এদিনীয়া শৃংখলাৰ পূৰ্বে ভাৰতীয় দলটোৱে এক ডাঙৰ সকাহ লাভ কৰিছে
১৩ জুনৰ পৰা আফগানিস্তানৰ বিৰুদ্ধে আৰম্ভ হ’বলগীয়া এদিনীয়া শৃংখলাৰ পূৰ্বে ভাৰতীয় দলটোৱে এক ডাঙৰ সকাহ লাভ কৰিছে । ৰোহিত শৰ্মা আৰু হাৰ্দিক পাণ্ডিয়াই বেংগালুৰুস্থিত ‘চেণ্টাৰ অৱ এক্সেলেন্স’ (CoE)ৰ পৰা ফিটনেচ ক্লিয়াৰেন্স লাভ কৰিছে । ইয়াৰ লগে লগে শৃংখলাটোত দুয়োগৰাকী খেলুৱৈৰ খেলাক লৈ চলি থকা সন্দেহৰ প্ৰায় অন্ত পৰিছে ।
হাৰ্দিক পাণ্ডিয়া-
আইপিএল ২০২৬-ত মুম্বাই ইণ্ডিয়ানছৰ অভিযান সমাপ্ত হোৱাৰ পিছত হাৰ্দিক পাণ্ডিয়া ছুটি কটাবলৈ বিদেশলৈ গৈছিল । ২ জুনত CoEত উপস্থিত হোৱাৰ পিছত তেওঁ কেইবাদিনো ধৰি ‘মেচ চিমিউলেচন চেশ্বন’ত অংশ লয় । এই সময়ছোৱাত তেওঁ সম্পূৰ্ণ ১০ অভাৰ বলিং কৰে আৰু কোনো ধৰণৰ অসুবিধা অনুভৱ কৰা নাই ।
জানিব পৰা মতে, হাৰ্দিকৰ ফিটনেচৰ সৈতে জড়িত সকলো পেৰামিটাৰ ষ্ট্ৰেংথ এণ্ড কণ্ডিচনিং প্ৰশিক্ষকসকলে অনুমোদন জনাইছে । গতিকে এতিয়া তেওঁক মেচৰ বাবে সম্পূৰ্ণ ফিট বুলি গণ্য কৰা হৈছে ।
ৰোহিত শৰ্মা-
আনহাতে, ভাৰতীয় দলৰ প্ৰাক্তন অধিনায়ক ৰোহিত শৰ্মায়ো হাৰ্দিকৰ পিছতেই CoEত উপস্থিত হৈছিল । আই পি এল ২০২৬ৰ সময়ত তেওঁ হেমষ্ট্ৰিংৰ আঘাতৰ সন্মুখীন হৈছিল, যাৰ বাবে তেওঁ কেইবাখনো মেচ খেলিব পৰা নাছিল আৰু বেছিভাগ মেচতে ‘ইম্পেক্ট প্লেয়াৰ’ হিচাপেহে ভূমিকা পালন কৰিছিল । চিকিৎসা পৰীক্ষাৰ অন্তত ৰোহিতকো RTP (ৰিটৰ্ণ টু প্লে)ৰ অনুমতি দিয়া হৈছে ।
অৱশ্যে প্ৰতিবেদন অনুসৰি, ৰোহিত আৰু হাৰ্দিক মুল্লনপুৰত দলৰ সৈতে যোগ নিদিয়ে । দুয়োগৰাকী খেলুৱৈয়ে পোনপটীয়াকৈ ধৰমশালাত ভাৰতীয় দলৰ সৈতে যোগদান কৰাৰ সম্ভাৱনা আছে, য’ত ১৩ জুনত শৃংখলাৰ প্ৰথমখন এদিনীয়া খেল অনুষ্ঠিত হ’ব ।
কোহলীৰ স্থানত জয়ছোৱালৰ এন্ট্ৰী
আনহাতে, আঘাতপ্ৰাপ্ত বিৰাট কোহলীৰ স্থানত যুৱ বেটচমেন যশস্বী জয়ছোৱালক ভাৰতীয় দলত অন্তৰ্ভুক্ত কৰা হৈছে । আই পি এল ২০২৬ৰ ফাইনেল মেচখনৰ সময়ত কোহলীৰ হেমষ্ট্ৰিংত আঘাত লাগিছিল । তেওঁ ফাইনেলত ৰয়েল চেলেঞ্জাৰ্ছ বেংগালুৰুৰ হৈ ৭৫ ৰানৰ এক অপৰাজিত ইনিংছ খেলিছিল । আশা কৰা হৈছে যে ইংলেণ্ডৰ বিৰুদ্ধে হ’বলগীয়া এদিনীয়া শৃংখলাৰ পূৰ্বে তেওঁ ফিট হৈ উঠিব ।
এতিয়া আটাইতকৈ ডাঙৰ প্ৰশ্নটো হ’ল যশস্বী জয়ছোৱালে বেটিং ক্ৰমত ক’ত সুযোগ পাব ? তেওঁ এগৰাকী স্বাভাৱিক অ’পেনাৰ, কিন্তু দলত ইতিমধ্যে ঈশান কিষাণ থকাৰ বাবে জয়ছোৱালক ৩ নম্বৰ স্থানত পৰীক্ষা কৰা হ’ব পাৰে ।
লগতে পঢ়ক : একমাত্ৰ টেষ্টত ঐতিহাসিক জয় ভাৰতৰ : এক ইনিংছ আৰু ৩০০ ৰানৰ বৃহৎ ব্যৱধানত ধূলিস্যাৎ আফগানিস্তান
