যোৰহাট জিলাৰ ৰজামৈদাম নিউ কলনীৰ এটা ভাড়াঘৰত সংঘটিত শক্তিশালী বিস্ফোৰণত দুজন ব্যক্তিৰ মৃত্যু
আগন্তুক বিধানসভা নিৰ্বাচনৰ উন্মাদনাৰ মাজতে শনিবাৰে যোৰহাটত সংঘটিত হৈছে এক ভয়ংকৰ ঘটনা । যোৰহাট জিলাৰ ৰজামৈদাম নিউ কলনীৰ এটা ভাড়াঘৰত সংঘটিত এক শক্তিশালী বিস্ফোৰণত মহম্মদ ইকবাল আৰু নুৰ মহম্মদ নামৰ দুজন ব্যক্তিৰ মৃত্যু হোৱাৰ লগতে আন এজন গুৰুতৰভাৱে আহত হয় । এই ঘটনাই সমগ্ৰ অঞ্চলটোতে তীব্ৰ আতংকৰ সৃষ্টি কৰিছে ।
বাতৰি অনুসৰি, এটা ভাড়াঘৰৰ ভিতৰত এই বিস্ফোৰণটো সংঘটিত হয়, যাৰ ফলত নুৰ মহম্মদৰ থিতাতে মৃত্যু হয় । বিস্ফোৰণটো ইমানেই ভয়ংকৰ আছিল যে মৃত ব্যক্তিজনৰ দেহ ছিন্ন-বিচ্ছিন্ন হৈ পৰে বুলি জানিব পৰা গৈছে ।
এই ঘটনাত মৃত ব্যক্তিজনৰ দুটি সন্তান- আঠ বছৰীয়া পুত্ৰ মহম্মদ ইকবাল আৰু সাত বছৰীয়া এগৰাকী কন্যাও গুৰুতৰভাৱে আহত হয় । তেওঁলোকক ততাতৈয়াকৈ যোৰহাট চিকিৎসা মহাবিদ্যালয় আৰু হাস্পতালত ভৰ্তি কৰা হয় । অৱশ্যে চিকিৎসাধীন অৱস্থাত আঠ বছৰীয়া শিশুটিৰ মৃত্যু হয় আৰু সাত বছৰীয়া শিশুটিৰ অৱস্থা বৰ্তমানো সংকটজনক হৈ আছে বুলি জানিব পৰা গৈছে ।
ঘটনাৰ খবৰ পোৱাৰ লগে লগে আৰক্ষীৰ দল ঘটনাস্থলীত উপস্থিত হৈ তদন্ত আৰম্ভ কৰে । বিস্ফোৰণৰ প্ৰকৃত কাৰণ এতিয়াও জানিব পৰা হোৱা নাই ।
এই ঘটনাই সমগ্ৰ অঞ্চলটোত ভয় আৰু উত্তেজনাৰ পৰিৱেশ সৃষ্টি কৰিছে । আৰক্ষীয়ে কি পৰিস্থিতিত এই বিস্ফোৰণ ঘটিল, সেই সন্দৰ্ভত অধিক অনুসন্ধান চলাই আছে ।
লগতে পঢ়ক : গুৱাহাটীৰ ৰাজপথত গৃহমন্ত্ৰী অমিত শ্বাহৰ বিশাল ৰোড শ্ব’
