আমেৰিকাৰ মধ্যস্থতাত ইজৰাইল আৰু লেবাননৰ মাজত ১৬ এপ্ৰিলৰ পৰা যুদ্ধবিৰতি কাৰ্যকৰী হয়। এই যুদ্ধবিৰতিৰ পিছত বেইৰুটৰ দক্ষিণ উপকণ্ঠ অঞ্চলত ইজৰাইলে প্ৰথম আক্ৰমণ চলাই।
ইজৰাইল আৰু লেবাননৰ মাজত চলি থকা সংঘাত আৰু উত্তেজনাৰ মাজতে দেওবাৰে এক নতুন ঘটনা পোহৰলৈ আহিছে। ইজৰাইলী সেনাই দেওবাৰে লেবাননৰ ৰাজধানী বেইৰুটৰ দক্ষিণ উপান্ত অঞ্চলত অৱস্থিত সন্ত্ৰাসবাদীৰ ঘাটিত আক্ৰমণ চলায়। ইজৰাইলী সেনাই আক্ৰমণ কৰা এই অঞ্চলটো হিজবুল্লাহৰ দুৰ্গ হিচাপে গণ্য কৰা হয় আৰু ই ‘দাহিয়েহ’ নামেৰে জনাজাত। অৱশ্যে, আমেৰিকাৰ মধ্যস্থতাত ১৬ এপ্ৰিলত হোৱা যুদ্ধবিৰতিৰ পিছত বেইৰুটৰ দক্ষিণ উপান্ত অঞ্চলত এইটোৱেই প্ৰথম আক্ৰমণ।
এই আক্ৰমণক লৈ ইজৰাইলৰ প্ৰধানমন্ত্ৰী বেঞ্জামিন নেতান্যাহু আৰু প্ৰতিৰক্ষা মন্ত্ৰী ইজৰাইল কাটজে এক যুটীয়া বিবৃতিত কয় যে উত্তৰ ইজৰাইলত হিজবুল্লাহৰ তৰফৰ পৰা কৰা গুলীচালনাৰ প্ৰত্যুত্তৰত এই আক্ৰমণ চলোৱা হৈছে। অৱশ্যে, এই আক্ৰমণ এনে এক সময়ত হৈছে যেতিয়া আমেৰিকাৰ মধ্যস্থতাত ইজৰাইল আৰু লেবাননৰ মাজত হোৱা যুদ্ধবিৰতি মাত্ৰ কেইদিনমানৰ আগতেহে কাৰ্যকৰী হৈছিল।
আনহাতে, ইজৰাইলৰ প্ৰধানমন্ত্ৰীৰ কাৰ্যালয়েও এই সন্দৰ্ভত এক আনুষ্ঠানিক বিবৃতি জাৰি কৰিছে। ইজৰাইলৰ পিএমঅ’ই কয়, ‘প্ৰধানমন্ত্ৰী নেতান্যাহু আৰু প্ৰতিৰক্ষা মন্ত্ৰী কাটজৰ নিৰ্দেশ অনুসৰি ইজৰাইলী প্ৰতিৰক্ষা বাহিনীয়ে বেইৰুটৰ দাহিয়েহ অঞ্চলত অৱস্থিত এটা উগ্ৰপন্থী কমাণ্ড চেন্টাৰত আক্ৰমণ চলাইছে। ইজৰাইলৰ ভূখণ্ডলৈ হিজবুল্লাহৰ গুলীচালনাৰ প্ৰত্যুত্তৰত এই ব্যৱস্থা গ্ৰহণ কৰা হৈছে।’
ইজৰাইলৰ তৰফৰ পৰা লেবাননত এই আক্ৰমণ এনে এক সময়ত কৰা হৈছে, যাৰ মাত্ৰ কেইদিনমান পূৰ্বে আমেৰিকাৰ ৰাষ্ট্ৰপতি ড’নাল্ড ট্ৰাম্পে নেতান্যাহুক বেইৰুটৰ দক্ষিণ উপান্ত অঞ্চলত আক্ৰমণ নকৰিবলৈ সতৰ্ক কৰি দিছিল।
লগতে পঢ়ক: ৰাষ্ট্ৰসংঘত পুনৰ মুখথেকেচা পাকিস্তানৰ: কাশ্মীৰক লৈ মিছা আখ্যান ৰচনা কৰাৰ বাবে ভাৰতৰ উচিত প্ৰত্যুত্তৰ
