কাজিৰঙাৰ সুৰক্ষা আৰু পৰ্যটন সন্দৰ্ভত মন্ত্ৰী জয়ন্ত মল্ল বৰুৱাৰ গুৰুত্বপূৰ্ণ পৰ্যালোচনা
এই বৈঠকত কাজিৰঙাত বহনক্ষম পৰ্যটন শক্তিশালী কৰাৰ লক্ষ্যৰে উত্থাপিত বিভিন্ন প্ৰস্তাৱসমূহ বিতংভাৱে পৰ্যালোচনা কৰা হয়
কাজিৰঙা ৰাষ্ট্ৰীয় উদ্যানৰ সুৰক্ষা আৰু ইয়াৰ প্ৰাকৃতিক ভাৰসাম্য অটুট ৰাখি কেনেকৈ এক দায়িত্বশীল পৰ্যটন গঢ়ি তুলিব পাৰি, সেই সন্দৰ্ভত আজি এক গুৰুত্বপূৰ্ণ বৈঠক অনুষ্ঠিত হৈ যায় । কহৰাস্থিত ফৰেষ্ট কনভেনচন চেণ্টাৰত অনুষ্ঠিত এই বৈঠকত পৌৰোহিত্য কৰে অসম চৰকাৰৰ বিত্ত, পৰিৱেশ আৰু বন, আৰু খনি তথা খনিজ সম্পদ বিভাগৰ মন্ত্ৰী জয়ন্ত মল্ল বৰুৱাই । বন বিভাগৰ জ্যেষ্ঠ বিষয়া আৰু পৰ্যটন খণ্ডৰ অংশীদাৰসকলৰ উপস্থিতিত অনুষ্ঠিত এই বৈঠকত কাজিৰঙাত বহনক্ষম পৰ্যটন শক্তিশালী কৰাৰ লক্ষ্যৰে উত্থাপিত বিভিন্ন প্ৰস্তাৱসমূহ বিতংভাৱে পৰ্যালোচনা কৰা হয় ।
উদ্যানখনৰ সংবেদনশীল পৰিৱেশৰ সৈতে কোনো ধৰণৰ আপোচ নকৰাকৈ কেনেকৈ পৰ্যটকসকলক উন্নত অভিজ্ঞতা প্ৰদান কৰিব পৰা যায় আৰু পৰ্যটনৰ আন্তঃগাঁথনি উন্নত কৰিব পাৰি, সেই সন্দৰ্ভত অংশগ্ৰহণকাৰীসকলে গুৰুত্বপূৰ্ণ পৰামৰ্শ আগবঢ়ায় ।
পৰ্যটন খণ্ডৰ বিকাশৰ জৰিয়তে স্থানীয় ৰাইজৰ বাবে অধিক জীৱিকা আৰু অৰ্থনৈতিক সুযোগ সৃষ্টি কৰাৰ কৌশলসমূহৰ ওপৰতো বৈঠকত বিশেষভাৱে আলোচনা কৰা হয় ।
বৈঠকত ভাষণ প্ৰদান কৰি মন্ত্ৰী জয়ন্ত মল্ল বৰুৱাই কয় যে ৰাজ্য চৰকাৰে কাজিৰঙাৰ পৰ্যটন খণ্ডক এক সুপৰিকল্পিত আৰু বহনক্ষম পদ্ধতিৰে বিকশিত কৰিবলৈ সম্পূৰ্ণ প্ৰতিশ্ৰুতিবদ্ধ । ইয়াৰ দ্বাৰা অঞ্চলটোৰ অৰ্থনৈতিক উন্নতি হোৱাৰ লগতে অসমৰ সামগ্ৰিক আৰ্থ-সামাজিক উন্নয়নতো এক ইতিবাচক প্ৰভাৱ পৰিব ।
লগতে পঢ়ক : ৰাজ্যৰ পথ সংযোগ ব্যৱস্থা উন্নত কৰাক লৈ মুখ্যমন্ত্ৰীৰ ডাঙৰ ঘোষণা