শনিবাৰে অসমৰ মুখ্যমন্ত্ৰী ড০ হিমন্ত বিশ্ব শৰ্মাই কাজিৰঙাৰ এই চহকী জৈৱ-বৈচিত্ৰ্যৰ কথা শলাগি এক বিশেষ বার্তা প্ৰেৰণ কৰে
বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্প কেৱল এশিঙীয়া গঁড়ৰ বাবেই নহয়, বৰঞ্চ ইয়াৰ অপূৰ্ব পক্ষী বৈচিত্ৰ্যৰ বাবেও সমানেই চহকী । শনিবাৰে অসমৰ মুখ্যমন্ত্ৰী ড০ হিমন্ত বিশ্ব শৰ্মাই কাজিৰঙাৰ এই চহকী জৈৱ-বৈচিত্ৰ্যৰ কথা শলাগি এক বিশেষ বার্তা প্ৰেৰণ কৰে । মুখ্যমন্ত্ৰীগৰাকীয়ে উল্লেখ কৰে যে এই সুৰক্ষিত বনাঞ্চলখন ভাৰতত পোৱা আঠটা ধনেশ (stork) প্ৰজাতিৰ ভিতৰত ছয়টা প্ৰজাতিৰে বাসস্থান । ইয়াৰ উপৰি, সমগ্ৰ দেশৰ ভিতৰতে প্ৰায় ৪৫ শতাংশ চিকাৰী চৰাই (raptor) প্ৰজাতি কেৱল কাজিৰঙাতে পোৱা যায় ।
সামাজিক মাধ্যম ‘এক্স’ (পূৰ্বৰ টুইটাৰ)-ত মুখ্যমন্ত্ৰীৰ কাৰ্যালয়ে (OfficeofHBS) কৰা এটা পোষ্টত কোৱা হৈছে যে কাজিৰঙাই ভাৰতৰ আটাইতকৈ আকৰ্ষণীয় চৰাই প্ৰজাতিসমূহৰ বাবে এক সমৃদ্ধিশালী বাসস্থান হিচাপে সেৱা আগবঢ়াই আহিছে । ই ৰাজ্যখনত চলোৱা বন্যপ্ৰাণী সংৰক্ষণ প্ৰচেষ্টাৰ অভূতপূৰ্ব সফলতাকে প্ৰতিফলিত কৰে ।
এই পোষ্টটোত আন এক গুৰুত্বপূৰ্ণ তথ্য প্ৰকাশ কৰি উল্লেখ কৰা হৈছে যে ভাৰতৰ ভিতৰতে আটাইতকৈ বেছি সংখ্যক বিলুপ্তপ্ৰায় ‘কুৰুৱা চৰাই’ (Pallas’s Fish Eagle)-ৰ বাঁহ সজা স্থান কাজিৰঙাতে আছে । এই কথাই উদ্যানখনক পক্ষী সংৰক্ষণৰ ক্ষেত্ৰত এক অতি গুৰুত্বপূৰ্ণ বাসস্থান হিচাপে গোলকীয় পৰ্যায়ত প্ৰতিষ্ঠা কৰিছে । মুখ্যমন্ত্ৰীৰ কাৰ্যালয়ে দৃঢ়তাৰে কয়, “কাজিৰঙাই অসমত সংৰক্ষণৰ সফলতাক ধাৰাবাহিকভাৱে প্ৰদৰ্শন কৰি আহিছে ।”
উল্লেখ্য যে, কাজিৰঙাৰ বিস্তীৰ্ণ ঘাঁহনি অঞ্চল আৰু ইয়াৰ পৰিস্থিতিতন্ত্ৰৰ সৈতে জড়িত হৈ থকা জলাশয়সমূহে থলুৱা আৰু বিভিন্ন দেশৰ পৰা অহা পৰিভ্ৰমী দুয়ো ধৰণৰ পক্ষীক আশ্ৰয় প্ৰদান কৰি আহিছে । ইউনেস্কোৰ এই বিশ্ব ঐতিহ্য ক্ষেত্ৰখন ভাৰতৰ অন্যতম প্ৰধান জৈৱ-বৈচিত্ৰ্যৰ হটস্পট হিচাপে পৰিগণিত হৈছে, যাৰ বাবে ই সমগ্ৰ বিশ্বৰ বন্যপ্ৰাণী প্ৰেমী, গৱেষক আৰু পক্ষী নিৰীক্ষকসকলৰ বাবে সদায় এক প্ৰধান আকৰ্ষণৰ কেন্দ্ৰবিন্দু হৈ আহিছে ।
লগতে পঢ়ক : ৰাজ্যচৰকাৰৰ কৰ্মচাৰীলৈ ভাল খবৰ; বৃদ্ধি পালে মৰগীয়া বানচ
