বুধবাৰে মাজনিশা আমেৰিকান সেনাই ইৰাণৰ ভূখণ্ডৰ ভিতৰত পুনৰ এক বৃহৎ বিমান আক্ৰমণ সংঘটিত কৰাৰ পিছতেই মধ্যপ্ৰাচ্যত যুদ্ধৰ মেঘ ঘনীভূত হৈ পৰিছে
আমেৰিকা যুক্তৰাষ্ট্ৰ আৰু ইৰাণৰ মাজত পাকিস্তানৰ মধ্যস্থতাত গঢ়ি উঠা অস্থায়ী যুদ্ধবিৰতি এতিয়া সম্পূৰ্ণৰূপে ভংগ হোৱাৰ দিশে গতি কৰিছে । বুধবাৰে মাজনিশা আমেৰিকান সেনাই ইৰাণৰ ভূখণ্ডৰ ভিতৰত পুনৰ এক বৃহৎ বিমান আক্ৰমণ সংঘটিত কৰাৰ পিছতেই মধ্যপ্ৰাচ্যত যুদ্ধৰ মেঘ ঘনীভূত হৈ পৰিছে । যোৱা ৪৮ ঘণ্টাৰ ভিতৰত ইৰাণৰ ওপৰত আমেৰিকাৰ এইটো দ্বিতীয়টো ডাঙৰ আক্ৰমণ ।
বন্দৰ আব্বাছত বিকট বিস্ফোৰণ-
ইৰাণৰ অৰ্ধ-চৰকাৰী সংবাদ সংস্থা ‘ফাৰ্ছ’ৰ প্ৰতিবেদন অনুসৰি, দক্ষিণ ইৰাণৰ কৌশলগতভাৱে অত্যন্ত গুৰুত্বপূৰ্ণ সামুদ্ৰিক বন্দৰ চহৰ ‘বন্দৰ আব্বাছ’ৰ পূব অঞ্চলত স্থানীয় সময় অনুসৰি নিশা প্ৰায় ১:৩০ বজাত একেৰাহে তিনিটা বিকট বিস্ফোৰণৰ শব্দ শুনা যায় । বিস্ফোৰণৰ লগে লগে সমগ্ৰ অঞ্চলটো কঁপি উঠে আৰু ইৰাণী সেনাৰ এয়াৰ ডিফেন্স চিষ্টেম (বায়ু প্ৰতিৰক্ষা ব্যৱস্থা) সক্ৰিয় হৈ আকাশলৈ গুলীচালনা কৰে । অৱশ্যে এই আক্ৰমণত কিমান ক্ষয়-ক্ষতি হৈছে, সেই সন্দৰ্ভত ইৰাণ চৰকাৰে বৰ্তমানলৈকে কোনো আনুষ্ঠানিক তথ্য প্ৰকাশ কৰা নাই ।
আত্মৰক্ষাৰ বাবেহে আক্ৰমণ : আমেৰিকা
আনহাতে, এজন আমেৰিকান সামৰিক বিষয়াই সংবাদ প্ৰতিষ্ঠান ৰয়টাৰ্ছক জনোৱা মতে, এই আক্ৰমণ সম্পূৰ্ণৰূপে আত্মৰক্ষাৰ বাবে কৰা হৈছে । ষ্ট্ৰেইট অব হৰমুজত (হৰমুজ প্ৰণালী) আমেৰিকান নৌসেনা আৰু আন্তঃৰাষ্ট্ৰীয় বাণিজ্যিক জাহাজৰ চলাচলৰ প্ৰতি ভাবুকি কঢ়িয়াই অনা এটা ইৰাণী সামৰিক ঘাটি লক্ষ্য কৰি এই এয়াৰষ্ট্ৰাইক চলোৱা হৈছিল । আমেৰিকান কমাণ্ডে দাবী কৰা মতে, অভিযানৰ সময়ত ইৰাণে উৎক্ষেপণ কৰা কেইবাটাও মাৰাত্মক ড্ৰোনো আকাশতে ধ্বংস কৰা হয় ।
