অসম চৰকাৰ, নাগালেণ্ড চৰকাৰ আৰু কেন্দ্ৰীয় চৰকাৰৰ মাজত হোৱা ত্ৰিপাক্ষিক বুজাবুজিৰ চুক্তিৰ পিছতে এই পদক্ষেপক আদৰণি জনাইছে কেন্দ্ৰীয় গৃহমন্ত্ৰী অমিত শ্বাহে
উত্তৰ-পূৰ্বাঞ্চলৰ বাবে এক অত্যন্ত গুৰুত্বপূৰ্ণ আৰু ঐতিহাসিক ক্ষণ । কেন্দ্ৰীয় চৰকাৰ, অসম চৰকাৰ আৰু নাগালেণ্ড চৰকাৰৰ মাজত এক ত্ৰিপাক্ষিক বুজাবুজি চুক্তি স্বাক্ষৰিত হৈছে । এই চুক্তিয়ে দুয়োখন ৰাজ্যৰ মাজত দীৰ্ঘদিন ধৰি চলি থকা সীমান্ত বিবাদৰ অন্ত পেলোৱাৰ লগতে অঞ্চলটোত তেল আৰু প্ৰাকৃতিক গেছৰ অন্বেষণ তথা উৎপাদনৰ এক নতুন দিগন্ত মুকলি কৰিব ।
কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰী হৰদীপ সিং পুৰী, অসমৰ মুখ্যমন্ত্ৰী ড° হিমন্ত বিশ্ব শৰ্মা আৰু নাগালেণ্ডৰ মুখ্যমন্ত্ৰী নেফিউ ৰিঅ’ৰ উপস্থিতিত এই ঐতিহাসিক চুক্তিখন স্বাক্ষৰিত হয় ।
গৃহমন্ত্ৰীৰ আদৰণি-
এই ঐতিহাসিক পদক্ষেপক আদৰণি জনাই কেন্দ্ৰীয় গৃহমন্ত্ৰী অমিত শ্বাহে ছ’চিয়েল মিডিয়া প্লেটফৰ্ম ‘X’ত লিখিছে :
“ভাৰত চৰকাৰ, অসম চৰকাৰ আৰু নাগালেণ্ড চৰকাৰৰ মাজত এক ঐতিহাসিক ত্ৰিপাক্ষিক বুজাবুজি চুক্তি স্বাক্ষৰিত হৈছে, যিয়ে উত্তৰ-পূবৰ দশকজোৰা বিবাদৰ অন্ত পেলাইছে আৰু অঞ্চলটোত তেল আৰু গেছ অন্বেষণৰ পথ মুকলি কৰিছে । ই ভাৰতৰ একতাৰ এক উৎকৃষ্ট উদাহৰণ হিচাপে জিলিকি উঠিছে, য’ত শক্তি-নিৰ্ভৰশীল ভাৰতৰ বাবে মোদী জীৰ স্বপ্ন বাস্তৱায়িত কৰিবলৈ দুয়োখন ৰাজ্যই বিবাদ ত্যাগ কৰিছে ।”
“ৰাষ্ট্ৰ প্ৰথম” আৰু ৫০-৫০ অংশীদাৰিত্ব
চুক্তি স্বাক্ষৰ অনুষ্ঠানত সমবেত ৰাইজক সম্বোধন কৰি গৃহমন্ত্ৰীগৰাকীয়ে “ৰাষ্ট্ৰ প্ৰথম” নীতিৰ ওপৰত গুৰুত্ব আৰোপ কৰে । তেওঁ কয় যে এই চুক্তিয়ে কেন্দ্ৰ, অসম আৰু নাগালেণ্ড তিনিওটা পক্ষৰ বাবে এক লাভজনক পৰিস্থিতি সৃষ্টি কৰিছে । দুয়োখন ৰাজ্যই পুৰণি মতানৈক্যসমূহক একাষৰীয়া কৰি দেশৰ স্বাৰ্থত তেল সম্পদ আহৰণৰ বাবে ৫০-৫০ অংশীদাৰিত্বৰ চুক্তিত সন্মত হৈছে । শ্বাহে ইয়াক “ৰাষ্ট্ৰীয় সম্পত্তি” বুলি অভিহিত কৰি দুয়োগৰাকী মুখ্যমন্ত্ৰীৰ এই জাতীয়তাবাদী ভাৱনাক প্ৰশংসা কৰে ।
মুখ্যমন্ত্ৰীদ্বয়ৰ নেতৃত্বক প্ৰশংসা-
অসমৰ মুখ্যমন্ত্ৰী হিমন্ত বিশ্ব শৰ্মা আৰু নাগালেণ্ডৰ মুখ্যমন্ত্ৰী নেফিউ ৰিঅ’ৰ নেতৃত্বক প্ৰশংসা কৰি গৃহমন্ত্ৰীয়ে কয়, “মই জানো যে অসমৰ স্বাৰ্থৰ কথা আহিলে হিমন্ত জী অতি দৃঢ় । কিন্তু, যেতিয়া মই তেওঁৰ সৈতে কথা পাতিলোঁ আৰু এই বিশেষ বিষয়টো একাষৰীয়া কৰি থবলৈ পৰামৰ্শ দিলোঁ… তেওঁ মান্তি হ’ল ।” তেওঁ লগতে আশা প্ৰকাশ কৰে যে এই চুক্তিয়ে সমগ্ৰ উত্তৰ-পূবতে খনিজ খননৰ পথ প্ৰশস্ত কৰিব ।
এই বুজাবুজি চুক্তিৰ অধীনত অসম-নাগালেণ্ড সীমান্তৰ ১,০০০ বৰ্গ কিলোমিটাৰতকৈও অধিক এলেকা সামৰি লোৱা হৈছে । এই সমগ্ৰ অঞ্চলটোত প্ৰচুৰ পৰিমাণে শক্তি আৰু খনিজ ভাণ্ডাৰ থকা বুলি ধাৰণা কৰা হৈছে, য’ত এতিয়াৰে পৰা যৌথভাৱে অন্বেষণ আৰু উৎপাদন কাৰ্য চলোৱা হ’ব ।
লগতে পঢ়ক : শীঘ্ৰেই প্ৰায় সমগ্ৰ উত্তৰ-পূবৰ পৰা প্ৰত্যাহাৰ হ’ব AFSPA! অমিত শ্বাহৰ মন্তব্য
