এয়া পুত্ৰ স্নেহত বিগলিত এগৰাকী মাতৃ আৰু দেশৰ বাবে সৰ্বোচ্চ বলিদান এগৰাকী সাহসী জোৱানৰ কাহিনী । শ্বহীদ পুত্ৰৰ প্ৰতিমূৰ্তিৰ কাষত এইগৰাকী মাতৃয়ে কৰা কামে চকু সেমেকাই তুলিব আপোনাৰ…
বাহিৰত বৰফৰ বতাহ বলিছে আৰু পাৰাস্তম্ভও দ্ৰুতগতিত অৱনমিত হৈছে । এই হাড় কঁপোৱা জাৰতো জম্মুৰ আৰ্নিয়াত দেখা গ’ল এক হৃদয়স্পৰ্শী দৃশ্য । মাতৃৰ মমতাই যে কোনো বাধা নামানে তাৰেই প্ৰতিফলন ঘটিল এই দৃশ্যত । ইতিমধ্যে সামাজিক মাধ্যমত ভাইৰেল হৈ পৰা এই ভিডিঅ’ই চকু সেমেকাই তুলিছে প্ৰতিজনৰে ।
এয়া শ্বহীদ গুৰনাম সিং আৰু তেওঁৰ মাতৃ যশৱন্ত কৌৰৰ কাহিনী । এগৰাকী মাতৃ যাৰ বাবে পুত্ৰৰ মৃত্যু হোৱা নাই, বৰঞ্চ কেৱল সীমান্তৰ পৰা উভতি আহি শিলৰ মূৰ্তিলৈ ৰূপান্তৰিত হৈছে ।
২০২১ চনত আৰ্নিয়াত কনিষ্টবল গুৰনাম সিঙৰ প্ৰতিমূৰ্তি স্থাপন কৰা হৈছিল, তেতিয়া ই আছিল বিশ্ববাসীৰ বাবে গৌৰৱৰ প্ৰতীক । কিন্তু তেওঁৰ মাতৃ যশৱন্ত কৌৰৰ বাবে মৰমৰ পুত্ৰই হৈ আছে যিয়ে ঠাণ্ডাত কঁপিব পাৰে । ২০২২ চনৰ পৰা প্ৰতিটো শীতকালতে জম্মুত প্ৰথম শীত লহৰৰ লগে লগে যশৱন্ত কৌৰে গধুৰ উলৰ কম্বল লৈ প্ৰতিমূৰ্তিৰ কাষ চাপে । তেওঁ মৰমেৰে প্ৰতিমূৰ্তিটোৰ কান্ধত কম্বলখন মেৰিয়াই দিয়ে । প্ৰত্যক্ষদৰ্শীৰ চকু চকুলোৰে ভৰি পৰে, কিন্তু মাতৃগৰাকীৰ মুখখনে কঢ়িয়াই লৈ ফুৰে এক অদ্ভুত সন্তুষ্টিৰ অনুভূতি, যেন পুত্ৰক ঠাণ্ডাৰ পৰা ৰক্ষা কৰিছে ।
শ্বহীদ মাতৃগৰাকীয়ে স্মৰণ কৰে যে, ২৬ বছৰীয়া গুৰনামক শেষবাৰৰ বাবে দেখাৰ সময়ত তেওঁৰ বিয়াৰ সপোন দেখিছিল । তেওঁ কল্পনা কৰিছিল যে পিছৰবাৰ তেওঁৰ মৰমৰ পুত্ৰই ছুটী লৈ উভতি আহিলে ঘৰখন বিয়াৰ আনন্দ-উলাহেৰে ভৰি পৰিব । কিন্তু গুৰনামৰ মনত আন কিবাহে আছিল । তেওঁৰ “প্ৰথম প্ৰেম” আছিল তেওঁৰ ইউনিফৰ্ম আৰু তেওঁৰ দেশ ।
উল্লেখ্য যে, ২১ অক্টোবৰ, ২০১৬ত হিৰানগৰ খণ্ডত অনুপ্ৰৱেশ কৰা সন্ত্ৰাসবাদীৰ বাবে গুৰনাম হৈ পৰিছিল দুঃস্বপ্ন । তেওঁ এটা সন্ত্ৰাসবাদীক হত্যা কৰি যুদ্ধবিৰতিৰ প্ৰতিশোধ লয় । ২২ অক্টোবৰ, ২০১৬ত গুলীৰে থকা-সৰকা হোৱাৰ পিছতো গুৰনাম পিছহুহকি নাযায় আৰু শেষত ভাৰত মাতৃৰ কোলাত শেষ নিশ্বাস ত্যাগ কৰে ।
বি এছ এফৰ ১৭৩ নং বেটেলিয়নৰ এইগৰাকী সাহসী জোৱান এতিয়া মাতৃৰ কোলাত সুৰক্ষিত হৈ আছে । যশৱন্ত কৌৰৰ ত্যাগ আৰু প্ৰেমে আমাক সোঁৱৰাই দিয়ে যে এজন সৈনিকে কেৱল সীমান্তত নিজৰ প্ৰাণ আহুতি নিদিয়ে; তেওঁৰ সমগ্ৰ পৰিয়ালে প্ৰতিদিনে এক নতুন শ্বহীদ হোৱাৰ অভিজ্ঞতা লাভ কৰে । এই কম্বলখন কেৱল উলৰ টুকুৰা নহয়, মাতৃৰ প্ৰেমৰ উষ্ণতা যিটো কোনো গুলী বা শত্ৰুৱে কেতিয়াও ভেদিব নোৱাৰে ।
লগতে পঢ়ক : অন্ত পৰিব পথ দুৰ্ঘটনাৰ পিছত চিকিৎসাৰ চিন্তা ; কেন্দ্ৰীয় পৰিৱহণ মন্ত্ৰীৰ ডাঙৰ ঘোষণা
