ৰাজ্যখনত ক্ষিপ্ৰতাৰে আগবাঢ়িছে হিউমেন পেপিল’মাভাইৰাছ টিকাকৰণ কাৰ্যসূচী
ৰাজ্যৰ কনমাণি আৰু কিশোৰীসকলৰ সুস্বাস্থ্য সুনিশ্চিত কৰাৰ দিশত অসম চৰকাৰে এক গুৰুত্বপূৰ্ণ পদক্ষেপ গ্ৰহণ কৰিছে । ৰাজ্যখনত ক্ষিপ্ৰতাৰে আগবাঢ়িছে হিউমেন পেপিল’মাভাইৰাছ (HPV) টিকাকৰণ কাৰ্যসূচী । জৰায়ুৰ মুখৰ কৰ্কট ৰোগ (Cervical Cancer) প্ৰতিৰোধৰ লক্ষ্যৰে গ্ৰহণ কৰা এই বৃহৎ অভিযানৰ অধীনত ইতিমধ্যে ১.০৭ লাখতকৈও অধিক কিশোৰীক সফলতাৰে এই ভেকচিন প্ৰদান কৰা হৈছে । আজি এই কথা সদৰী কৰে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই ।
ছচিয়েল মিডিয়া প্লেটফৰ্ম ‘এক্স’-ত এই সন্দৰ্ভত এটা আপডেট শ্বেয়াৰ কৰি মুখ্যমন্ত্ৰীগৰাকীয়ে কয় যে অসমৰ জীয়ৰীসকলে প্ৰতিৰোধযোগ্য ৰোগকে ধৰি সকলো ধৰণৰ বাধা নেওচি নিজৰ সপোন পূৰণ কৰাৰ সম্পূৰ্ণ সুযোগ পোৱাটো উচিত । নাৰী স্বাস্থ্যৰ প্ৰতি চৰকাৰৰ প্ৰতিশ্ৰুতিবদ্ধতাৰ কথা দোহাৰি তেওঁ কয়, “এই HPV টিকাকৰণ কাৰ্যসূচী হৈছে কিশোৰীসকলৰ এক সুস্থ ভৱিষ্যত নিশ্চিত কৰা আৰু এখন জৰায়ুৰ মুখৰ কৰ্কট ৰোগ মুক্ত অসমৰ স্বপ্ন বাস্তৱায়িত কৰাৰ দিশত এক অন্যতম গুৰুত্বপূৰ্ণ পদক্ষেপ ।”
মুখ্যমন্ত্ৰী ড০ শৰ্মাই কয়- “অসমৰ জীয়ৰীসকলে প্ৰতিৰোধযোগ্য ৰোগকে ধৰি সকলো ধৰণৰ বাধা নেওচি নিজৰ সপোন পূৰণ কৰাৰ সুযোগ পোৱাটো উচিত ।”
লক্ষ্য আৰু সফলতাৰ এক খতিয়ান:
চৰকাৰী তথ্য অনুসৰি, এই বিশেষ কাৰ্যসূচীৰ অধীনত ৰাজ্যখনৰ এক বৃহৎ সংখ্যক কিশোৰীক সামৰি লোৱাৰ পৰিকল্পনা কৰা হৈছে ।
মুঠ লক্ষ্য : ৩.২৭ লাখ কিশোৰী ।
ইতিমধ্যে সম্পন্ন হোৱা টিকাকৰণ : ১.০৭ লাখতকৈও অধিক ।
এই পদক্ষেপক কিশোৰীসকলৰ এক শক্তিশালী ভৱিষ্যত গঢ়ি তোলাৰ বাবে এক পৱিত্ৰ সংকল্প বুলি অভিহিত কৰি মুখ্যমন্ত্ৰী শৰ্মাই কয় যে এই জীৱনৰক্ষী HPV ভেকচিনে তেওঁলোকক ভৱিষ্যতে জৰায়ুৰ মুখৰ কৰ্কট ৰোগৰ দৰে মাৰাত্মক ব্যাধিৰ পৰা সুৰক্ষিত কৰিব । লগতে ই সমগ্ৰ ৰাজ্যতে দীৰ্ঘম্যাদী স্বাস্থ্যৰ ফলাফল উন্নত কৰাত এক নিৰ্ণায়ক ভূমিকা পালন কৰিব বুলিও তেওঁ আশা প্ৰকাশ কৰে ।
লগতে পঢ়ক : ‘মুখ্যমন্ত্ৰী উৎকৰ্ষ যোজনা’ই ৰাজ্যখনৰ কৃষি মূল্য শৃংখলা শক্তিশালী কৰিব’; মুখ্যমন্ত্ৰী
