আগন্তুক কেইদিনমানৰ বাবে অসমৰ বিভিন্ন প্ৰান্তত বৰষুণৰ ধাৰাবাহিকতা অব্যাহত থকাৰ সম্ভাৱনা আছে
ৰাজ্যত আগন্তুক কেইবাদিন ধৰি বতৰে কাল ৰূপ ধাৰণ কৰাৰ সম্ভাৱনা আছে । বতৰ বিজ্ঞান বিভাগে ২০ এপ্ৰিলত জনোৱা অনুসৰি আগন্তুক কেইদিনমানৰ বাবে অসমৰ বিভিন্ন প্ৰান্তত বৰষুণৰ ধাৰাবাহিকতা অব্যাহত থকাৰ সম্ভাৱনা আছে । ইয়াৰ লগতে কেইবাখনো জিলাত বিজুলী-ঢেৰেকণি আৰু তীব্ৰ বেগেৰে অহা বতাহে তাণ্ডৱ চলাব পাৰে বুলিও আগজাননী প্ৰকাশ পাইছে ।
আগজাননী অনুসৰি, আগন্তুক তিনিদিনত ৰাজ্যৰ অধিকাংশ ঠাইতে মধ্যমীয়া বৰষুণৰ লগতে কোনো কোনো ঠাইত ধাৰাষাৰ বৰষুণ হোৱাৰ সম্ভাৱনা আছে । ইয়াৰ উপৰিও ঠায়ে ঠায়ে বিজুলী-ঢেৰেকণিৰ লগতে ঘণ্টাত ৪০–৫০ কিলোমিটাৰ বেগত বতাহ-ধুমুহা হোৱাৰ সম্ভাৱনা আছে ।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই এই ধাৰাবাহিক বৰষুণৰ ফলত কৃত্ৰিম বান, যাতায়তত ব্যাঘাত আৰু বিশেষকৈ স্পৰ্শকাতৰ অঞ্চলসমূহত স্থানীয়ভাৱে ভূমিস্খলন হ’ব পাৰে বুলি সকীয়াই দিছে ।
ইফালে বিগত ২৪ ঘণ্টাত গুৱাহাটীৰ বিভিন্ন প্ৰান্তত প্ৰবল বৰষুণ পৰিলক্ষিত হৈছে । বিশেষকৈ খানাপাৰাত ২১৫ মিলিমিটাৰতকৈ অধিক বৰষুণ হোৱাৰ বিপৰীতে গুৱাহাটী বিশ্ববিদ্যালয় আৰু অন্যান্য স্থানত ১০০ মিলিমিটাৰতকৈ অধিক বৃষ্টিপাত হৈছে ।
প্ৰশাসনে সকীয়াই দিছে যে ধাৰাবাহিক বৰষুণৰ ফলত নামনি অঞ্চলত জলমগ্নতা বৃদ্ধি পাব পাৰে আৰু গছ উঘলি পৰাৰ লগতে আন্তঃগাঁথনিৰ ক্ষতি হোৱাৰ আশংকা আছে । গুৱাহাটী আৰু ইয়াৰ আশে-পাশে থকা অঞ্চলসমূহৰ বাবে বতৰৰ আগজাননীত কোৱা হৈছে যে আকাশ সাধাৰণতে ডাৱৰীয়া থাকিব আৰু মাজে মাজে বৰষুণ বা ঢেৰেকণিৰ সৈতে বৰষুণ হ’ব পাৰে । তাপমাত্ৰা ৩০°C ৰ পৰা ৩৩°C ৰ ভিতৰত থকাৰ সম্ভাৱনা আছে আৰু সপ্তাহৰ শেষৰ ফালে তাপমাত্ৰা সামান্য বৃদ্ধি পাব পাৰে ।
ASDMA-ই জনসাধাৰণক সতৰ্ক হৈ থাকিবলৈ, ধাৰাবাহিক বৰষুণৰ সময়ত জৰুৰী নহ’লে ভ্ৰমণ নকৰিবলৈ আৰু চৰকাৰী বতৰৰ বুলেটিনৰ জৰিয়তে খবৰ ৰাখিবলৈ পৰামৰ্শ দিছে । বানপ্ৰৱণ আৰু পাহাৰীয়া অঞ্চলত বাস কৰা লোকসকলক প্ৰয়োজনীয় সাৱধানতা অৱলম্বন কৰিবলৈ আহ্বান জনোৱা হৈছে । জৰুৰীকালীন সঁহাৰি ব্যৱস্থাসমূহক সষ্টম কৰি ৰখা হৈছে আৰু কৰ্তৃপক্ষই পৰিস্থিতি নিবিড়ভাৱে নিৰীক্ষণ কৰি থকা বুলি জানিবলৈ দিছে ।
লগতে পঢ়ক : প্ৰলয়ংকৰী ভূমিকম্পৰ পিছতেই চুনামীৰ এলাৰ্ট জাৰি