উল্লেখ্য যে, ইয়াৰ ঠিক দুদিন পূৰ্বে (সোমবাৰে) আমেৰিকাৰ চেন্ট্ৰেল কমাণ্ড-এ দক্ষিণ ইৰাণৰ এটা মিছাইল উৎক্ষেপণ কেন্দ্ৰ আৰু সাগৰত মাইন পুতিবলৈ চেষ্টা কৰা ইৰাণী নৌসেনাৰ কেইবাখনো নাও ধ্বংস কৰিছিল ।
‘উচিত প্ৰত্যুত্তৰ দিয়া হ’ব’ : ইৰাণৰ হুংকাৰ
আমেৰিকাৰ এই ধাৰাবাহিক সামৰিক পদক্ষেপক তীব্ৰ গৰিহণা দিছে ইৰাণে । ইৰাণ চৰকাৰে ইয়াক যুদ্ধবিৰতি চুক্তিৰ স্পষ্ট উলংঘন বুলি অভিহিত কৰি সতৰ্কবাণী জাৰি কৰিছে যে, তেওঁলোকে কোনো ধৰণৰ শত্ৰুতামূলক আচৰণ বিনা উত্তৰে এৰি নিদিয়ে আৰু আমেৰিকাৰ এই আক্ৰমণাত্মক কাৰ্যৰ উচিত তথা কঠোৰ প্ৰত্যুত্তৰ দিয়া হ’ব ।
চুক্তিক লৈ ট্ৰাম্পৰ কঠোৰ স্থিতি-
এই উত্তেজনা এনে এক সময়ত বৃদ্ধি পাইছে, যেতিয়া ওমান আৰু কাটাৰৰ মধ্যস্থতাত দুয়োখন দেশৰ মাজত যুদ্ধ সমাপ্তিৰ বাবে গোপন কূটনৈতিক আলোচনা চলি আছিল । কিন্তু আমেৰিকাৰ ৰাষ্ট্ৰপতি ডোনাল্ড ট্ৰাম্পে ইৰাণৰ বিৰুদ্ধে এক অত্যন্ত কঠোৰ স্থিতি গ্ৰহণ কৰিছে ।
কেবিনেট বৈঠকত শান্তি আলোচনাক লৈ অসন্তুষ্টি প্ৰকাশ কৰি ৰাষ্ট্ৰপতি ট্ৰাম্পে স্পষ্টকৈ কয় :
“মই এই প্ৰস্তাৱিত চুক্তিক লৈ এতিয়াও সন্তুষ্ট নহয় । ইৰাণে হয়তো চুক্তি কৰিবলৈ বিচাৰিব পাৰে, কিন্তু হয় এই চুক্তি আমাৰ চৰ্তত চূড়ান্ত হ’ব লাগিব, নতুবা আমি সামৰিক শক্তিৰে এই কাম সম্পূৰ্ণৰূপে শেষ কৰিম ।”
ইয়াৰ উপৰিও, ভৱিষ্যতৰ চুক্তিৰ অধীনত ইৰাণ আৰু ওমানে মিলি হৰমুজৰ গুৰুত্বপূৰ্ণ নৌপথ নিয়ন্ত্ৰণ কৰিব বুলি ইৰাণে কৰা দাবীও ট্ৰাম্পে খাৰিজ কৰে । তেওঁ কয় যে এই আন্তঃৰাষ্ট্ৰীয় জলপথ বিশ্ব বাণিজ্যৰ বাবে সদায় খোলা থাকিব আৰু ইয়াৰ সুৰক্ষাৰ সৈতে কোনো আপোচ কৰা নহ’ব ।
লগতে পঢ়ক : “যিকোনো মূল্যতে হৰমুজ প্ৰণালী খুলিব লাগিব”; কোৱাড মিটিঙত ইৰাণলৈ সকীয়নি
