এই সম্প্ৰসাৰণত ভূপেন্দ্ৰ সিং চৌধুৰী আৰু মনোজ কুমাৰ পাণ্ডেই পূৰ্ণ পৰ্যায়ৰ কেবিনেট মন্ত্ৰী হিচাপে শপত গ্ৰহণ কৰে
উত্তৰ প্ৰদেশৰ ৰাজনীতিয়ে দেওবাৰে এক গুৰুত্বপূৰ্ণ মোৰ লয় । ৰাজধানীৰ জন ভৱনৰ গান্ধী প্ৰেক্ষাগৃহত এক গাম্ভীৰ্যপূৰ্ণ অনুষ্ঠানৰ মাজত মুখ্যমন্ত্ৰী যোগী আদিত্যনাথৰ কেবিনেট সম্প্ৰসাৰণ সম্পন্ন হয় । ৰাজ্যপাল আনন্দীবেন পেটেলে নতুনকৈ নিৰ্বাচিত মন্ত্ৰীসকলক শপত বাক্য পাঠ কৰায় ।
কেবিনেটত নতুন সদস্য আৰু পদোন্নতি-
এই সম্প্ৰসাৰণত ভূপেন্দ্ৰ সিং চৌধুৰী আৰু মনোজ কুমাৰ পাণ্ডেই পূৰ্ণ পৰ্যায়ৰ কেবিনেট মন্ত্ৰী হিচাপে শপত গ্ৰহণ কৰে । আনহাতে, চৰকাৰখনে নতুন মুখক স্থান দি কৃষ্ণা পাছোৱান, সুৰেন্দ্ৰ দিলেৰ, হংসৰাজ বিশ্বকৰ্মা আৰু কৈলাস সিং ৰাজপুতক ৰাজ্যিক মন্ত্ৰী হিচাপে নিযুক্তি দিয়ে । ইয়াৰ উপৰিও, পূৰ্বৰে পৰা কাৰ্যনিৰ্বাহ কৰি থকা অজিত সিং পাল আৰু সোমেন্দ্ৰ তোমাৰক পদোন্নতি প্ৰদান কৰি ৰাজ্যিক মন্ত্ৰী (স্বতন্ত্ৰ দায়িত্ব) ৰ মৰ্যাদা দিয়া হয় ।
ভূপেন্দ্ৰ সিং চৌধুৰী : বৰ্তমান বিধান পৰিষদৰ সদস্য তথা বিজেপিৰ উত্তৰ প্ৰদেশ ৰাজ্যিক শাখাৰ প্ৰাক্তন সভাপতি ।
মনোজ কুমাৰ পাণ্ডে: উনচাহাৰ সমষ্টিৰ পৰা নিৰ্বাচিত বিধায়ক ।
অন্যান্য মন্ত্ৰী: কৃষ্ণা পাছৱান (খাগা), সুৰেন্দ্ৰ দিলেৰ (খাইৰ) আৰু কৈলাস সিং ৰাজপুত (তিৰৱা) হৈছে নিজ নিজ অঞ্চলৰ জনপ্ৰিয় বিধায়ক। হংসৰাজ বিশ্বকৰ্মা বিধান পৰিষদৰ সদস্য ।
শপত গ্ৰহণ অনুষ্ঠানৰ অন্তত সমগ্ৰ গান্ধী প্ৰেক্ষাগৃহ “ভাৰত মাতা কী জয়” আৰু “জয় শ্ৰী ৰাম” ধ্বনিৰে মুখৰিত হৈ পৰে । নৱনিযুক্ত মন্ত্ৰীসকলে ৰাজ্যপাল আৰু মুখ্যমন্ত্ৰীক পুষ্পস্তৱক অৰ্পণ কৰি আশীৰ্বাদ লয় ।
এই অনুষ্ঠানত কেন্দ্ৰীয় মন্ত্ৰী পংকজ চৌধুৰী, দুই উপ-মুখ্যমন্ত্ৰী কেশৱ প্ৰসাদ মৌৰ্য আৰু ব্ৰজেশ পাঠকৰ লগতে বিজেপিৰ জ্যেষ্ঠ নেতৃত্ব উপস্থিত থাকে । এই সম্প্ৰসাৰণে যোগী চৰকাৰৰ আগন্তুক ৰাজনৈতিক সমীকৰণ অধিক শক্তিশালী কৰিব বুলি চৰ্চা চলিছে ।
লগতে পঢ়ক : তামিলনাডুৰ ৰাজনীতিত নতুন সূৰ্যোদয় : মুখ্যমন্ত্ৰী হিচাপে শপত লৈয়েই চমক দিলে ‘থালাপতি’ বিজয়ে!
