিশেষ বৈশ্বিক কৌশলগত অংশীদাৰিত্বক এক নতুন মাত্ৰা প্ৰদান কৰা বুলি চৰকাৰীভাৱে প্ৰকাশ কৰা হৈছে ।
শুকুৰবাৰে দিনটোৰ আৰম্ভণিতে বৈদেশিক পৰিক্ৰমা মন্ত্ৰালয়ে প্ৰধানমন্ত্ৰী মোদীৰ পেৰিছ ত্যাগৰ কথা ঘোষণা কৰে । বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে ছ’চিয়েল মিডিয়া প্লেটফৰ্ম এক্স (X)-ত এক পোষ্টযোগে কয় :
“ধন্যবাদ ফ্ৰান্স! প্ৰধানমন্ত্ৰী নৰেন্দ্ৰ মোদীয়ে এক ফলপ্ৰসূ ফ্ৰান্স ভ্ৰমণ সামৰিলে, যিটো ব্যাপক আলোচনা তথা কাৰ্যসূচীৰে চিহ্নিত আছিল । এই ভ্ৰমণে ভাৰত-ফ্ৰান্স বিশেষ বৈশ্বিক কৌশলগত অংশীদাৰিত্বক এক নতুন গতি প্ৰদান কৰিলে আৰু গুৰুত্বপূৰ্ণ খণ্ডসমূহৰ মাজত সহযোগিতা বৃদ্ধিৰ বাবে উমৈহতীয়া প্ৰতিশ্ৰুতিক পুনৰ শক্তিশালী কৰিলে ।”
কাৰ্যসূচী আৰু ফলাফলৰ দিশৰ পৰা এক “ব্যাপক” ভ্ৰমণ
এই ভ্ৰমণৰ সন্দৰ্ভত নিজৰ অনুভৱ ব্যক্ত কৰি প্ৰধানমন্ত্ৰী মোদীয়ে ইয়াক কাৰ্যসূচী আৰু ফলাফল উভয় দিশতে অত্যন্ত “ব্যাপক” আৰু সফল বুলি অভিহিত কৰে । এক্স (X)-ত এটা পোষ্ট শ্বেয়াৰ কৰি প্ৰধানমন্ত্ৰীগৰাকীয়ে কয় :
“কাৰ্যসূচী আৰু ফলাফলৰ ক্ষেত্ৰত এই ফ্ৰান্স ভ্ৰমণ অতি ব্যাপক আছিল । ইয়াৰ আৰম্ভণি হৈছিল নিচ (Nice)-ত, য’ত ‘ভাৰত ইনোভেটছ’ কাৰ্যসূচী অনুষ্ঠিত হৈছিল । ইয়াৰ পিছত জি-৭ সন্মিলনৰ বাবে এভিয়ান আৰু তাৰ পিছত পেৰিছত মই ভিভাটেকে ২০২৬ আৰু এটা বিশাল প্ৰবাসী ভাৰতীয়ৰ অনুষ্ঠানক সম্বোধন কৰাৰ লগতে কেইবাজনো প্ৰতিষ্ঠিত মুখ্য কাৰ্যবাহী বিষয়াক লগ পাইছিলোঁ ।”
ফ্ৰান্সৰ আতিথ্যৰ শলাগ লৈ তেওঁ আৰু কয়, “মই মোৰ বন্ধু ৰাষ্ট্ৰপতি ইমানুৱেল মেক্ৰন, ফ্ৰান্স চৰকাৰ আৰু ফ্ৰান্সৰ জনসাধাৰণক তেওঁলোকৰ উষ্ম আদৰণিৰ বাবে বিশেষভাৱে ধন্যবাদ জানাইছোঁ । অনাগত সময়ত ভাৰত-ফ্ৰান্সৰ বন্ধুত্ব আৰু অধিক শক্তিশালী হ’ব ।”
উল্লেখ্য যে, প্ৰধানমন্ত্ৰীৰ এই সমগ্ৰ ভ্ৰমণকালত ফ্ৰান্সৰ তিনিখন প্ৰধান চহৰ— নিচ, এভিয়ান আৰু পেৰিছৰ গুৰুত্বপূৰ্ণ কাৰ্যসূচী অন্তৰ্ভুক্ত আছিল । য’ত মূলতঃ উদ্ভাৱন, প্ৰযুক্তি, অৰ্থনৈতিক সহযোগিতা আৰু ভাৰত-ফ্ৰান্সৰ দ্বিপাক্ষিক সম্পৰ্ক সুদৃঢ় কৰাৰ ওপৰত সৰ্বাধিক গুৰুত্ব আৰোপ কৰা হয় ।
লগতে পঢ়ক : জি-৭ সন্মিলনৰ অন্তত পেৰিচত প্ৰধানমন্ত্ৰী মোদী : প্ৰৱাসী ভাৰতীয়ৰ উষ্ম আদৰণি
