দিছপুৰ সমষ্টিৰ পৰা টিকট বঞ্চিত হৈ ক্ষোভিত হৈ পৰিছিল বিধায়ক অতুল বৰা। তাৰ পিছতে বৃহস্পতিবাৰে নিশা অতুল বৰাৰ ঘৰত উপস্থিত হয় মুখ্যমন্ত্ৰী ড০ হিমন্ত বিশ্ব শৰ্মা।
টিকট বঞ্চিত অতুল বৰাৰ ঘৰত বৃহস্পতিবাৰে নিশা উপস্থিত হয় মুখ্যমন্ত্ৰী ড০ হিমন্ত বিশ্ব শৰ্মা।পদূলিৰ পৰাই মুখ্যমন্ত্ৰী গৰাকীক আদৰি নিলে অতুল বৰাই।দিছপুৰ সমষ্টিৰ পৰা টিকট লাভ নকৰাৰ পিছত ক্ষুন্ন হৈ পৰিছিল অতুল বৰা। তাৰ পিছতেই অতুল বৰাক সাক্ষাৎ কৰে মুখ্যমন্ত্ৰী গৰাকীয়ে।
অতুল বৰাক সাক্ষাৎ কৰি মুখ্যমন্ত্ৰী ড০ হিমন্ত বিশ্ব শৰ্মাই কয় যে, দিছপুৰ সমষ্টিৰ পৰা টিকট নিশ্চিত আছিল। কিন্তু বিশেষ ৰাজনৈতিক কাৰণত তেওঁক টিকট দিব পৰা নগ’ল। অতুল বৰা আমাৰ জ্যেষ্ঠ। গতিকে তেওঁ দুষাৰ ক’লে আমি শুনিবও লাগিব।অতুল দা বিজেপিত আছিল আৰু বিজেপিতেই থাকিব। আৰু তেওঁ নিৰ্বাচনী প্ৰচাৰ অভিযানত অংশ ল’ব।ভগৱানে যদি চৰকাৰ খন আনে তেতিয়া অতুল বৰা দা আগকৈও অধিক সক্ৰিয় হৈ থাকিব। দলৰ প্ৰচাৰটো তেওঁ উপস্থিত থাকিব।
লগতে মীৰা বৰঠাকুৰক আশীৰ্বাদ দিয়া সন্দৰ্ভত মুখ্যমন্ত্ৰী গৰাকীয়ে কয় যে, আশীৰ্বাদ দিয়াটো ডাঙৰ কথা নহয়। আশীৰ্বাদ দুই ধৰণৰ। এটা আয়ুষ্মান ভৱঃ আৰু আন এটা বিজয়ী ভৱঃ।কাক কেনেকৈ আশীৰ্বাদ দিব লাগে সেই কথা অতুল দাই ভালকৈ জানে। তাত মই অতুল দাক শিকাবলগীয়া একো নাই। অতুল দাই যিটো আশীৰ্বাদ দিয়াৰ প্ৰয়োজন সেইটোৱেই দিছে।
আনহাতে অতুল বৰাই কৈছে যে, মুখ্যমন্ত্ৰী হিমন্ত বিশ্ব শৰ্মা মোৰ ঘৰলৈ আহিছে আৰু মই ভাল পাইছো। এই সন্দৰ্ভত অহা ২২ মাৰ্চত মোৰ নিজৰ স্থিতি স্পষ্ট কৰিম।
লগতে পঢ়ক: জনসমুদ্ৰৰ মাজেৰে মনোনয়ন দাখিল মুখ্যমন্ত্ৰী ড০ হিমন্ত বিশ্ব শৰ্মাৰ
