প্ৰধানমন্ত্ৰীগৰাকীৰ এই ভ্ৰমণক কেন্দ্ৰ কৰি পেৰিচত এক উৎসৱমুখৰ পৰিৱেশৰ সৃষ্টি হৈছে

ফ্ৰান্স ভ্ৰমণৰ অন্তিম পৰ্যায়ৰ বাবে বুধবাৰে ফ্ৰান্সৰ ৰাজধানী পেৰিচত উপস্থিত হৈছে ভাৰতৰ প্ৰধানমন্ত্ৰী নৰেন্দ্ৰ মোদী । পেৰিচত উপস্থিত হোৱাৰ লগে লগে প্ৰধানমন্ত্ৰীগৰাকীক তাত থকা স্থানীয় ভাৰতীয় সম্প্ৰদায়ৰ লোকসকলে এক অভূতপূৰ্ব উষ্ম আদৰণি জনায় । তেওঁ থকা হোটেলখনৰ সন্মুখত সমবেত হোৱা শ শ উৎসাহী সমৰ্থকে জয়ধ্বনি আৰু শুভেচ্ছাৰে প্ৰধানমন্ত্ৰীক আদৰি লয় ।

প্ৰৱাসী ভাৰতীয়সকলৰ (ডায়েছপ’ৰা) এই আদৰণিত আপ্লুত হৈ প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্ম এক্স-ত কয়, “কিছু সময়ৰ পূৰ্বে পেৰিচত উপস্থিত হৈছোঁ আৰু ভাৰতীয় ডায়েছপ’ৰাৰ পৰা এক উষ্ম আদৰণি লাভ কৰিছোঁ । ভাৰত আৰু ফ্ৰান্সৰ সম্পৰ্ক সুদৃঢ় কৰাৰ ক্ষেত্ৰত তেওঁলোকৰ প্ৰচেষ্টাক লৈ মই গৌৰৱান্বিত । গোলকীয় প্ৰগতিৰ বাবে ভাৰত-ফ্ৰান্স অংশীদাৰিত্ব অতি গুৰুত্বপূৰ্ণ ।”

জি-৭ সন্মিলনৰ গুৰুত্বপূৰ্ণ আলোচনা

পেৰিচ ভ্ৰমণৰ পূৰ্বে প্ৰধানমন্ত্ৰী মোদীয়ে এভিয়ানত অনুষ্ঠিত জি-৭ সন্মিলনত অংশগ্ৰহণ কৰিছিল । তাত তেওঁ বিশ্বৰ শাসন প্ৰণালী, নীতি প্ৰণয়ন, কৃত্ৰিম বুদ্ধিমত্তা আৰু ‘গ্ল’বেল চাউথ’-ৰ সৈতে সহযোগিতা বৃদ্ধিৰ দৰে গুৰুত্বপূৰ্ণ গোলকীয় বিষয়সমূহৰ ওপৰত এলানি বৈঠকত মিলিত হয় । বিশেষকৈ কৃত্ৰিম বুদ্ধিমত্তাৰ ওপৰত অনুষ্ঠিত অধিৱেশনত অংশ লৈ প্ৰধানমন্ত্ৰীয়ে নৈতিক আৰু মানৱ-কেন্দ্ৰিক এআই বিকাশৰ ওপৰত জোৰ দিয়ে, যাতে ইয়াৰ সুফল উন্নয়নশীল দেশসমূহেও লাভ কৰিব পাৰে ।

ভিভাটেক সন্মিলন আৰু ডায়েছপ’ৰা অনুষ্ঠান

পেৰিচত প্ৰধানমন্ত্ৰী মোদীয়ে ইউৰোপৰ আটাইতকৈ ডাঙৰ প্ৰযুক্তি আৰু ষ্টাৰ্টআপ ইভেণ্ট ‘ভিভাটেক সন্মিলন’-ত অংশগ্ৰহণ কৰিব । এই সন্মিলনত তেওঁ ভাৰতৰ ক্ৰমবৰ্ধমান উদ্ভাৱনী পৰিৱেশ তন্ত্ৰ আৰু প্ৰযুক্তিগত অগ্ৰগতিৰ কথা বিশ্ববাসীৰ সন্মুখত দাঙি ধৰিব । ইয়াৰ উপৰি, তেওঁ ভাৰতীয় সম্প্ৰদায়ৰ এক বিশেষ অনুষ্ঠানতো ভাষণ প্ৰদান কৰিব । প্ৰধানমন্ত্ৰীৰ এই ভ্ৰমণক লৈ স্থানীয় ভাৰতীয়সকল অত্যন্ত উৎসাহিত হৈ পৰিছে । ডায়েছপ’ৰাৰ এজন সদস্যই কয় যে তেওঁলোকে ভাৰত আৰু ফ্ৰান্সৰ যৌথ এআই প্ৰকল্পত কাম কৰিবলৈ আগ্ৰহী ।

ৰাজস্থানী সংস্কৃতিৰে আদৰণিৰ প্ৰস্তুতি

প্ৰধানমন্ত্ৰীগৰাকীৰ এই ভ্ৰমণক কেন্দ্ৰ কৰি পেৰিচত এক উৎসৱমুখৰ পৰিৱেশৰ সৃষ্টি হৈছে । বিখ্যাত সাংস্কৃতিক দল ‘ধোৱাদ জিপছীজ অৱ ৰাজস্থান’, ‘জয়পুৰ মহাৰাজা ব্ৰাছ বেণ্ড’ আৰু ‘বলীউড মছলা অৰ্কেষ্ট্ৰা’ৰ সঞ্চালক ৰাহীছ ভাৰতীয়ে ইয়াক এক গৌৰৱৰ ক্ষণ বুলি অভিহিত কৰিছে । বিগত ২৬ বছৰত ১১৯খন দেশত অনুষ্ঠান পৰিৱেশন কৰা ধোৱাদ গ্ৰুপে প্ৰধানমন্ত্ৰীৰ আদৰণি অনুষ্ঠানত ৰাজস্থানৰ চহকী শিল্প আৰু সংস্কৃতি প্ৰদৰ্শন কৰিব । ভাৰতীয়ে কয়, “ইয়াত আমি যেনেকৈ দেৱালী উদযাপন কৰোঁ, ঠিক তেনেদৰেই প্ৰধানমন্ত্ৰী মোদীৰ আদৰণিৰ বাবে আমি প্ৰস্তুতি চলাইছোঁ ।”

লগতে পঢ়ক : “মোদী প্ৰধানমন্ত্ৰী হৈ থকা লৈকে ভাৰতত আক্ৰমণ হ’লে আমি একেলগে থিয় দিম”; ট্ৰাম্পৰ ডাঙৰ দাবী